وتكەن اپتادا قورىتىندىلانعان ۇكىمەتتەگى كادرلىق تاعايىنداۋلار بۇرىنعىلارىنان اسا قاتتى ايىرماسى بولدى دەپ ايتا المايمىز. بيلىكتىڭ ءار تارماعىندا ءتۇرلى لاۋازىمدى اتقارىپ جۇرگەن شەنەۋنىكتەردى ءبىرىنىڭ ورنىنا ءبىرىن قونجيتقان ادەتتەگى ءاۋىس-تۇيىس بولدى. بيلىكتىڭ ءار تارماعىندا دەيمىز-اۋ، جاڭا پرەمەر دە، ونىڭ ەكى ورىنباسارى دا سول ۇكىمەتتەن ۇزاماعان، ءبىرى مينيستر، ءبىرى كۆازيمەملەكەتتىك سەكتورداعى كومپانيانىڭ باسشىسى ەكەن عوي، ايتسا دا. بۇل تاعايىنداۋلار قوعامدا وڭ باعا السا، ەلدىڭ تەك ايتەۋىر ءبىر وزگەرىستەردى قالاعاندىعىنان، الدىڭعى ۇكىمەتتىڭ، ناقتىراق ايتقاندا ونىڭ باسشىسىنان مەزى بولعاندىعىنان دەپ ءتۇسىنۋ كەرەك.
سونىمەن، بۇل ۇكىمەت قۇرامىنان جاڭا ەسىم كورە المادىق. ادىلەت مينيسترلىگىنە، جاڭادان قۇرىلعان ءدىن ىستەرى جانە ازاماتتىق قوعام مينيسترلىگىنە، ورتالىق سايلاۋ كوميسسياسىنا تاعايىندالعان باسشىلار دا اقوردا «كولوداسىندا» بۇرىننان جۇرگەن، باستىسى اۋىز تولتىرىپ ايتارلىقتاي ىسكەرلىگىمەن دە، ەل اراسىنداعى حاريزماسىمەن دە ەرەكشەلەنبەگەن جاندار. پرەزيدەنت جاڭا ورىن جاڭا مۇمكىندىك بەرەدى، جۇمىسىن شيراتادى دەپ سەندى مە ەكەن، وسىنداي شەشىم قابىلدادى. وسى ورايدا، ەلباسى اقىرى جاڭادان ەشكىمدى اكەلمەيدى ەكەن، تىم بولماعاندا ۇلكەن قىزمەتكە تاۋەلسىزدىك جىلدارى ارالاسقان، تاۋەلسىز قازاقستاننىڭ ەكونوميكاسىن كوتەرۋگە، ساياساتىن جەتىلدىرۋگە ۇلەستەرىن قوسقان، ءقازىر ساياساتتان سىرتقارى جۇرگەن جاستاردى نەگە جانىنا تارتپاعان ەكەن دەگەن دە ويعا قالاسىز.
وسىنداي اۋىس-تۇيىستەر كەزىندە قارجىگەر وراز جاندوسوۆتىڭ ۇكىمەتتەگى ورنى ويسىراپ تۇرعانىنا كوز جەتكىزەسىز. تاۋەلسىزدىكتىڭ العاشقى جىلدارىندا-اق پرەزيدەنت جانىنداعى جوعارى ەكونوميكالىق كەڭەستە ءبولىم باسقارعان، ءار جىلدارى ۇلتتىق بانك ءتوراعاسى، قارجى ءمينيسترى، تابيعي مونوپوليالاردى رەتتەۋ جانە باسەكەلەستىكتى قورعاۋ اگەنتتىگىنىڭ باسشىسى، پرەمەر-مينيستردىڭ ءبىرىنشى ورىنباسارى سىندى لاۋازىمداردان وتكەن وراز ءالي ۇلى بۇگىندە پرەمەر بولماسا دا، ەكونوميكالىق بلوكتىڭ ءبىر مينيسترلىگىنە يە بولا الارلىق تۇلعا.
ەكونوميكالىق رەفورمالار تىعىرىققا تىرەلگەن، ءوسىم كەمىپ، ۇلتتىق قوردى كەمىرىپ جاتقان تۇستا قارجىگەر، ءار جىلدارى پرەزيدەنت كەڭەسشىسى، كىرىس، قارجى ءمينيسترى، قازاقستاننىڭ ينۆەستيسيالىق قورىن باسقارعان زەينوللا كاكىمجانوۆتى نەگە ءبىر سىناپ كورمەسكە؟ ءقازىر جەكە كاسىپكەر رەتىندە قالىپتاسىپ ۇلگەرگەن ەكس-شەنەۋنىكتىڭ سوڭعى جىلداردا جيناعان تاجىريبەسى پرەزيدەنتتىك رەفورمالاردى ىسكە اسىرۋدا ىسكە العىسىز دەي الامىز با؟
وعاش قىلىقتارى، ويلانباي ايتىلعان سوزدەرىمەن قوعامدا كۇلكىگە ۇشىراپ جاتاتىن مينيستر، دەپۋتات كەلىنشەكتەردى كورگەندە ءبىراز ۆەدومستۆودا ۆيسە-باسشىلىق باسپالداقتاردان وتكەن جانات ەرتىلەسوۆا ەسكە تۇسەتىنى راس. ايتسا دا، جانات ەرتىلەسوۆا حانىمدى پارلامەنتتەگى جاڭا بيۋدجەتتى بەكىتۋ جونىندەگى جۇمىسشى توبىنان كورىپ قالدىق.
الەۋمەتتىك بلوكتا دا اتقارىلار ءىس كوپ. كەرى كەتىپ جاتقاندارى دا جوق ەمەس. الدا مىندەتتى الەۋمەتتىك-مەديسينالىق 
ساقتاندىرۋ جۇيەسىن ەنگىزۋ جۇمىستارى تۇر. حالىقتىڭ بارلىق بولىگىن قامتيتىن، ءار شاڭىراققا تىكەلەي قاتىسى بار بۇل رەفورمانى جۇزەگە اسىرۋ سالا باسشىسىنا وڭايعا سوعادى دەپ ايتا المايمىز. مۇنداي قيىن تاپسىرمالاردى ورىنداۋ ناعىز ەڭبەكتورىلاردىڭ عانا قولىنان كەلەدى. پرەزيدەنتتىڭ نەگە مەملەكەتتىك قىزمەت، زەينەتاقى جۇيەسى سالاسىندا ءبىرشاما رەفورمالاردى جۇزەگە اسىرۋدى ۇيىمداستىرعان ءاليحان بايمەنوۆتى «جارىققا شىعارماي» وتىرعانى تۇسىنىكسىز. ەل اراسىندا «پاتامۋشتا» دەگەن اتپەن تانىمال بولعان سەرىك ابدەنوۆتى دە سوڭعى زەينەتاقى رەفورماسىنىڭ قۇربانى بوپ كەتتى دەيتىندەر بار. ايتپەسە، بىشىمبايەۆتىڭ بىلگەنىن ابدەنوۆ بىلمەيدى دەي المايسىز. قازىرگى وتىرعان جەرى دە («قازمۇنايگاز» ۇك ۆيسە-پرەزيدەنتى) جامان ەمەس، دەي تۇرعانمەن، «بيلىككە جاستار كەلۋى كەرەك» دەگەن ۇرانداردى تەك ەستىپ قانا قويماي، ءىس جۇزىندە كورگىمىز كەلەتىنى دە راس.
ۇلكەن ساياساتتان، لاۋازىمدى قىزمەتتەن شەت قالعاندار بۇل تىزىممەن شەكتەلمەيدى. باعىن بيزنەستە سىناپ، قوعامدىق قىزمەتتە كوشباسشى بوپ جۇرگەن ەكس-شەنەۋنىكتەر جەتەرلىك. ولاردىڭ بارلىعى ەل سەنىمىنەن شىقتى، «ساياسي ولىككە» اينالدى دەۋ اسىعىستىق تا بولار. ءبىرى ەلگە جاقپاسا، ءبىرى ەلباسىنىڭ قىرىنا ىلىكتى. ەندى ءبىرى ءتۇرلى ىقپالدى توپتارعا جاقپاي شەتتەتىلدى. تەك شەتتەتىلىپ قانا قويماي، ساياسي الاڭعا سىعالاۋ مۇمكىندىگىنەن ءبىرجولا ايىرىلىپ، بيلىك جاققا اتتاپ باسپايتىنداي بولعان سياقتى.
سايلاۋ بەك
