تالدىقورعان مەن بالپىق بي كەنتى اراسىنداعى جاڭا جول قۇرىلىسىنىڭ نەگىزگى بولىگى  جىل سوڭىنا دەيىن اياقتالادى. تەك باقتىباي اۋىلى مەن بالپىق بي كەنتىن كەسىپ وتەتىن جولدى جوندەۋ كەلەسى جىلعا قالدىرىلماق. بۇل تۋرالى "قازاۆتوجول" ۇلتتىق كومپانياسىنىڭ وكىلدەرى مالىمدەدى. قۇرىلىسى 2012 جىلى باستالسا دا ءالى سالىنىپ بىتپەي جاتقان جولدى "نۇر وتان" پارتياسىنىڭ ورتالىق اپپارات قىزمەتكەرلەرى كورىپ شىقتى. جۇمىس توبى سونداي اق، تالدىقورعاننىڭ وڭتۇستىك-باتىس اۋدانىنداعى قۇرىلىسى تۇرالاپ تۇرعان 5 ءتۇرعىن-ۇيدىڭ جاعدايىمەن دە تانىستى، - دەپ حابارلايدى Qamshy.kz "جەتىسۋ" ارناسىنا سىلتەمە جاساپ.

جەرتولەسى عانا بار بۇل 5 ءتۇرعىن-ۇيدىڭ قۇرىلىسى جىل سوڭىنا تامان قايتا قولعا الىنۋى مۇمكىن. جۇمىسقا سالعىرتتىق تانىتقان بۇرىنعى مەردىگەر مەكەمەگە قاتىستى سوت ۇكىمى شىققان. جوباعا بولىنگەن قارجى  قايتارىلعان. 290 پاتەرلى ۇيلەردىڭ جوبالىق-سمەتالىق قۇجاتتارى جاڭادان جاسالدى. ەندى ءۇي قۇرىلىسىن جالعاستىرۋعا نيەتتى كومپانيالارعا تەندەر جاريالانباق. سونىمەن بىرگە نىساننىڭ جوبالىق قۇنى دا قايتا قارالادى.  

ءبىراق جوباعا جاۋاپتى «بايتەرەك» اق سالىناتىن ءۇيدىڭ ءار شارشى مەترىن 140 مىڭ تەڭگەدەن اسىرمايمىز دەيدى. ونىڭ ۇستىنە نىسان قۇرىلىسى  "نۇرلى جول" باعدارلاماسى اياسىندا قايتا جاندانادى. ءۇي قولدانىسقا بەرىلسە مىڭداعان ادامنىڭ باسپانا ماسەلەسى شەشىلمەك. ال ءقازىر قۇرىلىستىڭ قولعا الىنباۋى وسى اۋداننىڭ ينفروقۇرىلىمىن جاقسارتۋعا كەدەرگىسىن كەلتىرۋدە. 

قۇرىلىسى جىرعا اينالعان تاعى ءبىر جوبا تالدىقورعان مەن بالپىق بي كەنتى اراسىنداعى جاڭا اۆتوجول. نەبارى 24 شاقىرىمعا سوزىلعان  جولدى سالۋ جۇمىستارى ءتورتىنشى جىلعا جالعاسۋدا. وعان سەبەپ ءارتۇرلى، دەگەنمەن وسى جىلدىڭ سوڭىنا تامان نەگىزگى بولىگى اياقتالادى.  "قازاۆتوجول" كومپانياسىنىڭ وكىلى وسىلاي دەيدى. ءبىراق تولىعىمەن قولدانىسقا وتپەيدى، باقتىباي اۋىلى مەن اۋدان ورتالىعىن كەسىپ وتەتىن جولدى جوندەۋ كەلەسى جىلعا قالادى. 

جول سالۋشى مەكەمەنىڭ ەلۋدەن استام تەحنيكاسى ءقازىر تىنىمسىز جۇمىس ىستەپ تۇر. "نۇرلى جول" باعدارلاماسى ارقىلى بولىنگەن قاراجات كۇشىمەن حالىق جول ازابىنان قۇتىلادى. "نۇر وتان" پارتياسىنىڭ ورتالىق اپپارات قىزمەتكەرلەرى جول قۇرىلىسىنىڭ قالاي ءجۇرىپ جاتقانىن ءوز كوزدەرىمەن كورىپ شىقتى. 

ال مىناۋ بالپىق بي كەنتىندەگى كۇندەلىكتى قايتالاناتىن كورىنىس. بولاشاقتا بازار ماڭىنداعى وسى جول جوندەلىپ، سۋ جاڭا تراسساعا اينالادى. الايدا كولىك كەپتەلىسى سول قالپى قالۋى مۇمكىن. سەبەبى، جول سالۋ جوباسىندا جولاۋشىلار وتەتىن اسپالى كوپىر نەمەسە جەراستى وتكەلى قاراستىرىلماعان. استانادان كەلگەن جۇمىس توبى بۇل ماسەلەنى نازارعا الىپ، ءتيىستى قۇزىرلى ورگاندارعا جەتكىزۋگە ۋادە ەتتى.