بيىلعى جىل قازاق حالقى تاعدىرىنداعى بىرنەشە اتاۋلى وقيعانىڭ مەرەكەلىك داتاسى بولىپ وتىر. اتاپ ايتقاندا، قازاقستان تاۋەلسىزدىگىنە 25 جىل، پاتشا وكتەمدىگىنە قارسى ۇلتازاتتىق كوتەرىلىسكە 100 جىل، جەلتوقسان كوتەرىلىسىنە 30 جىل، ۇلت كوسەمى ءاليحان بوكەيحانوۆتىڭ 150 جىلدىعى، قازاق كوشىنە 25 جىل جانە باسقا دا مەرەكەلەر.
وسى ورايدا، «قامشى» پورتالى جەلتوقسان قۇرباندارى رۋحىنا تاعزىم ەتە وتىرىپ، بەلگىلى جەلتوقسان قاھارمانى، «ناعىز جەلتوقسان» قوعامدىق قورىنىڭ پرەزيدەنتى قۇرمانعازى راحمەتوۆتىڭ «جەلتوقسان» ەستەلىگىن ءوزىنىڭ رۇقساتىمەن وقىرمان نازارىنا ۇسىنادى.
قۇرمانعازى ابدەن ۇلى راحمەتوۆ ( ءقابدۋالي) – 1965 جىلى 22 قاڭتاردا سەمەي وبلىسى، ماقانشى اۋىلىندا دۇنيەگە كەلگەن. اكەسىنەن 5 جاسىندا ايىرىلعان قۇرمانعازىنىڭ اناسى توعىز قۇرساق كوتەرىپتى، سونىڭ ۇشەۋى جاس كەزدەرىندە قايتىس بولىپ كەتكەن (كۇليا، كۇلعايشا، رۋحيا). اعالارى ورالعازى (1945ج.ت.)، قايىرعازى (1948) قازىرگى كۇندە ماقانشىدا تۇرادى. تۇرسىنگۇل (1958)، بايان (1960) اپايلارى الماتى قالاسىندا، قارىنداسى باقىت(1967) قاراعاندى قالاسىندا تۇرىپ جاتىر. ءبارىنىڭ دە جوعارى ءبىلىمى، وتباسى بار.
1972 جىلى مەكتەپ قابىرعاسىن اتتاعان قۇرمانعازى ع.مۇراتبايەۆ اتىنداعى سەگىز جىلدىق مەكتەپتى ماقانشى اۋىلىندا وقىدى. 1978 جىلى الماتى قالاسىنداعى رقەمي №2 مەكتەپ-ينتەرناتىنا وقۋعا قابىلدانىپ، 1981 جىلى التىن بەلگىمەن ءبىتىرىپ شىقتى. سودان پوليتەحنيكالىق ينستيتۋتتىڭ اۆتوماتيكا جانە باسقارۋ جۇيەلەرى فاكۋلتەتىنە، 1982 جىلى وسكەمەن قۇرىلىس-جول ينستيتۋتىنىڭ الماتىداعى فيليالىنا وقۋعا ءتۇستى. 1983-85 اسكەر قاتارىندا بولىپ ( ۋكراينا، ودەسسا)، اۋىلدا ءبىر جىل ەڭبەكتە بولدى.
1986 جىلى قازمۋ-دىڭ فيزيكا فاكۋلتەتىنە ( ارناۋلى فيزيكا، اعىلشىن تىلىندە) وقۋعا تۇسەدى. ءبىراق سول جىلى جەلتوقسان ۇلتازاتتىق كوتەرىلىسىنە قاتىسىپ، 7-8 قاڭتار قازسسر جوعارعى سوتىنىڭ ۇكىمىمەن 7 جىلعا باس بوستاندىعىمنان ايرىلعان. ماڭعىشلاقتىڭ، اقتوبەنىڭ، قىزىلوردانىڭ، شىمكەنتتىڭ، جامبىلدىڭ تۇرمەلەرىنە، قوستانايداعى قۇسمۇرىن ءتۇرمەسىنە، سوڭىندا قاراعاندىداعى تۇرمەگە قامالادى. قازسسر جوعارعى سوتىنىڭ پرەزيديۋمى 2 جىلعا ءتۇسىرىپ (1988 ج.)، پلەنۋمىنىڭ شەشىمىمەن (1990 ج.) تولىق اقتالدى. جۇبايىنىڭ ەسىمى - روزا، قىزى - ءمولدىر ەۇۋ-دىڭ ءبىرىنشى كۋرس ستۋدەنتى. قازىرگى كۇندە جەلتوقسان قاھارمانى استانا قالاسىندا تۇرىپ جاتىر. "ناعىز جەلتوقسان" قوعامدىق قورىنىڭ پرەزيدەنتى. 2011 ق ر پرەزيدەنتتىگىنە ۇمىتكەر، 2012، 2016 جىلدارى ق ر پارلامەنت ءماجىلىس دەپۋتاتتىعىنا جسدپ اتىنان ۇمىتكەر.
قۇرمانعازى راحمەتوۆ باستاعان ءبىر توپ جەلتوقسانشى جەلتوقسان قۇرباندارىن ەسكە الىپ گۇل شوعىن قويدى. 2014 جىل. 17 جەلتوقسان، استانا.
داۋىل الدىنداعى تىنىشتىق
«جەلتوقسان 86-1»
تاڭەرتەڭ ەرتە وياندىم. كوڭىل كۇيىم ەرەكشە. كەرەۋەتتەن تۇرىسىمەن قولدارىمدى جوعارى كوتەرىپ اينالدىرا ازىن-اۋلاق جاتتىعۋىمدى باستاپ تا كەتتىم. ورامالىمدى اسىنا، جۋىناتىن بولمەگە ەنسەم، كادىمگىدەي كەزەك ەكەن. جۋىنىپ شايىنىپ، جىگىتتەر دايىنداپ قويعان قارا شايدان تارتىپ جىبەرىپ، وقۋ كورپۋسىنا اياڭداپ كەلەمىن. الدىمنان قارسى شىققان ورتا بويلى ادامنىڭ ءجۇزى تانىس سياقتى. جاقىنداي بەرە ول كىسى تانىپ قالىپ، «وي قۇرمانعازى، سەن وسىندا وقيتىن با ەدىڭ؟ قالىڭ قالاي، نەشىنشى كۋرستاسىڭ؟» دەپ سۇراي جونەلدى. ويلاماعان جەردەن كەزدەسىپ قالعان ادامىما: «وي، اعاي قالىڭىز قالاي؟ مەن وسىندا وقۋعا تۇسكەنمىن، ءقازىر ءبىرىنشى كۋرستامىن، ارنايى اعىلشىن بولىمشەسىندە...»، - دەگەنگە عانا شامام كەلدى.
الماتى قالاسىنداعى ەكسپەريمەنتتىك قازاق مەكتەپ ينتەرناتىنداعى كەزىندەگى ديرەكتورىمىز - مەشىتبايەۆ اعامىز. كوپ وزگەرمەگەن ەكەن، وسىندا تاريح كافەدراسىندا ساباق بەرەتىندىگىن ءبىلدىم. جىلى قوشتاستىق.
ءيا، مەكتەپ بىتىرگەلى دە بەس جىل ۋاقىتتىڭ زىرىلداپ ءوتىپ كەتكەنىن ەسىمە سالعانداي كەزدەسۋ. دوستىق داڭعىلىنىڭ جوعارعى جاعىندا ورنالاسقان مەكتەپ-ينتەرناتتىڭ مەنىڭ ومىرىمدەگى الار ورنى ەرەكشە ەدى. سوناۋ سەمەي وبلىسى، ماقانشى اۋىلىندا قاننەن قاپەرسىز وتكىزگەن بالالىق شاعىم مەن الماتىعا ارمان قۋىپ كەلگەن العاشقى كۇندەرىم. ەركىن كۇرەستەن العاش ترەنەرىم مارقۇم ريفحات گەرەيەۆ اعامىزدىڭ قولقا سالۋىمەن قايىرعازى اعام دەدەكتەتىپ الماتى قالاسىنىڭ سپورت مەكتەبىنە الىپ كەلگەن بولاتىن. تاڭەرتەڭ ەرتەمەن كەلەتىن اۆتوبۋسىمىزدان ساپارجايعا تۇسە سالىسىمەن، وسىنداعى ناعاشى – قۇنان اعامنىڭ ۇيىنە بىردەن تارتتىق. تاڭ اتپاي كەلگەن قوناقتاردى الماتى قالاسىنداعى «3 ۆوكزال» جىلى قارسى الدى. ۆوكزال دەيتىنىمىز، قىسى-جازى قۇنان اعامنىڭ ۋيىنەن قوناق ارىلمايتىن. ءبىرى كەلىپ، ءبىرى كەتىپ جاتاتىن. ءبىزدىڭ كەلگەنىمىزدە دە ءداپ سونداي ەكەن. سەمەيدىڭ اياگوز جاعىنان دوستارى جانۇياسى، بالالارىمەن باسىپ جاتقان كورىنەدى.
ءبىرازدان كەيىن الما مەن المۇرت اعاشتارىنىڭ استىندا ۇزىننان جايىلعان داستارحانعا تاڭعى تاماققا وتىردىق. جەڭگەمىزدى ەس بىلگەلى زاكۋ اپاي دەپ اتاپ كەتكەنمىن. ول كىسىنىڭ قولىنان جەگەن اس ءارقاشاندا ءتاتتى، ءارى تويىمدى بولاتىن. تاماقتان كەيىن ءۇيدىڭ جانىنداعى تەلەفون بۋدكاسىنان بىرەۋلەرگە حابارلاسىپ، ءبارىمىز ءجون جونىمىزبەن ءوز جۇمىستارىمىزعا كەتتىك.
ستاديوننىڭ جانىندا ءبىزدى مۇسابەك اعامىز قارسى الدى. سودان سپورت مەكتەپ-ينتەرناتىنا باردىق. زالعا كىرگەننەن كەيىن دەنەڭدى جىلىت، جاتتىعۋ جاساي بەر. ءقازىر سەنىڭ قالاي كۇرەسەتىنىڭدى كورەمىز دەدى. مەن مىنانداي زالدا جاتتىعۋ جاساۋدىڭ ءوزى ارمان عوي دەگەن ويدىڭ جەلەگىمەن جۇگىرە جونەلدىم. ءبىراز ۋاقىتتان كەيىن مەن قۇرالپاس تورت-بەس بالا شۋلاپ كىرىپ تە كەلدى. كۇرەس باستالىپ تا كەتتى. بىرىنەن كەيىن ءبىرىن الىپ سوقتىم. ءۇمىت ارتىپ الىپ كەلگەن اعامنىڭ ماعان ريزا بولىپ تۇرعانىن كورىپ، مەن دە ءوزىمدى كەرەمەت سەزىندىم. مۇسابەك اعام دا ءدان ريزا. مەديسينالىق تەكسەرىستەرگە كەلگەندە دەنساۋلىعىمنىڭ ءبىر جەرىنەن كىنارات تاپقان بولۋى كەرەك، ءوزارا كوپ اڭگىمەلەستى، مەن سىرتتا بولاتىنمىن. انىق قانىعىن وسى ۋاقىتقا دەيىن قايىرعازى اعام ايتقان ەمەس، مەن دە سۇراماپپىن. سودان جامبىل كوشەسىندە ورنالاسقان ى.التىنسارين اتىنداعى پەداگوگيكا عىلىمي زەرتتەۋ ينستيتۋتىنا بارىپ ، شاعىن ەمتيحاننان كەيىن قرەمي وقۋعا ورنالاستىرىپ، كۇرەستى مۇسابەك اعامنىڭ قاراماعىندا جالعاستىراتىن بولدىم.
اۋىلدان الىس شىعا قويماعان ويىن بالاسى، قالا مەن ينتەرناتتىڭ ىشكى ءتارتىبىن بىردەن قابىلداي قويۋى قيىن ەكەن. ءبىر جەتى وتپەستەن اۋىلدى ساعىنىپ سالا بەرگەنىم. ساباقتان شىعا سالىسىمەن قالا ورتاسىندا مەن مۇندالاپ شاقىرىپ تۇراتىن تەلەباشنيانىڭ ۇشىن كورىسىمەن، ەلدەردەن سۇراي وتىرىپ، قازاقستان تەلەارناسىنا ءبىراق تارتىپ وتىردىم. ىشكە كىرەيىن دەسەم كىرگىزبەيدى. مەن وسىنداي دا وسىنداي دەگەن ادامنىڭ باۋىرىمىن، قالاي تاپسام بولادى ەكەن دەپ قايتپايمىن. قايسارلىعىمدى، بولماسا بويىمنىڭ كىشكەنتايلىعىن كورىپ، اياۋشىلىق تانىتتى ما، ايتەۋىر تەلەفون ارقىلى سۇراستىرىپ، ءقازىر وسى ارادا تۇر، ەشقايدا شىقپا، اعاڭ وسى جەرگە كەلەدى دەگەندە قۋانىپ كەتتىم. راسىمەن كوپ ۋاقىت وتپەستەن، «ءاي، قۇباش»،- دەگەن تانىس داۋىستى ەستىپ بۇرىلىپ قاراسام، قولىندا ءبىر بۋما قاعازى بار قۇنان اعام ماعان كەلە جاتىر ەكەن. قۋانعانىمنان ميليسيونەر جىگىتكە راحمەتىمدى جاۋدىرىپ جاتىرمىن. ءسويتىپ مەنىڭ ومىرىمدە تەلەديدارمەن تابىسۋ مەن تانىسۋ كەزەڭى باستالىپ كەتكەن ەدى.
ساباقتان شىعا سالىسىمەن، 29 مارشرۋتقا وتىرا سالىپ، ارمان كينوتەاترىنان ءتۇسىپ، اباي داڭعىلىمەن ەكى-ۇش كۆارتالدى جاياۋ جۇرە-جۇگىرە باسىپ جەتىپ بارىپ الاتىندى شىعاردىم. ىشىنە كىرگەن ساتتەن ەرەكشە كۇيگە ەنەتىنمىن. تەليەۆيزوردان ءجيى كورسەتەتىن كوپتەگەن ءارتىس پەن انشىلەرىمىزبەن جۇزبە-جۇز جۇزدەسۋ اركىمنىڭ ەنشىسىنە بايلانا قويماعان باقىتتى ۋاقىت ەدى. نۇرعالي ءنۇسىپجانوۆ، لاكي كەسوگلۋ، ۆەنەرا تىنىشتىعۇلوۆا جانە ت.ب. تانىمال ارتىستەر، روزا اپايىمنىڭ جانىنا اقىرىن جاناسىپ بارىپ، بويىمدى دا ولشەپ قويۋدى ۇمىتپايتىنمىن. «قىمىزحانانىڭ» قىزىپ تۇرعان ءساتى، امىرەنىڭ پاريجدە سالعان ءانى مەن ءومىرى جايىنداعى قويىلىمى ەستەن كەتپەس دۇنيەلەر... كەشكىسىن قول ۇستاسىپ «رابوچيي پوسەلوكقا» قايتاتىنبىز.
تاڭەرتەڭ ناعاشى ىنىلەرىمدى ەرتە اۆتوبۋستار مەن تروللەيبۋستاردى اۋىستىرا وتىرىپ دارحان، داستان، دۋماندى 12 مەكتەبىنە جەتكىزۋ، ودان ءارى ينتەرناتقا جول. ءوستىپ-وستىپ قالانىڭ قىزۋ دا قىزىق بولىپ كورىنگەن ومىرىنە اقىرىن-اقىرىن جاقىنداپ، سىنىپتاستارىمنىڭ ورتاسىنا ۇيرەنە دە باستادىم. ۇلگەرىم مەن تاربيەم تاربيە جەتەكشىمىز بالجان ەرگالييەۆناعا ۇناعان دا بولۋى كەرەك، مەنى تۇستەن كەيىنگى دايىندىقتان ەرتە جىبەرەتىن. العاشقى كانيكۋل دا جاقىنداعان سايىن، اۋىلعا دەگەن ساعىنىشىم ارتىپ، تىقىرشىپ جۇرگەنىمدى بايقاعان بولۋى دا كەرەك بالجان اپايىم كلاسس جەتەكشىمىز سەيفوللا اعامىزدان، «زاۆۋچىمىز» ءايتىموۆا اپايىمىزدان سۇراپ ەكى-ۇش كۇن بۇرىن ەرتە جىبەردى.
ساياحات ساپارجايىنان يكارۋسقا وتىرىپ الىپ اۋىلعا اسىقتىم. ءبىر سوتكەگە تاياۋ ۋاقىت جۇرەتىن اۆتوبۋس ماقانشىعا جاقىنداعان سايىن، دەگبىرىم شىعىپ كەلەدى. انادايدان «جاي توبەم» كورىنگەندەگى قۋانىشىمدى سوزبەن ايتىپ جەتكىزۋ مۇمكىن ەمەس، ءبىر سوزبەن، توبەم كوككە ءبىر ەلى جەتپەي قالعانداي كورىنگەنىن قالايشا جاسىرايىن. جاي توبەدەن تومەن قاراي جوڭكىلە جونەلگەن يكارۋستىڭ قادام الىسى ەرەكشە، جول جيەگىندەگى جيدە اعاشتارىنىڭ ءيىسى تاناۋىمدى تەسىپ جىبەرەردەي. القىمىن باسا الماعان ارعىماقتاي، يكارۋس تا اۋىلدىڭ ايالداماسىنا توقتادى-اۋ، ايتەۋىر. اتىپ شىققانىمدى دا بايقاماي قالىپپىن. كەزىندە كوز الدىمدا اجەپتاۋىر كورىنەتىن اۋىلدىڭ كوشەلەرى مەن ۇيلەرى بىر-بىرىنەن الشاقتاي تۇسكەندەي، اربىرەۋى ءاربىر جەردە سوستيىپ تۇرعانداي اسەر قالدىردى. اۋىل اراسىندا قاتىنايتىن ەكى عانا مارشرۋتتىڭ بىزدەر جاققا باراتىنىن ءبىراز توسىپ تا قالدىم. ميچۋرين كوشەسىنە قاراي بۇرىلعاندا جۇرەگىم لۋپىلدەپ كەتتى-اي دەسەڭىزشى، دەنەمنەن الاسۇرىپ ، شىعىپ كەتەردەي، قوس قولىممەن سىرتىنان قاپسىرا قىسىپ-قىسىپ قويامىن.
ۇيگە دە جەتىپ كەلگەنىمدى بايقاماي قالدىم. اناندايدان اناشىمنىڭ اۋلادا جۇرگەنىن كورىپ، «تاتە، تاتە»، - دەپ تاتەلەپ جىبەرىپ، قۇشاعىنا قالاي ەنىپ كەتكەنىمدى دە بايقاماي دا قالىپپىن.
مەكتەپ – ينتەرناتتاعى ءۇش، ودان كەيىنگى بەس، جالپى سەگىز جىلدا كورگەن-بىلگەن، جەتكەن جەڭىستەر مەن جەتىستىكتەر جايىن وزىمشە ءبىر توپشىلاپ الىپ، قامشىنى ءبىر باسىپ الماسام، اۋىلداستارىم مەن قۇرداستارىمنىڭ شاڭىنا قالاتىنداي كورىنىپ، وسى جولعى تاڭداۋىمدى دۇرىس جاساعانىما ىشتەي ريزامىن. وسى ۋاقىتقا دەيىن قازاق ورتا مەكتەپتەرىن بىتىرگەن جاستارىمىز شەت تىلدەرىن (اعىلشىن) سەگىز كلاسستىق بازامەن، ال ورىس تىلىندە وقىپ بىتىرگەندەر ون كلاسستىق بازامەن بىتىرەتىندەرىن بايقاعانمىن. سوعان قاراماستان قوسىمشا ساباقتار الىپ، قازمۋ-دىڭ فيزيكا ونىڭ ىشىندە ارناۋلى (اعىلشىن تىلىندە ) بولىمشەسىنە تاپسىرىپ، العاشقى ەمتيحاننان ۇزدىك باعا العانىمداعى؛ فاكۋلتەتتىڭ دەكانى سارسەمبينوۆ قولىمدى قىسىپ «قۇتتىقتايمىن! سەن ەندى ءبىزدىڭ ستۋدەنتسىڭ» دەگەن كەزدەگى قۋانىشىم؛ ونىمەن تەزىرەك بولىسۋگە سىرتتا كۇتىپ تۇرعان «بولەلششيكتەردىڭ» اراسىنان دارحان باۋىرىمدى كوزبەن ىزدەپ، وڭ قولىمدى كوتەرىپ الىپ «ستۋدەنتپىن!» دەپ قۋانا قاۋىشقانىمىز؛ سودان ورتالىق پوشتاعا بارىپ اناشىم مەن اعالارىما تەلەفون شالىپ، قۋانىشىمىزبەن بولىسكەن كەزدەرىم كەشە عانا.
ءيا، ەندى بار ىنتا مەن جىگەردى ءبىلىم الۋعا جۇمساپ، اعىلشىن ءتىلىن بارىنشا تەز ارادا بويعا ءسىڭدىرۋ ماقساتى الدىمدا تۇر. ءبىر اي بويعى كۇيزەلىستىڭ ءبىر ساتتە ۇشىپ، زىم-زيا جوق بولىپ كەتكەنىنە، الگى جۇيكەمدى جەگىدەي جەگەن ءتۇستىڭ دە ويىمنان الىس كەتكەنىن جاقسىلىققا بالاپ، العا قويعان جوسپارلارىمدى «جاڭا جىلدان كەيىن باستايمىن» دەگەن سۋداي جاڭا «كۇندەلىك» بەتتەرىنە كوشىرتىپ، ساۋساعىمداعى قالامنىڭ قاعاز بەتىندە ويناقتاي شاپقانىن ەندى عانا بايقاعاندايمىن.
ءبىر ءسات «كۇندەلىكتەن» كوزىمدى الىپ، جان جاعىما قاراسام بەس پاتوك تا ءبىر ۇلكەن زالدا فيزيكادان لەكسيادا وتىر ەكەنبىز. جانىمداعى مەيىرجاننىڭ دا ءبىتىرىپ وتىرعانى شامالى سياقتى. لەكتوردىڭ وقىپ جاتقاندارىن قىسقارتا، قىستىرىپ، قالامىمەن سۇيكەپ قويىپ وتىر. وسىنداعى «فيزماتتى» بىتىرگەن، كولحوزعا پوميدور جيناۋعا بارعان كەزدە جاقىن تارتىپ، تانىسىپ كەتكەن بولاتىنبىز. جاستاردىڭ ىشىنەن ءىلىپ الار ءبىر كەرەمەت ازامات. وي ءورىسى، سويلەگەن ءسوزى مەن جۇرگەن ءجۇرىسى قۇرداستارىنان بولەكتەۋ، ەرەسەكتەۋ كورىنگەن. باتىس ءوڭىرى ورالدان، جىمپيتىنىڭ جىگىتى. ءوزى ورىسشاعا دا جۇيرىك، «سلۋجاكتارمەن»( وقۋعا ارميادان كەيىن، دايىندىق كۋرستارىنان تۇسكەن قىز بەن جىگىتتەردى سولاي اتايتىنبىز) دە ەمىن ەركىن سويلەسىپ، قالجىڭدى دا تىرىدەي سويىپ قويىپ وتىرا بەرەدى. انا جەردە جاقىن اعايىندى ەكى قىز، ءبىرى مەنىڭ بولىمىمدەگى ساعادات، ەكىنشىسى قازاق بولىمشەسىندە وقيتىن سالتانات، تالدىقورعان جاقتىڭ قىزدارى. تاناۋى ۇلبىرەپ، كوزى بوتاداي، اۋماعان كيىكتىڭ لاعى دەرسىڭ. الدىڭعى جاقتا بويى پارتادان ارەڭ كورىنىپ تالعات قوشتىبايەۆ وتىر. سول باۋىرىمدى كورسەم بولدى مەنىڭ العاش مەكتەپتى بىتىرگەن جىلى كازپتيدا اۆتوماتيكا جانە باسقارۋ جۇيەلەرى فاكۋلتەتىندە وقۋدا جۇرگەنىم ەسىمە ءتۇسىپ كەتە بەرەدى. بويىمنىڭ كىپ-كىشكەنتاي بولعانىنا قاراماي جاستارى ۇلكەن كۋرستاستارىمنىڭ ورتاسىنداعى قىلىقتارىم ەرىكسىز ەسىمە تۇسەدى. ساباقتان قاشىپ «بايقوڭىر» كينوتەاترى مەن جانىنداعى بازارى، ءسال ەرتەرەكتەگى ستۋدەنتتىك ءومىرىمدى ەسكە سالعانداي. انە انا جەردە تانىسقانىمىزعا از بولسا دا، باياعىدان ءبىر ءبىرىمىزدى تانيتىنداي بولىپ كەتكەن سلۋجاكتار – سەرىك شۇقشا مەن قايرات ، نۇرلىبەك (قىزىلوردالىقتار مەن شىمكەنتتىك جىگىتتەر)، ءسال ارىرەك ءجۇرسىن مەن بويى شوشايىپ سراجيدين وتىر بىردەڭەلەرىن شيمايلاپ قويىپ.
بايقاپ قاراساڭ كىلەڭ قازاق ءبولىمىنىڭ جاس قىزدارىن ءبىرى جوعارىدان، بىرلەرى بۇيىرلەرىنەن قونجيا ءبىر نارسەدەن قورعارداي وتىرىپ العان. الدىدا كىلەڭ جاستار. مىنا جاق شەتتە الماتىلىق «گورودسكوي» رۋستەم باۋىرىم دا قالاتىن ەمەس، قايرات وتىر قولدارىن شوشايتىپ، بىردەڭەسىن سىبىرلاپ، جىبىرلاپ قويىپ. بويى ەكى مەترگە جۋىق گيتيستى ىزدەمەسەڭ دە وڭاي تاۋىپ الۋعا بولادى. شاشىنا ەرەكشە ەرتە اق كىرگەن ەربولات باۋىرىم وتىر، اۋزىن ءشۇرتيتىپ الىپ بىردەڭەسىن ءتۇسىندىرىپ الەك. جەرلەس قارىنداستارىم روزا مەن جاينا دا جايعاسىپتى. كوكشەنىڭ ارۋى بايان وتىر مايىسىپ، جامبىلدىڭ تۇرسىنگ ۇلى دە وسىندا. مەدەت، قاھار، ءالىمجان، سەرىگىڭ دە جانتايا جارتىلاي جاتىپ العان. الماتى قالاسىنا ارمان قۋىپ كەلگەن جاستاردىڭ ءبىر كۇنگى جاعدايى قىسقاشا وسىلاي ءوتىپ جاتقان ەدى.
ءيا، سول جەلتوقساننىڭ 16 – سەيسەنبى كۇنى بولاتىن. تۇستەن كەيىن، «كرەمل دىنمۇحامەد احمەت ۇلى قونايەۆتى الىپ تاستاپتى، ونىڭ ورنىنا بىزگە تانىس ەمەس كولبين دەگەن بىرەۋدى قويىپتى، پلەنۋم 16-اق مينۋت بولىپتى»، - دەگەن سۋىت حابار كەلىپ جەتتى...
(جالعاسى بار)
