جەر پايدالانۋ تۋرالى زاڭ الداعى ۋاقىتتا وزگەرۋى مۇمكىن. بۇل تۋرالى KTK ارناسى حابارلادى.

اۋىل شارۋاشىلىعى مينيسترلىگى ماراتوريي جاريالانعان جەر كودەكسىنەن بولەك، جاڭا زاڭ جوباسىن ازىرلەپ جاتىر.

«ءبىر قولعا شەكتەۋ قويىپ وتىرمىز. بۇرىن ءبىر قولعا شەكتەۋ تەك قانا جەكەگە ساتىلعاندا عانا بولاتىن. ال ەندى ەگەردە جالعا الاتىن بولساڭ، بۇل جەردە دە ءبىر قولعا شەكتەۋ ايتىلعالى وتىر. بۇل دا العاش رەت قابىلدانعالى وتىرعان نورمالاردىڭ ءبىرى»، - دەپ مالىمدەدى مينيستر.

مىرزاحمەتوۆ مالىمدەگەندەي، جەردى پايدالانۋشىعا دا تالاپ ەكى ەسەگە كۇشەيەدى. القاپتاردى جالعا بەرمەس بۇرىن رەسپۋبليكالىق بايقاۋ جاريالانادى. جانە فەرمەردەن الدىن الا بيزنەس جوسپار تالاپ ەتىلمەك. ياعني، كاسىپكەر جالعا العان جەرگە نە ەگەتىنىن كۇنى بۇرىن كورسەتۋى كەرەك.

مىرزاحمەتوۆ «جەر» تۋرالى جاڭا زاڭ جوباسىن جاقىن كۇندەرى پارلامەنتكە تانىستىرماقشى. بۇدان بولەك، اۋىل شارۋاشىلىعى ءمينيسترى ءقازىر قولدانىستاعى 24 ميلليون گەكتار القاپتاعى بيدايدىڭ كولەمىن قىسقارتىپ، ورنىنا جەم-شوپتى ارتتىرماق. ويتكەنى، ەلىمىزدە مالعا ازىق جەتپەي جاتىر ەكەن. سونداي-اق دەپۋتاتتار ەسەپ بەرۋگە كەلگەن مىرزاحمەتوۆتەن سۋبسيديانىڭ دا ناتيجەسىن سۇرادى. سوڭعى ءۇش جىلدا اۋىل شارۋاشىلىعىنا بولىنگەن سۋبسيديا 500 ميلليارد تەڭگەدەن اسىپتى. ءبىراق قىرۋار قارجى ءتيىمدى يگەرىلمەي جاتىر. ماجىلىسمەندەر جىل سايىن قىرىلىپ جاتقان مال مەن كيىكتىڭ سانىنا دا الاڭداۋلى.  باقتىقوجا ىزمۇحامبەتوۆ «كيىكتەردىڭ ولگەن جەرىندە مال نەگە ولمەدى؟ پاستەرەلەز بىرنەشە جىلدان بەرى بەلگىلى، ونداي اۋرۋ بار ەكەنى. وعان قارسى شارا قابىلداپ جاتىرمىز، دەپ ءبىر ايتىلۋ كەرەك قوي. ءبىر دە ءبىر نارسە ەستىگەن جوقپىز»، دەپ، مينيسترلىكتەن ناقتى جاۋاپ تالاپ ەتتى.