«زاڭدى نەكە»، «ازاماتتىق نەكە»، «شاريعات بويىنشا نەكە» دەگەن سياقتى نەكەنىڭ ءتۇرلى-تۇرلى اتاۋلارىن ەستۋشى ەدىك. ەندى اجىراسۋدىڭ دا تۇرلەرى شىعا باستاپتى ،-دەپ جازادى zamana.kz. 

ءبىز ەستىگەن اجىراسۋدىڭ بۇل ءتۇرى «ەۆروپەيسكيي رازۆود» دەپ اتالادى ەكەن. ياعني ەرلى-زايىپتىلار اجىراسىپ كەتسە دە بالالاردىڭ كوڭىلىنە دىق تۇسپەس ءۇشىن ءبىر شاڭىراقتىڭ استىندا تۇرا بەرەدى.
مەنىمەن تۇيدەي قۇرداس قۇداشام بار ەدى. ەكەۋمىز جاقىن ارالاسىپ، سىرلاس-مۇڭداس بولىپ جۇردىك. ول ءوزىنىڭ سۇيگەن جىگىتىنە كۇيەۋگە شىعىپ، ءتورت بالالى بولدى. ءتورتىنشىسىن بوسانعاننان كەيىن كۇيەۋىمەن ەكەۋىنىڭ اراسى سالقىنداپ كەتكەنىن ايتىپ جۇرەتىن. ءبىراق ونىڭ سوڭى اجىراسۋعا سوقتىرادى دەپ ويلاماپپىن. كەزدەسكەن سايىن كۇيەۋىنىڭ ۇيگە كەشىگىپ كەلەتىن ادەت تاپقانىن، وزىنە كوڭىل بولمەيتىنىن، بالالاردىڭ شۋىلىن دا جاقتىرماي بارا جاتقانىن ايتاتىن. مەن ونى  وتباسىنداعى ۇساق-تۇيەك جاي اڭگىمەگە جاتقىزاتىنمىن. سويتسەم ەكەۋىنىڭ سەزىمدەرى مۇلدەم سۋىپ كەتكەن بە، اقىرىندا سوتقا ارىز جازىپ، زاڭدى تۇردە اجىراسىپ تىنىپتى.
ءبىراق بالالاردىڭ قامىن ويلاپ، ءبىر شاڭىراقتىڭ استىندا تۇرۋدى ۇيعارىپتى. قۇداشام: «مۇنى «ەۆروپەيسكيي» اجىراسۋ دەيدى. ولار بىزگە قاراعاندا اقىلدى عوي. وزدەرىن ەمەس، بالالارىنىڭ باقىتىن ءبىرىنشى ورىنعا قويادى»، – دەدى وزدەرىنىڭ وسى شەشىمىنىڭ دۇرىستىعىن دالەلدەگەندەي بولىپ. «بىرگە تۇراتىن بولساڭدار، بىر-بىرىڭنەن ۇزاقتاپ كەتپەسەڭدەر، نەسىنە اجىراستىڭدار؟»، – دەگەنىمە ول: «ءبىر ۇيدە تۇرعانىمىزبەن، بىرگە تاماقتانبايمىز. مەن بالالارىممەن تاماقتانامىن. ول ءبىز ءىشىپ بولعان سوڭ وزىنە اس ازىرلەيدى. ماعان سويلەمەيدى، ءبىراق بالالارىمەن قارىم-قاتىناسى بۇرىنعىداي. مەن ونىڭ كىر-قوڭىن جۋىپ، جاعدايىن جاسامايمىن، ەركىن، ازات ايەلمىن»، – دەدى.
مەن ويلانىپ قالدىم. سەبەبى بالا كوڭىلى وتە سەزىمتال كەلەدى. ولار  اكە-شەشەسىنىڭ اراسىنداعى سالقىندىقتى بىردەن  بىلەدى. ءتىپتى ولاردىڭ ءبىر داستارحاننان تاماق ىشپەگەندەرى، سويلەسپەگەندەرىنىڭ وزدەرى بالانىڭ جانىنا اۋىر سالماق ەمەس پە؟ سوندا ولار كىمدى الداپ ءجۇر؟
 

اۆتورى: ق. جارماعامبەتوۆا