كەشە سايتىمىزدا قازاقستانعا كىرە الماعان جاڭا زەلانديالىق ساياحاتشى جايلى رەسەيلىك باق-تاعى اقپاراتتى بەرگەن بولاتىنبىز. ولار شەكارا قىزمەتكەرلەرىن ءبىلىمسىز دەپ ايىپتاعان ەدى. بۇگىن سول ماسەلەگە بايلانىستى بىرنەشە اقپارات جاريالاندى. سولاردىڭ ءبىرى Tengrinews.kz.  سايتىندا جاريالانعان شەكارا قىزمەتكەرلەرىنىڭ تۇسىنىگى بولىپ وتىر.  

الماتى اۋەجايىندا بىلىمسىزدىكتىڭ كەسىرىنەن بولدى دەگەن ساياحاتشى قىزدىڭ داۋلى ماسەلەسىنە ق ر شەكارا قىزمەتكەرلەرى تۇسىنىك بەردى. ولار بولعان وقيعانى بوس ءسوز دەگەن.

قازاقستان ەلىنە كىرە الماعان جاڭا زەلانديالىق تۋريست جايلى جاڭالىق بارلىق الەۋمەتتىك جەلىلەرىمەن ب ا ق قۇرالدارىن دۇرلىكتىرگەن بولاتىن. ساياحاتشى حلوي فيلليپس-حارييس شەكارا كۇزەتشىلەرى جاڭا زەلانديانىڭ جەكە مەملەكەت ەكەنىن بىلمەيدى جانە مەنەن اۆستراليانىڭ جەكە كۋالىگىن سۇرادى دەپ سەندىرگەن-مىس. ول شەتەلدىك ب ا ق وكىلدەرىنە «مەن جەرگە قونا سالا كوشى-قون قىزمەتكەرلەرى مەنەن اۆستراليالىق جەكە كۋالىگىمدى سۇرادى. ونسىز مەنى ەلگە كىرگىزبەيتىندەرىن ايتتى. جاڭا زەلانديا اۆستراليا ەلىنىڭ ءبىر بولىگى دەدى» دەگەن بولاتىن.

ءبىراق، ق ر شەكارا قىزمەتكەرلەرى بولعان جايتتىڭ باسقا نۇسقاسىن كەلتىردى. باسپا ءسوز قىزمەتكەرلەرىنىڭ ايتۋى بويىنشا، قىزدا ۆيزا بولماعان. حلوي فيلليپس-حارريس قازاقستانعا 2016 جىلدىڭ 24 مامىر ايىندا سZ-6011 رەيسىمەن ءۇرىمجى-الماتى باعىتىندا كەلگەن.  

"الماتى اۋەجايىنداعى باقىلاۋ كەزىندە ول جاڭا زەلانديالىق پاسپورتىن كورسەتتى، ءبىراق وندا قازاقستاننىڭ ۆيزاسى بولمادى. ارينە، حالىقارالىق جانە ۇلتتىق زاڭ تالاپتارىندا جاڭا زەلانديالىقتار ءۇشىن كىرۋ ۆيزاسى بولماسا ەشتەڭە ەتپەيدى دەگەن ەرەجە جوق. وسىعان بايلانىستى ساياحاتشى حلوي فيلليپس-حارريس قازاقستان ەلىنە كىرە المادى. ال، جاڭا زەلانديانى بىلمەۋ تۋرالى ەشتەڭە بولعان جوق"، - دەدى باسپا ءسوز قىزمەتشىلەرى.

سونداي-اق، ەلگە كىرە الماعان جاعدايدا ول ادام اۋە كومپانياسى ارقىلى كەرى باعىتتا جەر اۋدارىلادى. سول سەبەپتى، ونى ءالماتى-ۇرىمجى باعىتىندا قايتارۋ زاڭدى بولعان ەكەن.  

سونداي-اق، اۋە كومپانياسى ءتيىستى قۇجاتى دۇرىس بولماي، ەلگە كىرە الماي قالعان ادامداردىڭ بارلىق شىعىندارىنا وزدەرى جاۋاپتى ەكەن. ياعني، تۇسىنىكسىز جاي بولعان ۋاقىتتان باستاپ بار ماسەلە سولاردىڭ جاۋاپكەرشىلىگىندە.  

باسپا ءسوز قىزمەتىنىڭ ايتۋىنشا الماتى حالىقارالىق اۋەجايىنىڭ كونسۋلدىق بەكەتىنىڭ كەزەكشى قىزمەتكەرلەرى وعان قازاقستاندىق ۆيزا بەرگەن. اتالعان جىلدىڭ 6 ماۋسىمىندا ساياحاتشى ەلدەن كەتكەن.