حرومتاۋ اۋدانى بوگەتساي اۋىلىنىڭ تۇرعىندارىمەن كەزدەسۋىندە اقتوبە وبلىسىنىڭ اكىمى بەردىبەك ساپاربايەۆ باسەكەلەستىككە توتەپ بەرۋدىڭ جولى ەت، ءسۇت، نان جانە تاعى باسقا ونىمدەردىڭ ءوندىرىس كولەمىن ارتتىرۋ ەكەنىن اتاپ ءوتتى.
«نارىققا بايلانىستى باعانى جوعارىلاتپاۋدىڭ ءبىر-اق جولى بار. ول — باسەكەلەستىكتى دامىتۋ. ەتتى كوبىرەك شىعارۋىمىز كەرەك، ءسۇت پەن ناندى كوپ شىعارۋ كەرەك. اۋىل ماڭىنان اعىپ جاتقان ور وزەنىن دە ءتيىمدى پايدالانۋىمىز كەرەك. جان-جاعىنا كوكونىس، داقىلدار ەگۋ كەرەك. ءوزىمىزدىڭ ءونىمدى كوبەيتۋ كەرەك»، — دەدى وبلىس باسشىسى.
وڭىردە قانت پەن شايدى عانا ءوندىرۋ مۇمكىن ەمەستىگىن ايتقان بەردىبەك ساپاربايەۆ وزگە ونىمدەردى شىعارۋعا بولاتىنىن جەتكىزدى.
«وكىنىشكە قاراي، سوڭعى كەزدە بارلىعىمىز دايىن زاتقا جۇگىرەمىز. اۋىلدا تۇرىپ نان ساتىپ العان، ەت پەن ءسۇت، جۇمىرتقا ساتىپ العان دۇرىس ەمەس، اۋىل تۇرعىندارىندا مۇنىڭ بارلىعى بولۋى كەرەك قوي. جەڭگەلەرىمىز، كەلىندەرىمىز، قىزدارىمىز ەرىنشەك بولىپ بارا جاتىر. ارينە، جاعداي جاقسارعاندىقتان بولار. دەگەنمەن، ءوزىمىزدى ءوزىمىز وسىنداي ونىمدەرمەن قامتاماسىز ەتە ءبىلۋىمىز كەرەك»، — دەدى وبلىس باسشىسى.
ونىڭ ايتۋىنشا، تابيعي تازا ءونىم دەنساۋلىققا دا پايدالى.
«اۋىل بالالارى بۇرىن نەگە اۋىرمادى؟ جوتەل دەگەندى بىلمەي ءوستى. ويتكەنى، بارلىعى تازا تاماق بولاتىن. جالاڭاياق، جالاڭباس جۇگىرىپ جۇرەتىن. قۇمنىڭ ۇستىندە وينايتىن»، — دەدى ساپاربايەۆ.
دەرەك كوزى: Baq.kz
