رەسەيدىڭ مادەنيەت ءمينيسترى ۆلاديمير مەدينسكيي پارتيزان ايەل زويا كوسمودەميانسكايا جانە 28 باتىر پانفيلوۆشىلاردى «اۋليەلەرىمىز» دەپ اتادى. ونىڭ سوزىنشە ولارعا اۋليەلەردىڭ ومىرىنە  قاراعانداي قاراۋ كەرەك ەكەن.  اتالعان باتىرلاردىڭ ومىرىنە كۇدىكپەن قاراعاندار توزاق وتىندا جاناتىن بولادى دەپ ۋادە بەردى مينيستر، دەپ جازادى BBCء-دىڭ ورىس قىزمەتى.

كسرو باتىرى زويا كوسمودەميانسكايا 1941 جىلى 29 قاراشا ايىندا نەمىستەردىڭ قولىنان قازا تاپقان. ول جايلى تاماشا فيلم تۇسىرۋگە بولادى دەيدى مينيستر.

«قاتارداعى جاۋىنگەر راياندى قۇتقارۋ» بار دا بارلاۋشى كوسمودەميانسكايانى قۇتقارۋعا ەشكىمنىڭ قۇلقى جوق. تۇسىنىكتى تىلمەن ءومىر بايانىن ايتاتىن «زوياعا دەگەن قۇشتارلىق» اتتى كينو تۇسىرۋگە بولادى دەپ ۇسىنىس تا تاستاعان.

رەجيسسەر كيم درۋجينين مەن اندرەي شالوپا مادەنيەت ءمينيسترىنىڭ قولداۋىمەن «28 پانفيلوۆشىلار» اتتى كينو تۇسىرگەن. ءفيلمنىڭ تۇساۋكەسەرى 16 قاراشادا وتكەن. فيلم بيۋدجەتىنىڭ – 33 ملن ءرۋبلى (فيلمگە جۇمسالعان قارجىنىڭ جارتىسى) كراۋدفاندينگ تاسىلىمەن جينالعان ەكەن

مينيستر «زويا كوسمودەميانسكايا جانە باتىر-پانفيلوۆشىلار ءبىز ءۇشىن ءومىرىن قيعان باسقا دا بابالارىمىز سياقتى باتىرلارىمىز»،- دەپ سەنەدى.  

مينيستر سونداي-اق، 28 باتىر پانفيلوۆشىلار جايلى تاريح باسىنان اياعىنا دەيىن ويدان شىعارىلسا دا «ول ەشكىم تيىسۋگە بولمايتىن قاسيەتتى اڭىز» دەپ باسا ايتقان. ال، تيسەتىندەر ناعىز وڭباعان ادامدار دەيدى