تاۋەلسىزدىكتىڭ 25 جىلدىعىنا وراي 3-4 جەلتوقسان كۇندەرى الماتىدا «التىن دومبىرا» اتتى الامان ايتىس ءوتتى. ونىڭ باس جۇلدەسىن قىزىلوردالىق ايتىسكەر اقىن مۇحتار نيازوۆ جەڭىپ العان بولاتىن.
بۇل قۇرمەتتى اتاققا ول 2012 جىلى دا قول جەتكىزگەن ەدى. اراعا ءتورت جىل سالىپ، ەكىنشى مارتە «التىن دومبىرا» يەگەرى اتانىپ وتىر. بۇگىن ايتىس الامانىنىڭ جەڭىمپازىنا ارنايى قوڭىراۋ شالىپ، جەڭىسىمەن قۇتتىقتاپ، ايتىس توڭىرەگىندە اڭگىمە وربىتتىك.
- مۇحتار، ەكىنشى رەت جەڭىپ العان «التىن دومبىراڭ» قۇتتى بولسىن...
- راحمەت!
- جالپى ايتىس قالاي ءوتتى؟ ۇيىمداستىرۋ دەڭگەيى كوڭىلىڭىزدەن شىقتى ما؟ -
جالپى ايتىس وتە جوعارى دەڭگەيدە ءوتتى. ۇيىمداستىرۋى دا ءبىز ويلاعاننان الدەقايدا جوعارى بولدى دەپ نىق سەنىممەن ايتا الامىن. سەبەبى، بۇل ايتىس بۇرىنعىدان وزگەرەك ەدى. سوندىقتان الماتى قالاسىنىڭ اكىمدىگى تىكەلەي وزدەرى باقىلاۋىنا الدى. قالا اكىمى باۋىرجان بايبەك مىرزا ءوزى جەتەكشىلىك ەتىپ، ءتول ونەرىمىزدى الماتى تورىنە كوتەرگەنى ءۇشىن العىستان باسقا ايتارىم جوق. جالپى اقىندار ەركەلەۋ «حالىق» قوي. بۇل ايتىسقا ءار وبلىستان 20 اقىن كەلدى. بارلىعىن قوناقۇيمەن قامتىپ، اس-سۋىنا دەيىن بەرىپ، ەركەلىكتەرىن كوتەرىپ، ەشكىمدى رەنجىتپەي جىبەردى دەپ ويلايمىن.
- «بۇل ايتىس بۇرىنعىدان وزگەرەك» دەپ ايتىپ قالدىڭىز. نەسىمەن ەرەكشەلەندى؟ -
وزگەرەك دەپ ايتىستىڭ قامتىعان تاقىرىبىن ايتىپ وتىرمىن. بىرىنشىدەن بۇل ايتىس تاۋەلسىزدىكتىڭ 25 جىلدىق مەرەيتويىنا، ەكىنشىدەن وڭتۇستىك استانامىز الماتىنىڭ 1000 جىلدىعىمەن تۇسپا-تۇس كەلىپ وتىر. سونىمەن قاتار، جاڭا جىل وتىسىمەن الاتاۋ بوكتەرىندە وتەتىن دۇنيەجۇزىلىك ستۋدەنتتەر ويىنىن دا جىرىمىزعا ارقاۋ ەتتىك.
- ال وسى تاقىرىپتاردى ارىپتەستەرىڭىز جەرىنە جەتكىزىپ جىرلاي الدى ما؟
- جەتكىزدى دەپ ويلايمىن. سەبەبى، اقىنداردىڭ ايتىسىنا الاتاۋ بوكتەرىندە قول سوقپاعان ەشكىم قالماعانداي كورىندى. ايتىستىڭ العاشقى كۇنىنەن باستاپ، ەرشاتتىڭ ۇتىمدى سوزدەرى، ارقانىڭ سىرباز سەرىسى ماقسات اقانوۆ پەن سەمەيلىك ارۋ اسەم ەرەجە قىزىنىڭ «قىز بەن جىگىت» ايتىسى، ورالدىق جانسايا مۋسينا مەن الماتىلىق شۇعايىپ سەزىمحاننىڭ ءسوز سايىستارى، الماتىلىق رۇستەم قايىرتاي مەن ارقادان كەلگەن ءومىرجان كوپبوسىنوۆ، استانالىق ەركەبۇلان قاينازاروۆ، پاۆلودارلىق جاس پەرى اسپانبەك شۇعاتاي مەن الماتىلىق بولاتبەك ورازبايەۆ جانە باسقا دا ارىپتەستەرىمىز اتالعان تاقىرىپتار توڭىرەگىندە تۇيدەك-تۇيدەك جىرلارىمەن ەلدى ءتانتى ەتتى. ەكى كۇندىك تارتىستى وتكەن ايتىستىڭ ناتيجەسىندە قازىلار مەنى جەڭىمپاز دەپ تانىپ، باس جۇلدەنى بەردى.
- جىل سايىن وسى «التىن دومبىرا» ايتىسىندا جەڭىمپاز بولعان اقىنعا كورەرمەندەر تاراپىنان كوپتەگەن پىكىرلەر ايتىلىپ جاتادى. نەگە؟
- بۇل حالىقتىڭ ايتىسقا دەگەن جاناشىرلىعى بولار. كەيدە وسىنداي تالقىلاۋلار دا كەرەك شىعار دەپ ويلايمىن. باياعىدا ءبىر انادان بىرەۋ: «قاي بالاڭىزدى جاقسى كورەسىز»، دەپ سۇراپتى. سوندا الگى انا: «جازىلىپ كەتكەنشە، اۋرۋحاناداعى بالامدى، ۇيگە جەتكەنشە، جولداعى بالامدى جاقسى كورەم» دەپتى. سول سياقتى ەگەر «التىن دومبىرانى» مەنەن باسقا بىرەۋ السا، «مۇحتار» دەپ شۋلاۋى مۇمكىن. ول جەردە قانشا حالىق كورەرمەن بولسا، سونشا كوزقاراس، سونشا پىكىر بولادى. ءقازىر الەۋمەتتىك جەلىلەر «قايناپ» جاتقانىن كورىپ جاتىرمىن. مەن ەشكىمگە رەنجىمەيمىن. اركىم نە ايتقىسى كەلەدى؟ سونى ايتا بەرسىن.
- جۇلدە تاپسىرعاندا حالىق «بولاتبەك ورازبايەۆ» دەپ شۋلادى. حالىققا الماتى اكىمى باۋىرجان بايبەك باسۋ ايتىپ، سابىرعا شاقىردى. وسى كەزدە ءسىز قانداي كوڭىل كۇيدە بولدىڭىز؟
- مەنىڭ «التىن دومبىرانى» الۋىم كەزدەيسوقتىق ەمەس. مەن وسى جىلدىڭ باسىنان بەرى تاشكەنتتە، قىزىلوردادا وتكەن حالىقارالىق ايتىستاردان باس جۇلدەنى ەنشىلەدىم. اتىراۋدا، اقتوبەدە دە رەسپۋبليكالىق ايتىستاردان جەڭىمپاز اتانىپ، بيىلعى اقىنداردىڭ رەيتنيگىندە ءبىرىنشى ورىندا تۇرمىن. وسىعان دەيىن ناتيجەسىز كەلىپ، اياقاستىنان «التىن دومبىرانى» الدەبىرەۋلەردىڭ ىقپالىمەن الىپ كەتە سالعان جوقپىن. سوندىقتان، ساحنادا ايعاي-شۋ بولىپ جاتسا دا وزىمە سەنىمدى، جوعارى كوڭىل كۇيدە بولدىم. حالىقتىڭ شۋ كوتەرۋىنەن تۇسىنگەنىم، بولاتبەك الماتىنىڭ تۋماسى بولعاندىقتان، وزدەرىنىڭ ىشكى سەزىمىندە «التىن دومبىرانى» الماتىدا الىپ قالامىز دەپ، ونىڭ يەسىن الدىن-الا وزدەرى بەلگىلەپ قويۋۋىنان دەپ ويلايمىن.
- تورەشىلەر دۇرىس شەشىم جاسادى دەپ ويلايسىز عوي...
- ەكى كۇندىك جىر سايىسىندا ايتىستىڭ ءوز وكىلدەرى تورەلىك ەتتى. ولاردىڭ اراسىندا قويلىباي اسانوۆ، قونىسباي ءابىل، امانجول التايەۆ، مۇحامەدجان تازابەكوۆ، داۋلەتكەرەي كاپ ۇلى، باۋىرجان حاليوللا بار. ءادىلقازىلار القاسىنىڭ ءتوراعاسى - بەلگىلى اقىن، «الاش» سىيلىعىنىڭ يەگەرى ادىلبەك ىبىرايىم ۇلى. بۇل كىسىلەر ءسوزدىڭ ءقادىرىن بىلەتىن، ولەڭنىڭ ورەسىن تۇسىنەتىن بەلگىلى تۇلعالار. ءار اقىننىڭ اۋىزىنان شىققان ءار جىر جولىن كوڭىلدەرىنە ءتۇيىپ، سانالارىنا سالىپ، ساراپتاپ بارىپ، شەشىم شىعاردى دەپ ويلايمىن. سوندىقتان ءوز باسىم تورەشىلەرگە ايتار ءۋاجىم جوق.
- ايتىسقا دەيىن بيىل ەكىنشى رەت «التىن دومبىرانى» جەڭىپ الام دەگەن الدىڭىزعا ماقسات قويدىڭىز با؟ -
ارينە، ادامدا ماقسات بولۋ كەرەك. ەندى وسى «التىن دومبىرانى» ءۇشىنشى رەت جەڭىپ السام دەگەن وي دا جوق ەمەس.
- اڭگىمەڭىزگە كوپ راحمەت!
سۇحباتتاسقان نۇرسۇلتان وتارباي
