جاقىندا 31 تەلەارناسىنان «ۇيات ەمەس» باعدارلاماسى قالىڭ كوپشىلىككە جول تارتتى. بۇل باعدارلاما بەلگىلى ادامداردىڭ بەلگىسىز قىرلارى، جاسىرىن سىرلارى، وسى ۋاقىتقا دەيىن ەلگە ايتىلماعان قۇپيالارى جايلى سىر شەرتەدى. «ۇيات ەمەس» باعدارلاماسىن ۇياتسىزدىققا بالاعان مۇرات الماسبەك ۇلى فەيسبۋك پاراقشاسىندا مىناداي سىني-پىكىر جازىپ قالدىرىپتى:

"ۇيات ەمەس" دەگەن مىجىعان باعدارلاما شىعىپتى. "ۇيات بولادى" دەگەن باعدارلاما نەگە شىقپايدى ونىڭ ورنىنا؟ ەل الدىندا جۇرگەن ادامداردى ستۋدياعا شاقىرىپ الىپ، «ۇيات ەمەس» دەپ، سۋىرىلا، سۇعاناقتانا سۇراق قويىپ، ولاردىڭ ەڭ ءبىر وكىنىشتى، جۇرەك اۋىرتار ساتتەرىن، ولاردىڭ ومىرىندەگى جارقىن ءساتىن، ەڭ ءبىر جۇرەك تەربەر، وزگەگە ۇلگى بولار، جاقسى كوڭىل-كۇي سىيلار جايلارىن نەگە ايتقىزبايدى؟

اناۋ «اتاقتى ادام، ايگىلى جۇلدىز» دەگەندەردىڭ بايىنان تاياق جەگەنى، كۇيەۋىنىڭ كوزىنە ءشوپ سالعانى، نەمەسە جاعدايى جوق بولىپ قالعان كەزدەرى، كۇيەۋىنىڭ توقال الىپ العانى ت.ب. كىمگە قىزىق، كىمگە تاڭسىق. جانە ونى بىلايعى جۇرتتىڭ ءبارى جاناشىرلىقپەن تىڭداپ، سودان ساباق الادى دەۋ... كوبى سونى قىزىل وسەك رەتىندە تىڭداپ، ايىزى قانىپ، ەرتەڭ بىرەۋگە وسەكتەۋگە اسىعىپ، جايى كەلسە انانى تابالاپ، كۇلىپ وتىرارى انىق. «جامان سىرىن ايتامىن دەپ شىنىن ايتىپتى» دەگەن ءسوز بار. تەلەارنالاردىڭ اينالدىراتىنى سول بەس ءانشى. ءارقايسىسى ءارتۇرلى ايدار اشىپ، ات تاعىپ سولاردىڭ ىشەك-قارنىنا دەيىن اقتارۋعا عانا ماماندانعانداي. باسقا قولدان كەلەر ساۋاتتى دۇنيەسى جوق بولعان سوڭ رەيتينگ جيناۋدىڭ ارزان، وزدەرى ءۇشىن «ۇيات ەمەس» جولىن قۋماعاندا ءقايتسىن. اۋديتوريا دا وسىنداي باعدارلامالارعا ابدەن بايلانىپ، ەسى-دەرتى اۋىپ قالعان. ەندى نە ىستەسىن، ولاردىڭ ساناسىن دا جەڭىلتەك قىز، كوڭىلشەك كەلىنشەكتىڭ مىنەزىندەي قىزىل-جاسىلعا، سىلدىر-سۇيىققا ابدەن بەيىمدەپ تاستاسا.

قازاق سوناۋ اتا-باباسىنان بەرى "ۇيات بولادى" دەگەن سوزبەن جاساپ كەلەدى. سول ۇيات بولادى تالاي ۇياتتى ىستەردەن ساقتادى. ءوزىمىز دە سول «ۇيات بولادى» دەگەن حالىقتىق مورال كودەكسىمەن كەلەمىز. جامان بولعان جەرىمىز جوق. «الەمدە ۇياتتان سۇلۋ نارسە جوق» دەيدى سوكرات. ءانشى، جۇلدىزدار دا ادام. بىرەۋدىڭ وتباسىلىق ماسەلەسىن، جان كۇيىنىسىن حالىقتىڭ الدىندا ايتقىزىپ، ونى «ۇيات ەمەس» دەپ ۇرلەپ دابىرايتۋ ۇياتسىزدىقتىڭ ناق ءوزى. ۇيات ەمەس دەگەندى ساناعا سىڭىرگەنشە، ۇيات بولادى دەگەن ۇعىمدى ۇيالاتۋعا نەگە تىرىسپايمىز؟! ونسىز دا ۇياتى جۇقارىپ، ءتانى مەن جانى جالاڭاشتانىپ بارا جاتقان قوعامدا ۇيات ەمەس دەگەن جارناما جاساۋ – ۇلكەن ۇيات".

بۇل پىكىرگە فەيسبۋك قولدانۋشىلارى «وتە ورىندى جازىلعان»، «جاماننان كەسەپات ... دەگەن قازاق "مال قۇلاعى ساڭىراۋ" دەپ كورگەن اۋىرتپاشىلىعىنا شۇكىر ەتىپ، جاماندى جالپاق جۇرتقا جايماۋشى ەدى...» سىندى پىكىرلەر قالدىرعان.