اقش-تىڭ جاڭادان سايلانعان پرەزيدەنتى دونالد ترامپ «نومەرى ءبىرىنشى بورتتىڭ» قۇرىلىسىنا كوپ شىعىن كەتەتىندىكتەن، Boeing كومپانياسىمەن كەلىسىمشارتتى بۇزۋعا ۇگىتتەدى. بۇل تۋرالى BBCء-دىڭ ورىس قىزمەتى حابارلادى. 

«Boeing كەلەسى پرەزيدەنتتەرگە 747 Air Force One ۇشاعى قۇراستىرىلۋ ۇستىندە، ءبىراق وعان كەتكەن شىعىن كولەمى ءتورت ميلليارد دوللاردى قۇرايدى»، – دەپ جازدى ترامپ ءوزىنىڭ «تۆيتتەرىندە».

Boeing كومپانياسى Boeing لاينەرىنىڭ نەگىزىندە 2016 جىلدىڭ قاڭتارىندا الداعى ۋاقىتتاعى پرەزيدەنتتەرگە ارنالعان ۇشاققا كەلىسىمشارت جاساسقان بولاتىن.

ازىرشە تاپسىرىس ەڭ العاشقى ساتىسىندا تۇر. پرەزيدەنتتىك جاڭا ۇشاقتار 2024 جىلى پايدالانۋعا بەرىلەدى دەپ كۇتىلۋدە. قازىرگى ۋاقىتتا جاڭا ۇشاقتىڭ وڭدەلۋىنە 170 ملن دوللار اۋدارىلعان.

اقش-تىڭ وتپەلى اكىمشىلىك وكىلدەرى جۋرناليستەرگە بەرگەن سۇحباتىندا: «ترامپتىڭ Boeing كورپوراسياسىمەن كەلىسىمشارتتى بۇزۋى سالىققا تولەنەتىن اقشانى ۇنەمدەۋمەن بايلانىستى»  دەپ وتىر.

اقش-تىڭ قارجى باقىلاۋ باسقارماسى: «ۇشاق وندىسىنە كەتكەن جالپى سومما 3،2 ملرد دوللاردى قۇرايدى، ءبىراق ۇشاقتار جوبالاۋدىڭ تەك الدى ساتىسىندا تۇرعاندىقتان، بۇل سومما ءالى دە ءوسۋى مۇمكىن»، – دەيدى.

«پرەزيدەنتتىك ۇشاق – اقش-تىڭ ەڭ كورنەكتى سيمۆولدارىنىڭ ءبىرى. Boeing 747-8 – ەلىمىزدەگى بارلىق تالاپتارعا ساي كەلەتىن، ەلباسشىنىڭ جۇمىسىن قامتاماسىز ەتەتىن، ەلىمىزدە وندىرىلەتىن بىردەن-بىر كورپوراسيا»، – دەدى اقش-تىڭ ااك ءمينيسترى دەبورا لي دجەيمس.

ءقازىر قولدانىلىپ جۇرگەن پرەزيدەنتتىك ۇشاقتى 1985 جىلى اقش-تىڭ پرەزيدەنتى رونالد رەيگان تاپسىرىس بەرگەن بولاتىن. ەڭ العاشقى ۇشاق تەك 1990 جىلى دجوردج بۋشتىڭ كەزىندە پايدالانۋعا بەرىلدى.