اشۋعا بۋلىققان حالىق پروبلەماسى وڭ شەشىلمەسە، وڭتۇستىك قازاقستان وبلىسىنىڭ باسشىسىنان كومەك سۇراماقشى. بۇل تۋرالى "31 ارنا" حابارلادى.

قالاداعى اباي اۋدانىنا قاراستى كوكبۇلاق تۇرعىن الابىن قونىستانعان قاراشا حالىق «ءۇيىمىز ءسۇرىلىپ كەتە مە؟» دەپ زار يلەپ وتىر. سەبەبى «قازترانسويل» كومپانياسى قۇبىرعا جاقىن ۇيلەرگە قاتىستى سوتقا تالاپ ارىز بەرگەن. مۇنى ەستىگەن 45 جاستاعى ەرماحان سىزدىقوۆ جارى باقىتحان ماشابايەۆا ەكەۋى بەس بالا-شاعاممەن دالادا قالىپ قوياتىن بولدىق دەپ دابىل قاقتى.

مازاسى قاشقان تۇرعىندار جەرگىلىكتى اكىمدىككە بارعانىمەن اكىمنىڭ قابىلداۋىنا كىرە الماعان. سودان شەنەۋنىكتەردىڭ ءىس-شاراعا قاتىساتىنىن ەستىگەن ولار سوندا بارىپ، اق جاعالىلارعا مۇڭىن جەتكىزىپتى.

«اۋدان اكىمشىلىگىنە ءۇش-تورت كەلىنشەك بولىپ باردىق. ونداعىلار «قاعاز الماي قابىلدامايمىز» دەدى. ءبىر ءىس-شارا بولىپ جاتقانىن قۇلاعىم شالىپ قالىپ، سول جەردەن ۇستادىق ولاردى. ايتپەسە اكىمدەر قابىلداي بەرمەيدى ەكەن عوي. سودان سوڭ بارىپ قالا اكىمى بىزبەن كەزدەستى»، - دەدى باقىتحان ماشابايەۆا.

سىزدىقوۆقا سوتتان ءۇيى سۇرىلەتىنى تۋرالى تالاپ ارىز كەلگەن.

«كەلىسىم قۇجاتىندا «ارى قاراي قۇرىلىس وسپەيدى» دەپ كورسەتىلىپ، قول قويىلعان. ءبىراق، وتكەن ايدا تالاپ ارىز كەلدى. ونىمەن تانىسقان سوڭ دەرەۋ اكىمشىلىككە بارىپ، كەلىسىمنىڭ قايدا كەتكەنىن سۇرادىم. ونداعىلار «ەشكىمگە ەشنارسە ايتپا، ءوزىمىز ارالاسىپ، ءبىتىرىپ بەرەمىز» دەپ مەنى توقتاتتى» دەگەن ەرماحان سىزدىقوۆ ءۇيىن كۇزەتىپ جۇرگەنىن ايتىپ، مۇڭىن شاقتى.

«بىزگە جەردى نەگە ويلانىپ بارىپ ۇلەستىرمەيدى؟ تىم بولماعاندا مەن ءۇي سالىپ جاتقاندا بىرەۋى كەلىپ ەسكەرتسە، تۇسىنەر ەدىم عوي. لەگاليزاسيا كەزىندە نەگە ايتپايدى؟ قۇجاتتارىم قولىمدا»، - دەدى اشۋىن جاسىرا الماعان سىزدىقوۆ.

حالىقتىڭ جان-ايقايى قالا اكىمىنىڭ قۇلاعىنا جەتىپ، شاھار باسشىسى عابيدوللا ءابدىراحىموۆ ولارمەن اقىرى كەزدەسىپتى. تەك ءمان-جايدى تىڭداعان ول «قۇجاتىڭ بار ما؟» دەپ شامىنا تيگەن سوڭ تۇرعىن سىزدىقوۆ قولىنداعى بارلىق قۇجاتىن كورسەتىپ، «حالىقتى زار يلەتۋ كەرەك پە؟» دەپ ەموسياسىن جاسىرا الماپعان.

وسى ساتتە ءابدىراحىموۆ مىرزا «ۇراسىز با مەنى؟ مەن سىزگە كەلىپ تۇرمىن عوي سويلەسۋگە. ءسىز ماعان دىكەڭدەمەڭىز» دەپ مۇڭىن شاققان تۇرعىنعا تاپ بەرگەن. ەرماحان سىزدىقوۆتىڭ جارى قالا اكىمىنەن مۇنداي ءسوزدى كۇتپەگەنىن جاسىرمادى.

«اكىمنەن «دىكەڭدەمە» دەگەن ءسوز ەستيمىز دەپ ويلامادىق نەگىزى. «قۇجاتىڭ بار ما؟» دەگەندە جولداسىم دا ءوزىن ءوزى ۇستاي الماي قالدى. اكىم دە ونداي ەستيمىن، حالىق اشۋلى دەپ ويلاماعان شىعار... ءبىزدىڭ ماسەلەمىزدى شەشۋ قالا باسشىسىنىڭ قولىنان كەلمەسە، وبلىس اكىمىنە شىعايىن دەپ وتىرمىز. جولى سولاي ەكەن عوي، اۋىل اكىمىنە كىردىك. قولىنان كەلمەدى. اۋدان اكىمىنىڭ دە، قولىنان كەلمەدى. قالالىق اكىمدىك ۋادە بەردى»، - دەدى بەس بالانىڭ اناسى ماشابايەۆا.

قۋانىشتىسى، ءابدىراحىموۆ مىرزا ءۇش ايدىڭ ىشىندە پروبلەماعا نۇكتە قويىلاتىنىن ۋادە ەتىپ كەتكەن. تەك كىمنىڭ پايداسىنا ەكەنى بەلگىسىز.

ايتا كەتەيىك، بەس بالانىڭ اناسى باقىتحان ماشابايەۆا بالا تاربيەسىمەن ۇيدە وتىر. جولداسىنىڭ دا تۇراقتى جۇمىسى جوق. تەك جالدامالى جۇمىسشى بولىپ ءناپاقا تاۋىپ، وتباسىن اسىراپ ءجۇر.