باتىس قازاقستان وبلىسىنداعى شالعاي اۋىلىندا اۋىل اكىمىنىڭ 22 جاستاعى جۇرگىزۋشىسى ۆيكتور ياكوۆەنكو ءولى تابىلدى، - دەپ حابارلايدى kaz.caravan.kz

جىگىتتىڭ دەنەسى 2 جەلتوقساندا ءوزىنىڭ ۇيىنەن تابىلدى. ونىڭ قىلعىنىپ ولگەنى حابارلانىپ وتىر. سول كۇنى ول جۇمىسقا شىقپاعان ەكەن. ۆيكتور ياكوۆەنكونىڭ دەنەسىن ونىڭ ۇيىنە كەلگەن باۋىرى كورگەن.

"مەن وسىمەن ەكىنشى اپتا عانا اكىم بولىپ قىزمەت ەتىپ ءجۇرمىن. قازا تاپقان جىگىتپەن جاقسى تانىس ەمەسپىن. جىگىتتىڭ مىنەزى جاقسى ەدى، ەشقانداي دا زيان ادەتتەرى بولعان ەمەس. ءبىزدىڭ اكىمدىكتە شامامەن ەكى جىلداي جۇمىس ىستەدى"، - دەدى اۋىل اكىمى تالعات قانتەمىروۆ.

ۆيكتور ياكوۆەنكو 5 جەلتوقساندا ءوز اۋىلىندا جەرلەندى. كەيىنىرەك جىگىتتىڭ ولىمىنە قاتىستى كەيبىر دەرەكتەر بەلگىلى بولدى. كۋاگەرلەردىڭ ايتۋىنشا، ۆيكتورعا ايەلدىڭ كيىمدەرى كيگىزىلگەن. كورشىلەر قازا تاپقان جىگىتتىڭ ءوز ۇيىندە ورىندىققا بايلاۋلى تابىلعانىن ايتتى. ونىڭ ءتىپتى ءىش كيىمى دە ايەلدىكى بولعان. "ال اۋزىندا ايەلدىڭ شۇلىعى بولعان. ونى ولتىرگەندەر شۇلىقتى جاس جىگىتتىڭ اۋزىنا تىققانى سونشا، ونىڭ الىپ شىعۋ مۇمكىن بولماعان"، - دەپ جازادى باسىلىم.

ايتا كەتەيىك، قازىرگى ۋاقىتتا اۋىلدا تەرگەۋ توبى جۇمىس ىستەپ جاتىر. جەرگىلىكتى تۇرعىنداردىڭ ايتۋىنشا، پوليسەيلەر اۋىلداعى بارلىق جاسوسپىرىمنەن جاۋاپ الىپ جاتىر. ءبىراق قۇقىق قورعاۋ ورگاندارىنىڭ ەشقايسىسى ازىرشە بۇل وقيعاعا قاتىستى تۇسىنىك بەرگەن جوق.