«WikiLeaks» سايتى تۇركيا پرەزيدەنتىنىڭ كۇيەۋ بالاسىنىڭ مۇناي يمپورتتاۋ مەن ەكسپورتتاۋعا قاتىستى دايش لاڭكەستىك توبىمەن بايلانىسىن اشكەرەلەدى. بۇل تۋرالى «قامشى» پورتالى حابارلايدى.
«WikiLeaks» اشكەرەلەگەن قۇجاتتار تۇركيا پرەزيدەنتى رەجەپ تايىپ ەردوعاننىڭ كۇيەۋ بالاسى ءارى وسى ەلدىڭ مۇناي ءمينيسترى بەرات البايراق «Power Trans» مۇناي كومپانياسىمەن ىنتىماقتاستىقتا بولعانىن كورسەتەدى. تۇركيا ۇكىمەتى دايش لاڭكەستىك توبىنان مۇناي يمپورتتادى دەپ ايىپتالىپ وتىرعان «Power Trans" كومپانياسىنىڭ مۇناي يمپورتى مەن ەكسپورتىنا كەدەرگى جاساماي وتىر.
كوپتەگەن حالىقارالىق قۇپيا قۇجاتتارمەن جاسىرىن بايلانىس، استىرتىن ارەكەتتەردى جارىققا شىعارىپ، كۇن تارتىبىنەن تۇسپەي كەلە جاتقان Wikileaks تۇركيا بيلىگىنە «باس اۋرۋ» بولاتىن قۇجاتتاردى اشكەرەلەدى.
2000 جىلدان بيىلعى جىلدىڭ 23 قىركۇيەگىنە دەيىنگى 16 جىلدىق ۋاقىتتا 58 مىڭعا جاقىن ەلەكتروندى پوشتا جازبالارىن زەردەلەگەن Wikileaks البايراقتىڭ دايش-پەن ساۋدا جاساسقان 2000 Powertrans كومپانياسىمەن بايلانىسىن ورتاعا شىعاردى. ناقتىراق ايتقاندا، 2000 جىلدىڭ ساۋىرىنەن، 2016 جىلدىڭ 23 قىركۇيەگىنە دەيىنگى ۋاقىتتا 57.934 ەلەكتروندى حات البايراقتىڭ جەكە پوشتاسىنان جولدانعان. ونداعى كەيبىر حاتتار البايراقتىڭ ادۆوكاتتارى ارقىلى «Powertrans» كومپانياسىمەن بايلانىسىن ايعاقتايدى.
جاريالانعان مالىمەتتە تۇركيا بيلىگىن قولىنا ۇستاپ وتىرعان ادىلەت جانە دامۋ پارتياسىنىڭ 2013 جىلى ىستامبۇلدىڭ ورتالىق الاڭدارىنىڭ ءبىرى گەزي پاركىندە بولعان جاعدايعا بايلانىستى الەۋمەتتىك جەلىنى باقىلاۋ ماقساتىندا «ترولدەر ورداسىن» قولدانعانى تۋرالى ءھام باسقا دا قيتۇرقى دەرەك بار.
ايتا كەتسەك، وسى «WikiLeaks» جاريالاعان مالىمەتتەر اقش-تاعى پرەزيدەنت سايلاۋى كەزىندە حيللاري كلينتوننىڭ ءباسى تومەندەۋىنە ىقپال ەتكەن ەدى. وندا، WikiLeaks سايتى اقش دەموكراتيالىق پارتياسى ۇلتتىق كوميتەتىنىڭ ەلەكتروندىق پوشتا ارقىلى جولدانعان 20 مىڭعا جۋىق حاتىن جاريالادى. ونىڭ ىشىندە حيللاري كلينتوننىڭ پرەزيدەنتتىك ناۋقان باستالماي تۇرعاندا قارجىگەرلەر مەن اقش-تاعى ىسكەر توپتار وكىلدەرى الدىندا اقىسى تولەنگەن سوزدەرىنەن ۇزىندىلەر كەلتىرىلگەن بىرنەشە مىڭ ەلەكتروندى حاتتارى دا بار.
WikiLeaks – حالىقارالىق بەيكوممەرسيالىق ۇيىم، انونيمدىك دەرەككوزدەرىنەن الىنعان نەمەسە بايقاۋسىزدا تاراپ كەتكەن قۇپيا اقپاراتتاردى جاريالايدى. سايت 2006 جىلى جەلتوقساندا قۇرىلعان. ۋيكيليكس سايتى 2009 جىلى اقش مەملەكەتتىك دەپارتامەنتى مەن قورعانىس مينيسترلىگىنىڭ مىڭداعان قۇپيا قۇجاتتارىن جاريالاعان ەدى. اۆسترالياداعى «سيدنەي بەيبىتشىلىك قورى» وسى ەلدىڭ ازاماتى، «ۋيكيليكس» ينتەرنەت سايتىنىڭ نەگىزىن قالاعان جۋليان اسسانجدى «قۇقىق قورعاۋ سالاسىنداعى قىزمەتى» ءۇشىن «سيدنەي بەيبىتشىلىك سىيلىعىمەن» ماراپاتتاعان.
