استانا، 7 جەلتوقسان، ءماجىلىس ءۇيى. بۇگىن پارلامەنت ءماجىلىسىنىڭ سپيكەرى نۇرلان ءنىعماتۋليننىڭ توراعالىعىمەن وتكەن پالاتانىڭ جالپى وتىرىسىندا دەپۋتاتتار «قازاقستان رەسپۋبليكاسى تاۋەلسىزدىگىنىڭ جيىرما بەس جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ماقۇلدادى دەپ حابارلايدى ق ر پارلامەنتى ءماجىلىسى اپپاراتىنىڭ باسپا ءسوز قىزمەتى.
ءماجىلىس ءتوراعاسى نۇرلان نىعماتۋلين:
- بۇل زاڭ جوباسى تىكەلەي ەلباسىمىز نۇرسۇلتان ءابىش ۇلى نازاربايەۆتىڭ باستاماسىمەن العاشقى رەت ەنگىزىلدى. وسى ورايدا، پرەزيدەنتىمىز قاتەلىك جاساعان ازاماتتارعا كەشىرىم جاساپ، ولاردىڭ جاڭا ءومىر باستاۋىنا جول اشىپ وتىر. بۇل تاۋەلسىز ەلىمىزدىڭ شىن مانىندە دەموكراتيالىق جانە وركەنيەتتى ەل بولۋىنىڭ ناقتى كورسەتكىشى،-دەپ اتاپ ءوتتى.
زاڭ جوباسىندا ازاماتتاردىڭ الەۋمەتتىك وسال ساناتتارى – كامەلەتكە تولماعاندارعا، جۇكتى ايەلدەرگە، كامەلەتكە تولماعان بالالارى نەمەسە مۇگەدەك بالالارى بار ايەلدەرگە، سونداي-اق كامەلەتكە تولماعان بالالاردىڭ جالعىز اتا-اناسى بولىپ تابىلاتىن ەر ادامدارعا، I، II جانە III توپتاعى مۇگەدەكتەرگە، ەلۋ جاستاعى جانە ول جاستان اسقان ايەلدەرگە، الپىس جاستاعى جانە ول جاستان اسقان ەر ادامدارعا، ۇلى وتان سوعىسىنىڭ قاتىسۋشىلارى مەن مۇگەدەكتەرىنە جانە ولارعا تەڭەستىرىلگەن ادامدارعا، اسكەري جانە ينتەرناسيونالدىق بورىشىن ورىنداۋ كەزىندە قازا تاپقان اسكەري قىزمەتشىلەردىڭ جەسىرلەرىنە، سونداي-اق كۇيەۋلەرى سوعىس مۇگەدەكتەرى جانە ولارعا تەڭەستىرىلگەن ادامدار بولىپ تابىلاتىن ايەلدەرگە قاتىستى راقىمشىلىق جاساۋ ۇيعارىلىپ وتىر.
بارلىق قىلمىستىق ىستەر مەن سوتتار قاراماعان ىستەر بويىنشا، قىلمىستىق تەرىس قىلىقتار مەن ونشا اۋىر ەمەس قىلمىستار بويىنشا ءىس جۇرگىزۋدى توقتاتۋ كوزدەلىپ وتىر. سوتتالعان ادامداردىڭ جەكەلەگەن ساناتتارى ءۇشىن جازا مەرزىمىنىڭ وتەلمەگەن بولىگىن ايىپپۇلمەن نەمەسە باس بوستاندىعىن شەكتەۋمەن اۋىستىرۋ نەمەسە ونى قىسقارتۋ ءراسىمىن قولدانۋ مۇمكىندىگى پايدا بولادى.
سونىمەن قاتار، زاڭ جوباسىندا راقىمشىلىق جاساۋ اكتىسى قولدانىلمايتىن ادامداردىڭ اياسى بەلگىلەنەدى. بۇل جىنىستىق تيىسپەۋشىلىككە قارسى قىلمىستار؛ تەرروريستىك جانە ەكسترەميستىك قىلمىستار؛ ازاپتاۋلار جاساعان ادامدار؛ رەسيديۆيستەر؛ ءومىر بويىنا باس بوستاندىعىنان ايىرۋعا جازالانعان، سونداي-اق كەشىرىم جاساۋ تارتىبىمەن ءولىم جازاسى باس بوستاندىعىنان ايىرۋعا اۋىستىرىلعان ادامدار، بۇرىن راقىمشىلىق جاسالعان نەمەسە كەشiرiم جاسالعان جانە قايتادان قاساقانا قىلمىستار جاساعان ادامدار؛ قىلمىستىق توپتار قۇرامىندا قىلمىستار جاساعانى ءۇشىن سوتتالعان، سونداي-اق قىلمىستىق زاڭدا بەلگىلەنگەن ءبىرقاتار وزگە دە قىلمىستار جاساعان ادامدار.
