جارتىلاي قورعاۋشى گەورگيي جۋكوۆ "قايرات" ساپىنا اۋىستى. بۇل جونىندە كلۋبتىڭ باسپا ءسوز قىزمەتى حابارلاپ وتىر. سەمەيدە دۇنيەگە كەلىپ، سپورتتىق مانسابىن بەلگيادا باستاعان ويىنشى الداعى ءۇش جىلىن الماتىدا وتكىزبەك. البەتتە، بىرنەشە جىلدان بەرى چەمپيوندىققا تالاسسا دا التىنعا قول جەتكىزە الماي جۇرگەن "قايرات" ءۇشىن بۇل جاقسى جاڭالىق. ونى ماماندار دا ايتىپ جاتىر. دەسە دە جانكۇيەردىڭ ءبارى بۇل جاڭالىقتى جاقسى قابىلداي قويمادى. نە ءۇشىن؟ ايتقان سوزدەرى مەن ىستەگەن ىستەرى ءۇشىن. جۋكوۆ نە ايتتى؟ نە ىستەدى؟
اڭگىمەنى ارىدەن باستايىق. جوعارىدا ايتقانىمداي، جۋكوۆ سەمەيدە دۇنيەگە كەلگەن. ءبىراق بەس جاسىندا اتا-اناسىمەن بىرگە بەلگياعا كوشىپ كەتكەن. فۋتبول ويناۋدى "اندەرلەحتە" باستاپ، 16 جاسىندا "بەەرسحوت" كومانداسىمەن كەلىسىمشارتقا وتىرعان. ءدال سول جىلى ول رەسەي ازاماتتىعىن، ارتىنشا بەلگيا ازاماتتىعىن العان. 19 جاسىندا اگەنتىنىڭ ايتۋىمەن ول قازاقستانعا قايتىپ كەلەدى. ءومىر ءسۇرۋ ءۇشىن ەمەس، فۋتبول ويناۋ ءۇشىن. ءبىزدىڭ چەمپيوناتتا شەتتەن كەلگەن ويىنشىلار سانىنا شەكتەۋ بار. ءبىراق "استانا" ساپىنا قوسىلعان جۋكوۆ قازاقستاندا دۇنيەگە كەلگەندىكتەن ول شەكتەۋ بۇل ويىنشىعا جۇرمەيدى. سودان، بولاشاعىنان ۇلكەن ءۇمىت كۇتتىرگەن ونى قازاقستان قۇراماسىنا تارتۋ جۇمىستارى دا باستالادى. الايدا، العاشىندا جاستار قۇراماسىنا ويناعان جارتىلاي قورعاۋشى، رەسمي ويىنداردا ۇلتتىق قۇراماعا ويناۋدان باس تارتادى. البەتتە، اشىق تۇردە ەمەس. شاقىرتۋ العانعا بارادى، ءبىراق ءتۇرلى سەبەپتەرمەن ويىنعا شىقپايدى. سول باياعى جاراقات، اناۋ-مىناۋ. شىن مانىندە، ونىڭ سەبەبى بەلگيا مەن رەسەي ازاماتتىعى بولاتىن. قىسقاسى، فۋتبولدا ءبىر ەلدىڭ قۇراماسى قاتارىندا رەسمي ويىنداردا ويناساڭ، ودان كەيىن باسقا ەلدىڭ قۇراماسىنا ويناي المايسىڭ دەگەن جازىلعان زاڭ بار. سول زاڭدى العا تارتىپ گەورگيي ءبىزدىڭ قۇراماعا ويناۋدان قاشتى. بۇل جاعدايدا "وندا بىزگە كەرەك ەمەسسىڭ!" دەپ قول سىلتەي سالۋعا بولار ەدى. ءبىراق ءبىزدىڭ فۋتبول باسشىلارى نەگە ەكەنى وسى ويىنشىعا جابىستى دا قالدى. ال ول ءوز كەزەگىندە قازاقتار ەڭكەيگەن سايىن شالقايا ءتۇستى.
جۋكوۆتىڭ كىم ەكەنىن تۇسىنگەن بولارسىزدار. ەندى ونىڭ قالاي شالقايعانىنا كوشەيىك. بۇل جىگىت شالقايعاننىڭ كوكەسىن سۇقبات بەرگەندە جانە الەۋمەتتىك جەلىلەردەگى پىكىرلەرى ارقىلى جەتكىزۋگە قۇمار.
بەلگيالىق باسىلىمداردىڭ بىرىنە بەرگەن سۇقباتىندا ول: "مەن قازاقستان قۇراماسىنىڭ باپكەرىنە ماعان رەسمي ويىنداردا ءۇمىت ارتپاۋىن جەتكىزدىم. مەن وسكىم كەلەدى، سول سەبەپتى دە قاي قۇراماعا وينايتىنىمدى ءالى شەشپەدىم. مەنىڭ ەكى تاڭداۋىم بار – بەلگيا مەن رەسەي"، - دەگەنى جانكۇيەرلەردىڭ ءالى دە ەسىندە. سول سۇقباتتان كەيىن ويىنشى الەۋمەتتىك جەلىدە جۇرتپەن ءسوز تالاسقا ءتۇسىپ، ايىپپۇل دا تولەگەن بولاتىن. ءبىراق ول از بولعان سىڭايلى. ايتقان سوزدەرى ءۇشىن اقتالىپ، ءوزىن دۇرىس تۇسىنبەگەن ەلدەن كەشىرىم سۇراسا دا جۋكوۆ مۇنىمەن توقتاپ قالمادى. مىسالى، وسى جىلى شىلدە ايىندا رەسەيلىك championat.com پورتالىنا بەرگەن سۇقباتىندا ول: "شىنىمدى ايتسام، مەن العاشىندا قازاقستانداعى جىگىتتەر دە فۋتبول ويناي الاتىنىنا قاتتى تاڭعالدىم"، - دەگەن ەكەن. اشۋعا تيە مە؟ تيەدى، ارينە! بۇلاي ايتاتىنداي ول كىم ەدى؟ نەبارى 37 مىڭ حالقى بار ليحتەنشتەيندە دوپ تەبەتىن ادام تابىلعاندا، قازاقستاندا تابىلمايدى دەپ ويلادى ما؟ ءجا، كەلەسى پىكىرگە كوشەيىك. ءدال سول سۇقباتتا "تۋعان جەرىڭىزگە ورالعانداعى العاشقى ويىڭىز" دەگەن ساۋالعا بەرگەن جاۋابىن وقىڭىزدار: "اراعا ۇزاق ۋاقىت سالىپ، اكەم ەكەۋمىز قاراعاندىعا كەلگەندە: "مۇمكىن، كەش بولماي تۇرعاندا بۇل جاقتان قايتا كەتكەنىمىز دۇرىس بولار؟" دەگەنىم ەسىمدە"، - دەپتى. تۋعان جەردى اڭساپ كەلگەن ادامنىڭ پىكىرىنە ۇقسامايدى، ءا؟
championat.com – رەسەيلىك پورتال ەكەنىن ايتتىم عوي. سولارعا جاعۋدى ويلاسا كەرەك، ءسوز اراسىندا جۋكوۆ: "مەن ءوزىمنىڭ سپورتتىق ازاماتتىعىمدى رەسەيلىككە اۋىستىرعىم كەلەدى. ارتىنشا رەسەي ۇلتتىق قۇراماسىنا قوسىلۋ ءۇشىن بار كۇشىمدى سالامىن. بۇل – مەنىڭ ارمانىم!"، - دەگەنى بار.
"قايراتپەن" جاساسقان كەلىسىمشارت بويىنشا گەورگيي جۋكوۆ ەندى قازاقستان قۇراماسى ءۇشىن ونەر كورسەتۋگە مىندەتتەلىپ وتىر. بۇل جاڭالىقتى كلۋب باسشىسى قايرات بورانبايەۆ ەلگە سۇيىنشىلەپ جەتكىزدى. جاسى 22-گە كەلگەن ويىنشى بەلگيا مەن رەسەي قۇرامالارىنان كۇدەر ۇزسە كەرەك. البەتتە، جۇمىس تاڭداعاندا بولاشاقتان ءۇمىت كۇتتىرەتىن، جالاقىسى جاقسىسىن، جانىڭا جاقىنىن تاڭداۋ – ابەستىك ەمەس. ءبىراق وتان دەگەندە بۇعان جول جوق.
يتاليا، تۇركيا مەن گەرمانيا ويىنشىلارىنىڭ كەزدەسۋ الدىندا ءانۇراندى شىرقاعانىن كورگەندە، ول ەلدەردە فۋتبول نەگە مىقتى ەكەنىن تۇسىنەسىڭ. ولار ويىندى ويىن ءۇشىن ەمەس، وتان ءۇشىن وينايدى. ارتىندا بۇكىل ەل ءۇمىت ارتىپ تۇرعانىن ءبىلىپ، سەزىپ وينايدى. بىزدە شە؟ ۇلتتىق قۇراماعا جۋكوۆ سىندى ءدۇبارالاردى تارتا بەرسەك، قارىق بولمايتىنىمىز انىق.
اۆتور: ەرنار المابەك
