ەر جانىبەك ءباھادۇردىڭ 300 جىلدىق تويىنا ارناپ شقو اكىمشىلىگى جاريالاعان الامان جىر بايگەسى مارەسىنە جەتتى. بۇل تۋارلى ايتىس سايتىنا سىلتەمە جاساپ قازاقپارات حابارلادى.

بىلىكتى عالىمدار مەن تانىمال اقىنداردان قۇرالعان، ق ر مەملەكەتتىك سىيلىعىنىڭ لاۋرەاتى، اقىن نەسىپبەك ايت ۇلى ءتوراعالىق ەتكەن قازىلار القاسى ساراپتاپ سارالاي كەلە جۇلدەلەر تومەندەگىدەي تابىستالدى: باس جۇلدەنى (تەمىر تۇلپار) «ەرلىك جىرى» اتتى ولەڭىمەن قازاقتىڭ ارقالى اقىنى، الاش سىيلىعىنىڭ يەگەرى ءجۇرسىن ەرمان جەڭىپ الدى. ءبىرىنشى ورىن الماتىلىق تانىمال اقىن باقىتبەك ءبامىش ۇلىنىڭ «رۋح جىرى - ەر جانىبەك» پوەماسىنا بەرىلدى. ەكىنشى ورىنداردى «ەر جانىبەك» ولەڭىمەن وسكەمەندىك ازامات تاسقارا جانە «جانىبەك - ەر جانىبەك - بي جانىبەك» داستانىمەن جەزقازعاندىق كەنجەباي احمەتوۆ ەنشىلەدى. ءۇشىنشى ورىنداردى مونعوليالىق سۇراعان راحمەت ۇلى «جارقا ەلبرۋسى»، «كيە» اتتى ولەڭدەرى ءۇشىن، استانالىق اقبەرەن ەلگەزەك «ەر جانىبەك، ەر جانىبەك!» تولعاۋى ءۇشىن، وسكەمەندىك اسكەرحان اقتاي «قىرلاۋلى نايزا قولعا العان» تولعاۋى ءۇشىن يەلەندى. ىنتالاندىرۋ سىيلىقتارى شىعىسقازاقستاندىق ايجارىق ءابىلحاسىموۆتىڭ «ەل قورعانى - ەر جانىبەك» پوەماسىنا، ماڭعىستاۋلىق جاس اقىن ەدىلبەك دۇسەنوۆتىڭ «ەر جانىبەك» تولعاۋىنا، استانالىق باۋىرجان قاراعىز ۇلىنىڭ «ەر جانىبەك رۋحىنا» ولەڭىنە، اتىراۋلىق ءاليا داۋلەتبايەۆانىڭ «جانىبەكتىڭ اق تۋىن جوقتاۋ» ولەڭىنە، الماتىلىق ماقسۇتحان باركول-دالەيدىڭ «ارۋاعىڭ اۋناسىن» تەرمە-تولعاۋىنا بۇيىردى.

سونىمەن بىرگە سەمەي قالاسىنىڭ اكىمى ايبەك كارىموۆ، شاكارىم اتىنداعى سەمەي مەملەكەتتىك ۋنيۆەرسيتەتى جانە «ەر جانىبەك» قورى تاعايىنداعان سىيلىقتاردى ەگەۋحان ءمۇحامادي قىزى (شقو)، قايرات كامەي (قحر)، ەرلان ءجۇنىس (استانا)، ادالبەك ءاقمادي ۇلى (الماتى)، تولىباي ابىلايەۆ (قىزىلوردا) سىندى اقىندار قانجىعالارىنا بايلاعان.

قامشى-اقپارات