قىتايداعى جەر سىلكىنىسىنەن بارلىعى 589 ادام قازا تاپتى، - دەپ حابارلايدى Tengrinews.kz  جەرگىلىكتى بۇقارالىق اقپارات قۇرالدارىنا سىلتەمە جاساپ.

بۇعان دەيىن 410 ادامنىڭ ءومىرى قيىلعانى حابارلانعان ەدى. قىتايدىڭ وڭتۇستىك-باتىسىنداعى يۋننان پروۆينسياسىندا 3 تامىز كۇنى ماگنيتۋداسى 6،5-گە تەڭ جەر سىلكىنىسى بولدى. جەراستى دۇمپۋلەرى جەرگىلىكتى ۋاقىت 16.30-دا تىركەلدى. ءزىلزالانىڭ ەپيسەنترى ۆەنپين ەلدى مەكەنىنەن 11 شاقىرىم، چجاوتۋن قالاسىنان 29 شاقىرىم قاشىقتىقتا انىقتالدى. ءدۇمپۋ وشاعى 10 شاقىرىم تەرەڭدىكتە بولدى.

ءزىلزالا كەزىندە قىتايدىڭ لۋديان وكرۋگى كوپ زارداپ شەكتى. وندا 265 مىڭ ادام تۇرادى. تەلەفون بايلانىسى ءۇزىلىپ، بىرنەشە عيمارات قيرادى، ەلەكتر جەلىلەرى زاقىمداندى. پروۆينسيا بيلىگى اپات ايماعىنا گۋمانيتارلىق كومەك جونەلتتى. جەرگىلىكتى بۇقارالىق اقپارات قۇرالدارىنىڭ مالىمەتىنشە، بۇل - يۋنناندا سوڭعى 14 جىل ىشىندە بولعان ەڭ جويقىن ءزىلزالا.

شينحۋا اگەنتتىگىنىڭ اقپاراتى بويىنشا قازىرگە دەيىن 1300 ادام قۇتقارىلىپ، العاشقى مەديسينالىق جاردەمدەر كورسەتىلگەن. اپات بولعان اۋماقتا 937 قۇتقارۋشى، 141 ارنايى تەحنيكا، 17 ءيىسشىل يت قۇتقارۋ جۇمىستارى ءۇشىن جۇمىلدىرىلعان. وسىعان دەيىن ۇيىندىلەر استىنان 66 ادام ارشىپ الىنىپ، 30 ادامنىڭ ءومىرى اجالدان امان قالعان. 4 تامىز ق ر پرەزيدەنتى نۇرسۇلتان نازاربايەۆ جۇڭگو ەلىنىڭ باسشىسىن كوڭىل ايتۋ حاتىن جولدادى.

قامشى-اقپارات