اسا قۇرمەتتى ەلباسى!
ءسىز ىرگەتاسىن قالاعان مودەرن قازاقستاندى بولاشاققا باستايتىن سارابدال ساياساتىڭىزدىڭ بىردەن-بىر قولداۋشىلارى «ءبىلىم يننوۆاسيا» ليسەيلەرى (قتل) ۇجىمى مەن اتا-انالارى. العاش قوڭىراۋىن ءوزىڭىز سوققان ءبىلىم وردالارىنا دەگەن ىقىلاسىڭىز بەن ءاردايىم كورسەتىپ جۇرگەن قولداۋلارىڭىز ءۇشىن العىسىمىز شەكسىز.
اسا مارتەبەلى ەلباسى!
تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى نيەۆزات ۋيانىكتىڭ 2 ناۋرىز كۇنگى بيل-دەر تۋرالى مالىمدەمەسى بالالارىمىز بەن اتا-انالاردىڭ كوڭىلىنە قاياۋ سالىپ قانا قويماي، ءبىزدى قاتتى قىنجىلتتى. بەيبىتشىلىك پەن دوستىقتىڭ التىن دىڭگەگى قازاقستاندا ورىن العان بۇنداي ارانداتۋشىلىق، قايماعى بۇزىلماعان قوعامعا ىرىتكى سالىپ، ەگەمەن ەلىمىزدىڭ ىشكى ىسىنە تىكەلەي ارالاسۋ دەپ سانايمىز.
تۇركيا ەلشىسىنىڭ بۇل قىلىعى وسىمەنەن ەكىنشى رەت قايتالانۋدا. وقۋ جىلىنىڭ باستالار الدىندا ءدال كەشەگىدەي مالىمدەمەسىمەن قوعامدى دۇرلىكتىرگەنى وزىڭىزگە ءمالىم.
اسا مارتەبەلى نۇرسۇلتان ءابىش ۇلى!
ءبىلىم-يننوۆاسيا ليسەيلەرىنىڭ اتا-انالارى رەتىندە سىزدەن تۇركيانىڭ ەلشىسى نيەۆزات ۋيانىكتىڭ بۇنداي ورىنسىز ارەكەتتەرىنەن بالالارىمىزدى، ءبىلىم وشاقتارىن جانە شيرەك عاسىرلىق جاستىق شاعىن قازاقستاندا وتكىزگەن تۇركيالىق كىناسىز ۇستازدارىمىزدى قورعاۋىڭىزدى سۇرايمىز. ويتكەنى ەلشىنىڭ ءاربىر مالىمدەمەسى ءبىزدى قاتتى الاڭداتۋمەن شەكتەلمەي، بالالارىمىزدىڭ وقۋ ۇلگەرىمىنە كەرى اسەرىن تيگىزىپ وتىر. بۇگىنگى كۇنگە دەيىن كورسەتكەن كوشباسشىلىق كورەگەندىگىڭىزبەن قورعان بولىپ، الاڭكوڭىلىمىزدى ورنىقتىراتىندىعىڭىزعا ءشۇبامىز جوق.
وتانىمىز قازاقستانعا بەيبىت-دامۋ، Cىزگە زور دەنساۋلىق تىلەيمىز!
قۇرمەتپەن: «ءبىلىم-يننوۆاسيا» ليسەيلەرى (قتل) اتا-انالار قاۋىمى
پىكىر قالدىرۋ