بۇل تۋرالى اۋىل شارۋاشىلىعى مينيسترلىگىندە وتكەن اگرارلىق كەڭەستىڭ كەزەكتى وتىرىسىندا ۆيسە پرەمەر ا.مىرزاحمەتوۆ مالىمدەدى دەپ حابارلايدى "قامشى" اقپاراتتىق اگەنتتىگى ق ر اشم باسپا ءسوز قىزمەتىنە سىلتەمە جاساپ.

بۇگىنگى كەڭەستىڭ كۇن تارتىبىندە ماڭىزدى ءۇش ماسەلە كوتەرىلدى. ولار: سۋبسيديالاردىڭ جاڭا ەرەجەسى، زاڭنامالىق وزگەرىستەر جانە جاڭا ترانسفەرت ورتالىعىنىڭ جۇمىسى تالقىعا ءتۇستى.

ءبىرىنشى سۇراق، ياعني مەملەكەتتىك قولداۋ بويىنشا جاڭا مەملەكەتتىك باعدارلاما اياسىندا 8 سۋبسيديالاردىڭ ەرەجەلەرى قايتا قارالعان. سونداي-اق 11 ءتيىمسىز سۋبسيديا الىنىپ تاستالىنىپ، 39 سۋبسيديا تۇرىنە وزگەرىس ەنگىزىلگەن.

اتاپ ايتاتىنى، بيىلدان باستاپ مەملەكەتتىك قولداۋ الۋشىلاردىڭ سانى 7،5 ەسەگە وسەدى.

ونىڭ ىشىندە، بورداقىلاۋ الاڭدارى ءۇش ەسەگە كوبەيمەك. ماسەلەن، ءار اسىل تۇقىمدى ءىرى قارا مال باسىن ساتىپ العاندا قايتارىمسىز 150 مىڭ تەڭگە بەرىلەدى. ال بۇعان دەيىنگى ەرەجەدە اسىل تۇقىمعا دا، شارۋا مالعا دا بىردەي قارجى تولەنىپ كەلگەن. ەكىنشى وزگەرىس كووپەراسيا مۇشەلەرىنە قاراستىرىلعان جەڭىلدىكتەر.

كووپەراسياعا ساتىلاتىن 1 باس ءىرى قارا ءۇشىن مەملەكەت قايتارىمسىز 20 مىڭ تەڭگە تولەمەك. سونداي-اق، 1 ليتر سۇتكە 10 تەڭگە، ءبىر ۋاق مالعا 1500 تەڭگە قارجى بولىنەدى. بۇدان بولەك كووپەراسياعا الىناتىن جەمنىڭ ءار تونناسىنا 20 مىڭ تەڭگە تولەۋ كوزدەلگەن. الايدا بۇل دەگەنىمىز كووپەراسياعا بىرىكپەگەندەر مەملەكەتتىك قولداۋدان قالىس قالادى دەگەن ءسوز ەمەس. 30 باس ءىرى قارادان جوعارى مالى بار شارۋاشىلىق ەگەلەرى ءار ليتر ءسۇتىن 15 تەڭگەدەن، ال 400 باستان جوعارى شارۋالار ءار ءليترىن 25 تەڭگەدەن سۋبسيديالانادى.
اسىل تۇقىمدى ەشكى اسىراۋشىلار ءبىرىنشى مارتە مەملەكەتتىك قولداۋعا يە بولماق.

سۋبسيديا بويىنشا تاعى ءبىر تۇشىمدى جاڭالىق، ولاردىڭ اۆتوماتتاندىرىلۋى. ياعني، جەمقورلىقتىڭ الدىن-الۋ ماقساتىندا مال شارۋاشىلىعىنا بەرىلەتىن سۋبسيديالار اۆتوماتتاندىرىلدى. كەلەر جىلدان باستاپ اۋىل شارۋاشىلىعى سالاسىنداعى بارلىق قولداۋ اۆتوماتتاندىرىلاتىن بولادى.

ال بالىق شارۋاشىلىعى تۇڭعىش رەت ۇلكەن مۇمكىندىككە يە بولماق. اۋىل شارۋاشىلىعىن دامىتۋدىڭ 2017-2021 جىلدارعا ارنالعان باعدارلاماسى نەگىزىندە تاۋارلى بالىق وسىرۋشىلەرگە سۋبسيديا تولەنەدى. ءتىپتى، بالىقتىڭ ۇرىعى، تاماعى، ونى قاداعالايتىن تەحنيكالارىنا دەيىن ينۆەستسۋبسيديا قاراستىرىلعان. اتاپ وتەتىن تاعى ءبىر جايت، ينۆەستسۋبسيديانىڭ دا كوكجيەگى كەڭەيگەن. ياعني بيىلدان باستاپ كووپەراتيۆ ۇجىمعا قاجەتتى تەحنيكا ساتىپ العاندا مەملەكەت بىردەن 50% وتەپ بەرمەك. مۇنداي جەڭىلدىك اشم-دە بۇرىن-سوڭدى بولماعان. اگرارلىق كەڭەستىڭ وتىرىسىندا ۆيسە-پرەمەر وسىنداي اۋىز تولتىرىپ ايتاتىن جاڭالىقتارىمەن ءبولىستى.
ۆەدوستۆو باسشىسىنىڭ ايتۋىنشا، مۇنداي ۇلكەن قولداۋ مەملەكەت باسشىسىنىڭ اۋىل شارۋاشىلىعىنا ەرەكشە كوڭىل ءبولىپ، اگرارلىق سەكتوردى ەكونوميكانىڭ جاڭا درايۆەرى دەپ اتاۋىنىڭ ارقاسى دەيدى.

كۇن تارتىبىندەگى ەكىنشى ماسەلە دە وزەكتى. جاڭا باعدارلامانى ەنگىزۋ بارىسىندا كوپتەگەن زاڭدىلىقتارعا وزگەرىستەر جاسالدى. بۇعان دەيىن قولبايلاۋ بولعان نورماتيۆتىك اكتىلەر وڭتايلاندىرىلدى. ونىڭ نەگىزىندە 11 كودەكس پەن 25 زاڭعا وزگەرىستەر مەن تولىقتىرۋلار ەنگىزىلدى. اۋىل شارۋاشىلىعى مينيسترلىگى مەن جەرگىلىكتى اكىمدىك اراسىنداعى ءارتاراپتاندىرۋعا بايلانىستى مەموراندۋمدار، تۇقىم شارۋاشىلىعىنداعى، فيتوسانيتارلىق كارانتيندىك شارالار مەن بالىق جانە ورمان شارۋاشىلىعىنداعى زاڭنامالىق وزگەرىستەر.

تىلگە تيەك ەتەتىنى ۆەتەريناريا سالاسىندا مالداردىڭ قۇلاعىنا تاعىلاتىن سىرعالاردىڭ ءوزىن الۋ، ونى وڭىرلەرگە جەتكىزۋ، بايقاۋ وتكىزۋ جۇمىستارى سوزىلىپ قول بايلاۋ بولاتىن. ەندى جاڭا وزگەرىس نەگىزىندە بۇل فۋنكسيانى جەرگىلىكتى بيلىكتىڭ قۇزىرەتىنە بەرىپ، اتالعان جۇمىستا جەڭىلدەتۋ كوزدەلۋدە.
سونىمەن قاتار، وتىرىس بارىسىندا اوك-كە شەتەلدىك ينۆەستيسيا تارتۋمەن جانە الدىڭعى قاتارلى شەتەلدىك تەحنولوگيانى تاراتۋ وپەراتورى بولىپ تابىلاتىن اگروتەحنولوگيالاردى ترانسفەرتتەۋ جانە كوممەرسيالاۋ ورتالىعىنىڭ جۇمىسى تانىستىرىلدى.