سوڭعى ۋاقىتتا قاراعاندىنىڭ ورتالىق كوشەسىندە تۇراتىن جۇرت دالاعا شىقسا جاعىمسىز يىسكە تاپ بولىپ ءجۇر. قالانىڭ ءبىر جاعىنان مالدىڭ ەتى مەن ءجۇن- جۇرقانىڭ بورسىعان ءيىسى شىقسا، كەلەسى جاعىنان كارىز جۇيەنىڭ ءيىسى مۇڭكيدى، دەپ حابارلايدى قامشى اقپاراتتىق اگەنتتىگى abctv.kz باسىلىمىنا سىلتەمە جاساپ.

مۇنى جۇرت سان-ساققا جۇگىرتۋدە. بىرەۋلەر جاعىمسىز ءيىس قالانىڭ سىرتىنداعى كارىزدىك قالدىقتاردى تازارتۋ جەلىسىنەن كەلەدى دەسە، كەلەسى توپ دۋبوۆكاداعى شوشقا وسىرەتىن كاسىپورىننان شىعادى دەپ توپشىلايدى. قولقانى قاباتىن ءيىس قاراعاندى دا بىلتىر پايدا بولدى. بۇگىندە قالا تۇرعىندارى دالادا مۇرىن تىرجيتىپ جۇرۋگە ءماجبۇر بولىپ وتىر.  ال جەرگىلىكتى بيلىك بۇل ماسەلەگە باس قاتىرىپ وتىرعان جوق. 

تۇرعىندار تۇنشىعىپ ءجۇر

قاراعاندىنىڭ ءدال جانىندا ورنالاسقان كيروۆ شاحتاسى اۋدانىنداعى 19 شاحتا دەپ اتالاتىن ەلدى مەكەن تۇرعىندارى ەكى اپتا بويى ساسىق يىسكە تۇنشىعىپ جاتىر. مۇندا جۇرت اۋزى-مۇرنىن تۇمشالاپ جۇرەتىن جاعدايعا جەتكەن. تۇرعىنداردىڭ ايتۋىنشا، ەلدى مەكەندە شىبىن شىركەي مەن ەگەۋقۇيرىق قاپتاپ كەتكەن.

قاراپ وتىرا بەرسە ءىستىڭ ناسىرعا شاباتىنىن تۇسىنگەن جۇرت ساسىق ءيىستىڭ قايدان شىعىپ جاتقانىن انىقتاۋعا كىرىسكەن. ىزدەۋ جۇمىستارىن ۇيىمداستىرىپ ءجۇرىپ، اعاشتاردىڭ اراسىنان 80-گە جۋىق قاپقا سالىنعان تاۋىق سۇيەكتەرىن تاپقان.

«ساسىق ءيىستىڭ وسى جەردەن كەلىپ جاتقانىن بىردەن تۇسىندىك. ءۇيىمىزدىڭ ماڭىندا نەلىكتەن شىبىن-شىركەيدىڭ  قاپتاپ كەتكەنى دە بەلگىلى بولدى. ءقازىر شىبىننان ءبىر، ەگەۋقۇيرىقتان ءبىر قورقىپ وتىرمىز. بالالارىمىزعا جۇقپالى اۋرۋ جۇقپاسا ەكەن دەگەن قورقىنىشىمىز دا بار»، – دەپ قىنجىلدى اۋىل تۇرعىنى قارلىعاش مامىربايەۆا.

بۇل جەرگە تاۋىق سۇيەكتەرىنىڭ قالدىعىن كىمنىڭ تاستاپ كەتكەنى بەلگىسىز. الايدا تاۋىق ەتىن سۇيەگىنەن اجىراتىپ، ءونىم دايارلايتىن جۇگەنسىز كاسىپكەردىڭ ءىسى ەكەنى ايدان انىق.

تۇرعىندار شاعىمدانا سالىسىمەن ۆەتەرينارلىق ستانسيانىڭ ماماندارى كەلىپ، ساسىپ جاتقان تاۋىق سۇيەكتەرىن قالانىڭ سىرتىنا شىعارىپ، كومىپ تاستادى. ىزىنشە ماماندار ديزينفەكسيالاۋ شاراسىن ۇيىمداستىردى.

«حالىققا كەسىرىن تيگىزەتىن ارەكەتتى ەشكىم قۇپتامايدى. قالانىڭ سىرتىندا مالدىڭ ولەكسەلەرىن، تەرىلەرىن تاستايتىن ارنايى مال قورىمى بار. سول جەرگە اپارىپ توگۋ كەرەك. بۇل ءۇشىن اقى الىنبايدى. مال قورىمىن ءتيىستى جاعدايدا ۇستاپ تۇرۋ ءۇشىن بيۋدجەتتەن قوماقتى قارجى بولىنەدى»،  – دەيدى قاراعاندى قالاسى ۆەتەريناريا ءبولىمىنىڭ باسشىسى ەرجان بەكەتبايەۆ.

ءدال ءقازىر ەتىن سىدىرىپ الىپ، سۇيەگىن شاشىپ كەتكەن ادام قالدىقتى قالا سىرتىنداعى مال قورىمىنا اپارۋعا ەرىنگەن بولۋ كەرەك دەگەن بولجام جاسالىپ، پوليسيا قىزمەتكەرلەرى تاۋىق ەتىن وندىرەتىن كاسىپورىنداردى تەكسەرۋگە كىرىستى.

مۇنداعى ماقسات قالدىقتى كورىنگەن جەرگە تاستاپ، جۇرتتى شۋلاتىپ جۇرگەن جۇگەنسىزدى جازاعا تارتۋ. ال قاراعاندىنىڭ ورتالىعىندا مۇڭكىپ تۇرعان جاعىمسىز ءيىس تاۋىق سۇيەگىنەن ەمەس ەكەنى انىق. ويتكەنى بۇل ءيىستىڭ قولقانى قاۋىپ تۇرعانىنا بيىل ەكىنشى جىل.