قوينىنا شولمەگىن قىسقان ءبىر كىسى مەشىت جانىنان ءوتىپ بارا جاتىر دەپ جازادى قامشى اقپاراتتىق اگەنتتىگى muslim.kz -كە سىلتەمە جاساي وتىرىپ. بەسىن نامازىن مەشىتتەن وقىپ شىعىپ كەلە جاتقان يمام الگى ماستى كورىپ:

- باۋىرىم، توقتاشى. (ىشىمدىككە ءبىرشاما قىزىپ العان الگى كىسى يمامنىڭ داۋسىن ەستي سالا شولمەگىن جاسىرىپ الەكتەندى)

- وووو، مولدەكە، اسساليامۋ الەيكۋم! امانسىز با؟

- ۋاعالەيكۋم اسساليام، باۋىرىم! امانبىز. ءوزىڭ قالايسىڭ؟

- كورىپ تۇرعانىڭىزداي ءجۇرىپ جاتىرمىز...

- ساعان ءبىر ءوتىنىشىم بولىپ تۇر. ماعان الگى مەنى كورىپ تىعىپ قويعان قوينىڭداعى اراعىڭدى بەرسەڭ – دەپ، قۇلاعىنا سىبىرلادى.

- ونى قايتەسىز؟

- مەشىتتىڭ ىشىنە توگەمىن. ماس كىسى تاڭىرقاپ:

- نە دەپ تۇرسىز؟ اللانىڭ ءۇيىن لاستاۋدان قورىقپايسىز با؟ مەنىڭ ىشىمدىككە سالىنعانىما قىرىق جىل بولدى، الايدا مۇنداي ىسكە بارعان ەمەسپىن، بارمايمىن دا. اراقتى ونداي جامان ىسكە قولدانۋعا بەرە المايمىن. مەنەن اۋلاق ءجۇرىڭىز – دەپ، يمامعا قادالىپ قارادى. سوندا يمام الگى كىسىگە كۇلىمسىرەپ:

- سەن ادامداردىڭ قولىمەن تۇرعىزىلعان، قابىرعاسى توپىراقتان جاسالعان مىنا مەشىتتىڭ ىشىنە اراق توگۋىمە قارسىسىڭ. ال ەندى ءوزىڭ ويلانىپ قاراشى، الەمدەردىڭ راببىسى سونداي كەرەمەت ءپىشىن بەرىپ، راحىمىنا بولەپ، قۇلشىلىق ءۇشىن جاراتقان ءتانىڭدى اراقپەن لاستاۋعا قالاي عانا قياسىڭ؟

- مەن، مەن...( دەپ ۇنسىزدىك تانىتتى)

شولۋشى: اسەل وتەشوۆا