امەريكادا 15 كۇندىك سابيلەرىن ەگەۋقۇيرىققا تالاتقان جاس اتا-انا ۇستالدى، دەپ حابارلايدى قامشى اقپاراتتىق اگەنتتىگى Stan.kz باسىلىمىنا سىلتەمە جاساپ.

دارىگەرلەر نارەستەنىڭ دەنەسىنەن 100-گە جۋىق جاراقات تاپقان. باسىندا ۇزىندىعى 2،5 سانتيمەتر بولاتىن جارا پايدا بولىپتى. ءتىپتى سۇيەگى كورىنىپ تۇرعان. دارىگەرلەر سابيگە پلاستيكالىق وپەراسيا جاساپ، جارانى تىككەن.

كەيىن پوليسيا 19 جاستاعى ەريك شرايوك پەن 18 جاستاعى چارلز ەلليوتتانى ۇستايدى. شرايوكتىڭ ايتۋىنشا ول بالانى تاڭعى ساعات 05:30-دا توسەگىنىڭ قاسىنداعى كەرەۋەتكە جاتقىزعان، ال ەكى ساعاتتان سوڭ ونى قاتتى ايعايلاپ جىلاعانىنان ويانىپ كەتىپتى.

تومەنگە قاراپ، قان-قان بولىپ جاتقان ءسابيدى كورەدى. وسىلاي دەگەن اكەسى دە ءسابيدىڭ كەرەۋەتىنەن ەگەۋقۇيرىق ىزدەرىن كوردىم دەپتى. مامانداردىڭ ايتۋىنشا نارەستەنىڭ دەنەسىندەگى جارالار از ۋاقىتتا عانا پايدا بولعان جارا ەمەس، ول بىرنەشە ساعات بويعى جارالانۋدىڭ ناتيجەسىندە وسىنداي جاعدايعا جەتكىزىپ وتىر. ال بۇل ۋاقىت بويى جاس اتا-انا ۇيدە بولماعان نەمەسە شىندىقتى ايتۋدان جالتارىپ وتىر.

ەرلى-زايىپتىلار ۇيلەرىندە تىشقان مەن ەگەۋقۇيرىقتار بار ەكەنىن بىلسە دە، ولاردى قۇرتۋعا ەش ارەكەت جاساماپتى.