وڭتۇستىك كورەيادا ءبىر توپ وتانداسىمىز تاعى تۇتقىنعا ءتۇسىپ قالدى. ەلۋ شاقتى ازاماتتى اۋەجاي قىزمەتكەرلەرى بىردەن جەرتولەگە تۇسىرگەن. ءبىراق نە ءۇشىن ۇستاعاندارىن ەشكىمگە تاپتىشتەپ تۇسىندىرمەپتى. تەك ۇشاقتان تۇسكەن بويدا سۇراق-جاۋاپتىڭ استىنا الىپ، تار جەرگە قاماپ قويعان.

ءارقايسى ءارتۇرلى شارۋامەن بارعان قازاقستاندىقتار وسىلايشا 5 كۇننەن بەرى ءجىپسىز بايلانىپ وتىر، - دەپ حابارلايدى قامشى اقپارات اگەنتتىگى كتك مالىمەتىنە سۇيەنىپ.

 ءتىل بىلمەيتىن قازاقستان ازاماتتارى ءتىلماش تا تابا الماي، بىرنەشە كۇننەن بەرى اش جاتقانىن حابارلاعان.

 "تەك كارىس تىلىندە سويلەسىڭدەر دەيدى. ءتىلماش جوق بولعاندىقتان تاماق سۇراپ ىشە الماي وتىرمىز. ءبىراز جىگىتتەر اۋىرىپ جاتىر. كۇنىنە ازداعان سۋسىن مەن جارتى نان بەرەدى، بولدى"، - دەيدى جاسۇلان انۋاربايەۆ.

جات ەلدىڭ جەرتولەسىنە قامالعان وتانداستارىمىز سول جاقتان قوناقۇيگە تاپسىرىس بەرىپ، قايتار بيلەتتەرىن دە العان ەكەن. ءبىراق 5 كۇننەن بەرى قاماۋدا قالىپ، شاش ەتەكتەن شىعىنعا باتتىق دەپ شىرىلداپ وتىر.

 "بارلىعىمىز قوناق ءۇيدىڭ اقشاسىن تولەپ قويعانبىز. ساقتاندىرۋ قۇجاتتارىمىز بار. جەكە باسىم كورەيانى كورۋگە كەلگەن ەدىم. ءبىراق ءقازىر جەرتولەدە جاتىرمىز"، - دەيدى حاندامير قۇدىرەتوۆ.

 ال ەلىمىزدىڭ سىرتقى ىستەر مينيسترلىگى وڭتۇستىك كورەيادا تەك 16 ازاماتتىڭ بارىن راستادى. ءقازىر ولاردىڭ ماسەلەسىمەن سول جاقتاعى ەلشىلەر اينالىسىپ جاتىر ەكەن.

سىرتقى ىستەر مينيسترلىگىنىڭ مالىمەتىنشە، جات ەلدە ءجىپسىز بايلانعان وتانداستارىمىز كوشى-قون زاڭىن بۇزعانى ءۇشىن كورەياعا كىرگىزىلمەپتى. سوندىقتان، ولاردىڭ ءبىر توبى ەلگە دەپورتاسيالانعان. ينچحون اۋەجايىندا ءالى ءۇش وتانداسىمىز قالىپتى. ولار قازاقستانعا ەرتەڭ قايتارىلادى.

شولۋشى: ايگەرىم تاۋباي