وڭتۇستىك كورەيادا ءبىر توپ وتانداسىمىز تاعى تۇتقىنعا ءتۇسىپ قالدى، دەپ جازادى قامشى اقپاراتتىق اگەنتتىگى.
كتك ارناسىنىڭ مالىمەتىنشە، ەلۋ شاقتى ازاماتتى اۋەجاي قىزمەتكەرلەرى بىردەن جەرتولەگە تۇسىرگەن. ءبىراق نە ءۇشىن ۇستاعاندارىن ەشكىمگە تۇسىندىرمەپتى. تەك ۇشاقتان تۇسكەن بويدا سۇراق-جاۋاپتىڭ استىنا الىپ، تار جەرگە قاماپ قويعان. ءارقايسىسى ءارتۇرلى شارۋامەن بارعان قازاقستاندىقتار وسىلايشا 5 كۇننەن بەرى ءجىپسىز بايلانىپ وتىر.
ينچحون اۋەجايىندا جاتقان بۇل وتانداستارىمىز وڭتۇستىك كورەياعا ءارتۇرلى شارۋامەن بارىپتى. ءبىرى ساياحاتتاپ، ەكىنشىلەرى جۇمىسپەن، قالعاندارى جۇمىس ىزدەپ اتتانعاندار. ءتىل بىلمەيتىن قازاقستان ازاماتتارى ءتىلماش تا تابا الماي، بىرنەشە كۇننەن بەرى اش جاتىرمىز دەيدى.
«تەك كارىس تىلىندە سويلەسىڭدەر دەيدى. ءتىلماش جوق بولعاندىقتان تاماق سۇراپ ىشە الماي وتىرمىز. ءبىراز جىگىتتەر اۋىرىپ جاتىر. كۇنىنە ازداعان سۋسىن مەن جارتى نان بەرەدى، بولدى»، - دەيدى جەرتولەدە وتىرعان جاسۇلان انۋاربايەۆ.
جات ەلدىڭ جەرتولەسىنە قامالعان وتانداستارىمىز سول جاقتان قوناق ۇيگە تاپسىرىس بەرىپ، قايتار بيلەتتەرىن دە العان ەكەن. ءبىراق 5 كۇننەن بەرى قاماۋدا قالىپ، شاش ەتەكتەن شىعىنعا باتتىق دەپ شىرىلداپ وتىر.
ال ەلىمىزدىڭ سىرتقى ىستەر مينيسترلىگى وڭتۇستىك كورەيادا تەك 16 ازاماتتىڭ بارىن راستادى. ءقازىر ولاردىڭ ماسەلەسىمەن سول جاقتاعى ەلشىلەر اينالىسىپ جاتىر ەكەن.
سىرتقى ىستەر مينيسترلىگىنىڭ مالىمەتىنشە، جات ەلدە ءجىپسىز بايلانعان وتانداستارىمىز ميگراسيالىق زاڭدى بۇزعانى ءۇشىن كورەياعا كىرگىزىلمەپتى. سوندىقتان، ولاردىڭ ءبىر توبى ەلگە دەپورتاسيالانعان. ينچحون اۋەجايىندا ءالى ءۇش وتانداسىمىز قالىپتى. ولار قازاقستانعا ەرتەڭ قايتارىلاتىن بولادى.
