مىلجىڭ اڭگىمە (sorry!)

مەنىڭ مەكتەپپەن قوش ايتىسقانىما كەلەر جىلى باقانداي 10 جىل بولادى ەكەن. سۇيكىمدىلىگىمدى بىلمەدىم، ءبىراق تورەعالي ءان ارناپ جۇرگەن ءبىرتۇرلى قىز مەن ەكەنىمدى 100% بىلەمىن. سەبەبى قىز-جىگىتتەر ءبىلىم ورداسىن قيماي، كوز جاستارىن اقىرىن ءسۇرتىپ تۇرعاندا مەن بۇل ءسات قاشان اياقتالار دەپ ارمانداپ تۇردىم. مەكتەپ ءبىتىرۋ كەشىنە كويلەك ىزدەپ، سارى ۋايىمعا سالىنبادىم. الماتىداعى اپكەمنىڭ قوڭىر كويلەگى شاق كەلدى، سونى مىسە تۇتتىم. ءبىر كويلەككە سونشا اقشا جۇمساپ نە قىلامىن دەپ ويلادىم. سىنىپتاستارىممەن قىدىرمادىم دا. ءتىپتى بىتىرۋشىلەر البومىن دا ساتىپ المادىم. فوتوالبومداردى جيناپ الىپ، شاڭ باسقىزىپ قويامىز. ساعىنبايتىنىما سەنىمدى بولعاندىقتان البومعا شىعىندالۋدى اقىماق كوردىم. قىسقاسى، اتا-اناما ارتىق سالماق تۇسپەدى.  ولار «ۋف» دەستى، مەن «چاو» دەدىم مەكتەپكە.

                 Facebook-تەگى اڭگىمە

كەشە فەيسبۋكتە ءبىر جازبانى كوزىم شالىپ، توبە شاشىم تىك تۇردى. ءبىر قىز «كويلەككە 150 000 بەرىڭدەر نە ەركەكپەن جاتامىن» دەپ شوشىتىپتى-مىس. سونداعى كوكسەگەنى - مەكتەپ ءبىتىرۋ كەشىنىڭ كويلەگى. سەنبەيىن دەسەم، نەشە ءتۇرلى ءتالپىش قىز كوپ. سەنەيىن دەسەم، بۇل تالپىشتىك ەمەس، بارىپ تۇرعان توپاستىق پەن تەكسىزدىك-ازعىندىقتىڭ ءوزى. بەسىكتەن بەلى شىقپاعان قىزداردى مۇنداي ارسىزدىققا قيعىم كەلمەيدى. «مىناۋ ادەيى ويدان ويلاستىرىلعان وقيعا، ومىردە بولۋى مۇمكىن ەمەس» دەپ پىكىر ايتىپ جاتقاندارمەن بىرگە كۇيىپ-جانىپ، تەرلەپ-تەپشىپ بيىل مەكتەپ بىتىرەتىن بىرنەشە بويجەتكەنمەن بايلانىسقا ءتۇستىم.

ايگەرىمنىڭ اڭگىمەسى

ەسىمى ايگەرىم. وقو، جەتىساي قالاسىنىڭ تۇرعىنى.  وقۋشى قىز ءقازىر مەملەكەتتىك ەمتيحانعا دايىندالىپ جۇرگەندىگىن ايتتى. «كويلەكتى ءالى ىزدەمەدىم، ءبىراق تابان توزدىرىپ ىزدەيمىن، قىمبات، جاڭا كويلەك ساتىپ الىپ بەرۋگە اتا-انامنىڭ جاعدايى جەتپەيدى. سول سەبەپتى جالعا الماقشىمىن. 5000-10000 تەڭگەگە شىعاتىن شىعار. ماكياج دا، شاش ارلەۋ دە ءبىزدىڭ جاقتا ارزانداۋ. جالپى، كەش ماۋسىمنىڭ ورتاسىندا بولماق. سول كۇنى قىدىرمايمىز، ۋلاپ-شۋلامايمىز. سەبەبى قۇزىرلى ورگاندار سول كۇندەرى ارنايى رەيد ۇيىمداستىرادى. قىدىرىسقا تىيىم سالىنعان. ال، مۇعالىمدەرگە ارناپ داستارحان جاياتىنىمىز شىندىق. بۇل ماسەلە قانشا رەت كوتەرىلگەنىمەن، تۇبىندە ءبارىبىر تىنىش قانا بۇرىش-بۇرىشتا اقشا جينالىپ جاتىر. ءبىز دە بەرەمىز، ەمتيحان تاپسىرىپ بولعاننان كەيىن ۇستازدار قاۋىمىن قوناق قىلامىز. ءبىر نارسە ايتا كەتەيىن، بىزدە كىشىگىرىم قالاشىق بولعاندىقتان ەشكىم مەكتەپ ءبىتىرۋ كەشىن اسەرىلەمەيدى. سىنىپتاعى قىزداردىڭ جاعدايى مەنىكىندەي. اراسىنان بىر-ەكەۋى شاشىلىپ، جاڭا كويلەك الۋى مۇمكىن. ونىڭ ءوزى 15000-20000 تەڭگەدەن اسپايدى» دەدى ايگەرىم.

ايگەرىم كويلەك پەن اياق-كيىمنىڭ قاتار جۇرەتىنىن ۇمىت قالدىرعان سەكىلدى. الايدا تۋفلي جايلى ءتىس جارماعان قىزعا مەن ريزا بولدىم. ەندەشە، ايگەرىمنىڭ شىعىنىن ەسەپتەپ شىعايىق:

كويلەك 5000-10000 تگ.

ماكياج پە شاش ارلەۋ 5000 تگ.

مۇعالىمدەردىڭ داستارحانى 3000-4000 تگ.

اياق-كيىم ؟

جالپى سوما: 13000-18000 تگ.

التىنايدىڭ اڭگىمەسى

التىناي. الماتىلىق. مەكتەپ ءبىتىرۋ كەشىنە ساقاداي ساي. سويتسەم، قىزىمىزدىڭ كويلەگى دايىن ەكەن.  قازۇۋ-دىڭ جۋرناليستيكاسىنا وقۋعا ءتۇسۋدى ارماندايتىن وعان وتاندىق ءبىر ءانشى ءوزىنىڭ قىمبات كويلەگىن سىيلاپتى. بولاشاق ءجۋرناليستىڭ سۇحبات الۋ مانەرىنە. تالپىنىسىنا ريزا بولعان ءانشىنىڭ سىيعا تارتقان كويلەگى قۇرالاي ءنۇرقادىلوۆانىڭ ديزاينەرلىك جۇمىسى بولىپ شىقتى. باعاسى 350 000 تەڭگە. دارىندى قىز، ءبىراق حالىقتىڭ باسىم بولىگى سياقتى الەۋمەتتىك جاعدايى جاعدايى ورتاشا قىز مەكتەپ ءبىتىرۋ كەشىنە قانشا اقشا جۇمساماق ەكەندىگىن ەسەپتەپ شىعايىق.

كويلەك 0 تگ.

اياق-كيىم 10 000 تگ.

ماكياج 10 000 تگ.

شاش ارلەۋ 10 000 تگ.

تىرناق جاساتۋ 4 000 تگ.

كافەدە وتىرۋ 8 000 تگ.

مەكتەپكە سىيلىق 20 000 تگ.

جالپى سوما:  62000 تگ.

62000 تەڭگە جۇمسايتىن التىنايدىڭ اتا-اناسى جەڭىل قۇتىلعان سياقتى. مۇنداي سيفرانى كورگەن وقىرمان نەسى جەڭىل دەپ تاڭداي قاعۋى مۇمكىن. الايدا ولار كەشكى كويلەك ساتاتىن دۇڭگىرشەكتەردى ارالاپ شىقسا، بىردەن تۇسىنەدى. الماتىداي شاھاردا كويلەكتەردىڭ باعاسى كۇيىپ تۇر. جوق دەگەندە 35000 تگ. ءارى قاراي سيفرلار وسە بەرەدى، وزگەرە بەرەدى. كوپ نارسە، ارينە، تالعام مەن قاناعاتقا بايلانىستى. تەگىن كويلەككە يە بولعان التىنايدىڭ ءوزىنىڭ دە، اكە-شەشەسىنىڭ دە جۇيكەسى جۇقارمايتىن بولدى. التىنايدىڭ ايتۋىنشا، ونىڭ سىنىپتاس قىزدارىنىڭ ءبارى قاراپايىم كيىنەدى. ولار ەرەكشە كەشكە بويانىپ-سىلانباق ەكەن، دەگەنمەن اتا-انالارىنا ەركەلەپ، كويلەك ءۇشىن جىلاپ، قوماقتى قاراجات تالاپ ەتۋ ويلارىندا دا جوق.

مەكتەپكە سىيلىق جاساۋ دەگەندى قايدان شىعاردىڭدار، ونداي دۇنيەلەرگە تىيىم سالىنبادى ەمەس پە دەگەن سۇراققا تۇلەك اششىنىپ جاۋاپ بەردى. «مەكتەپ باسشىلىعى كەتەر كەزدەرىڭدە مەكتەپكە ەستەلىك رەتىندە پەردە الىپ بەرىڭدەر دەپ ايتقان بولاتىن». 30 وقۋشىدان 20000 تەڭگەدەن جيناپ ولار قانداي پەردە الماقشى دەپ تاڭدانعان ماعان التىناي اشىعىن ايتتى.  بەلگىلى ءبىر سوماعا پەردە ساتىپ الىپ، قالعان اقشانى كونۆەرتكە سالىپ ءار مۇعالىمگە سىيلايدى ەكەن جوسپار (تالاپ) بويىنشا.

جامال اپايدىڭ اڭگىمەسى

ەكى قىزدىڭ دا قىسقا اڭگىمەسى اسەرلى بولىپ شىقتى. 5-6 سۇراققا بەرىلگەن جاۋاپتاردا قوردالانعان ماسەلەلەر جاتىر. جامال اپاي سياقتى ەسكى جارانىڭ اۋزىن تىرناپ، قايتادان قوزعاعىم كەلىپ وتىرعان جوق. بۇگىنگى ماسەلە تەك كويلەكتىڭ جايى بولىپ قالسىن. قان قىسىمى جوعارىلاپ نە تومەندەپ كەتكەن وقىرمان بولسا، وز-وزىنە كەلسىن، اشۋلانباسىن، اشىنباسىن. سەبەبى ايگەرىم مەن التىنايدىڭ جاۋاپتارىن ەستي وتىرىپ ولارعا ەرىكسىز ءسۇيسىندىم. قازاقى تاربيە سەزىلىپ-اق تۇر. توقەتەرىن ايتاتىن بولسام، «كويلەككە 150 000 تەڭگە بەر نەمەسە ەركەكپەن جاتامىن» دەگەن اڭگىمە قىپ-قىزىل وتىرىك. قازاقتىڭ قىزدارى عاجاپ. ءومىر عاجاپ.

«قىزدارسكيي» اڭگىمە

ال، ەگەر ارامىزدا مەكتەپ ءبىتىرۋ كەشىندە ەرەكشەلەنبەيتىن بولدىم، كەرەمەت كويلەك الا المادىم دەپ ءۇن-جۇرعاسىن ءتۇسىرىپ وتىرعان قىزدار بولسا، اپكە رەتىندە ايتارىم مىناۋ:-قىزدار، سەندەر توي كويلەگىن ويلاڭدار. ونىڭ كەرەمەتى باعاسىندا ەمەس، اپپاقتىعىندا بولماق...

مىلجىڭ اڭگىمە (sorry!) -2

2018 جىلى سىنىپتاستارىم 10 جىلدىققا كەل دەپ شۋلاپ جاتىر. ولاردىڭ تۇرلەرىن كورمەگەلى دە 10 جىل بولىپتى. كىمنىڭ قاي پارتادا وتىرعانى، اتتارىمەن قوسا اكەلەرىنىڭ تەگىن قوسا بىلەتىن مەن «بارسام با» دەپ قويامىن. كۇيەۋىم بولسا مۇنىما كۇلەدى. 9 جىلدان كەيىن مەكتەپ تۋرالى ويلانا باستاعانىڭ ءبىرتۇرلى ەكەن «قوستانايعا توركىندەتىپ بارعان سايىن مەكتەبىنە نەگە سوقپايسىڭ؟» دەپ. ونى ءوزىم دە بىلمەيمىن. بارلىق سەبەپ ساعىنىشتا شىعار. ساعىنىپ بارىپ كورىسكەندى ۇناتاتىن بولۋىم كەرەك. جالپى، باسقوسۋعا بارماۋىم دا عاجاپ ەمەس. كۇيەۋىڭ رۇقسات ەتپەسە، قوستاناي تۇگىل كورشى ۇيگە بارا المايتىنىڭ انىق. ماقالانى وقىپ وتىرعان ول ويلانار دەيمىن ىشتەي. ءومىر عاجاپ. كۇيەۋىم عاجاپ.

قامشىگەر: جازيرا بايدالى