ەلىمىزدەگى جات اعىمنىڭ ءبىرى يەگوۆا كۋاگەرلەرى. اتالعان ۇيىم مەملەكەتتى دە، مەديسينانى دا مويىندامايتىن، ءوز زاڭى بار ءقاۋىپتى ۇيىمنىڭ ءبىرى. الايدا مەملەكەت تاراپىنان قانشا تىيىم سالىنسادا شىرماۋىقتاي شىرمالىپ، قارماعىنا تۇسكەندەردى وڭايشىلىقپەن بوساتپايدى.

سونىڭ ءبىرى الماتىلىق جىگىت اقىلبەك. ول 2013 جىلى قالاداعى كوللەدجدەردىڭ بىرىندە وقىپ ءجۇرىپ، جات اعىمنىڭ جەتەگىندە كەتكەن دەپ حابارلايدى قامشى اقپاراتتىق اگەنتتىگى Nur.kz پورتالىنا سىلتەمە جاساپ.

«جازدى كۇنى يمامدار وتىرعان بولمەگە ءۇش قازاق ازاماتى كەلىپ، كومەك سۇرادى. ايتۋلارىنشا، «اقىلبەك» ەسىمدى ىنىلەرىنىڭ قۇلاعى ەستىمەيدى ەكەن. سونى پايدالانعان يەگوۆا كۋاگەرلەرىنىڭ مۇشەلەرى، وعان قول قيمىلى ارقىلى يسلام ءدىنىن جامانداپ، وزدەرىنە مۇشەلىككە كىرگىزىپ العان»، - دەيدى الماتى قالاسىنداعى ورتالىق مەشىتتىڭ نايب يمامى نۇرمۇحاممەد يمينوۆ.

يەگوۆا كۋاگەرلەرىنىڭ مۇشەلەرى اقىلبەكتى كوللەدجىنە ىزدەپ بارىپ اينالدىرعان. ولار بوزبالاعا «مۇسىلماندار – كىسى ولتىرگىش، لاڭكەس» دەپ كوزىن بايلاعان. ءتىپتى، ونى سەندىرۋ ءۇشىن قۇرانداعى سۇرەنىڭ 18 اياتىنان مىسال دا كەلتىرەدى. وندا: «سويلەي المايتىن، قۇلاعى ەستىمەيتىن جانە كوزى كورمەيتىندەر اللاعا ورالمايدى. قارا، اللا قانداي قاتىگەز، مۇگەدەكتەر ەش ۋاقىتتا وعان بارا المايدى دەپ» ارباۋلارىنا تۇسىرگەن.

اقىلبەك يەگوۆاعا كىرمەس بۇرىن مەشىتتەردىڭ بىرىنە بارىپ، وسى راس پا دەپ سۇراعان. الايدا يمامدار ونىڭ قول قيمىلى ارقىلى قويعان سۇراعىن تۇسىنبەي، جاۋاپسىز كەتكەن جىگىت يەگوۆاعا مۇشەلىككە كىرەدى.

كەيىن ءبارى انىقتالعاننان كەيىن يمامدار اقىلبەكتى ءبىر اپتادا يسلام دىنىنە قايتارعان.

"اناسى مەن باۋىرلارىنىڭ وتىنىشىنەن سوڭ ءبىز اقىلبەكپەن ساعاتتاپ اڭگىمەلەسۋ جۇرگىزدىك. كوبىنشە جازبا تۇرىندە. وسى جەردە ءبىز يەگوۆالىقتار تەرىس پيعىلمەن قولدانعان سۇرەنىڭ دە سىرىن اشتىق. ول بىلاي: «اللا كوزى كورىپ، قۇلاعى ەستىپ تۇرىپ، جۇرەگىمەن ونى قابىلداماعان جاندى وزىنە قابىلدامايدى. بۇل جەردە ادامنىڭ مۇگەدەكتىگى ەمەس، ونىڭ جان دۇنيەسى جايلى ايتىلعانىن تاپتىشتەپ تۇسىندىردىك. اقىلبەك اللانىڭ 99 ەسىمىمەن تانىسىپ، ونىڭ شەكسىز قۇدىرەتىن، كەشكى نامازدىڭ قاسيەتى تۋرالى ەستىگەندە ءوزىنىڭ تۋرا جولدان تايعانىن ءبىلىپ، يسلام دىنىنە قايتا ورالدى. اقىلبەكتى تۋرا جولعا سالۋ ءۇشىن 20 بەت جازۋ جازدىق»، - دەيدى نايب يمام.

يسلام دىنىنە ورالعان اقىلبەك مەشىتتەگى مەرەكەلەرگە ءجيى كەلىپ تۇرادى. تۋعان دىنىنەن بەزبەس ءۇشىن قالانىڭ باس يمامى وعان قۇران مەن يسلام جايلى جازبالار سىيعا تارتىپتى.