قازاقستان رەسپۋبليكاسى ىشكى ىستەر مينيسترلىگى وسكەلەڭ ۇرپاقتى پاتريوتتىق رۋحتا تاربيەلەۋگە، ولاردىڭ قۇقىقتىق مادەنيەتىن قالىپتاستىرۋعا، ازاماتتىق جاۋاپكەرشىلىگىن ارتتىرۋعا جانە زاڭعا قۇرمەت سەزىمىن نىعايتۋعا باعىتتالعان "جاس ساقشى" پوليسيا سىنىپتارىن دامىتۋ بويىنشا جۇيەلى جۇمىستى جالعاستىرۋدا، - دەپ حابارلايدى Polisia.kz. بۇگىندە ەلىمىز بويىنشا 267 "جاس ساقشى" سىنىبى بار. وندا بەس مىڭنان استام وقۋشى ءبىلىم الادى. بۇل جوبا قوعامدىق قاۋىپسىزدىك ماسەلەسىنە نازار اۋدارىپ، ەلگە قىزمەت ەتۋگە جانە قۇقىق قورعاۋ سالاسىنا قىزىعۋشىلىق تانىتاتىن بەلسەندى جاستاردى ءبىر ورتادا بىرىكتىرەدى. پوليسيا سىنىپتارىنداعى وقۋ ۇدەرىسى وقۋشىلاردىڭ كوشباسشىلىق قاسيەتتەرىن، ءتارتىبىن، مەملەكەتتىك رامىزدەر مەن ۇلتتىق قۇندىلىقتارعا دەگەن قۇرمەتىن دامىتۋعا ىقپال ەتىپ، ەل بولاشاعىنا جاۋاپكەرشىلىكپەن قاراۋعا ۇيرەتەدى. قۇقىق بۇزۋشىلىقتاردىڭ الدىن الۋعا، زاڭعا باعىناتىن مىنەز-قۇلىقتى تاربيەلەۋگە جانە جاستار اراسىندا پوليسەي ماماندىعىن ناسيحاتتاۋعا ەرەكشە نازار اۋدارىلادى. 2025-2026 وقۋ جىلىندا جالپى سانى 52 وقۋشىدان تۇراتىن ءۇش "جاس ساقشى" سىنىبىنىڭ تۇلەكتەرى مەكتەپ ءبىتىردى. ولار ەندى ىشكى ىستەر مينيسترلىگىنىڭ ۆەدومستۆولىق جوعارى وقۋ ورىندارىندا ءبىلىم الۋعا نيەتتى. بۇل جوبا ىشكى ىستەر ورگاندارى ءۇشىن كادرلىق رەزەرۆ قالىپتاستىرۋدا ءوزىنىڭ جوعارى تيىمدىلىگىن كورسەتىپ وتىر. وڭىرلەردە پوليسيا سىنىپتارىنىڭ العاشقى تۇلەكتەرىنىڭ مەكتەپپەن قوشتاسۋ راسىمدەرى ءوتتى. الماتى قالاسىندا پوليسيا دەپارتامەنتىنىڭ باستىعى ايدىن قابدۇلدينوۆ "جاس ساقشى" سىنىپتارىنىڭ تۇلەكتەرىنە سەرتيفيكاتتاردى سالتاناتتى تۇردە تابىستاپ، ولاردىڭ پاتريوتيزم مەن قۇقىقتىق مادەنيەتتى نىعايتۋعا قوسقان ۇلەسىن ەرەكشە اتاپ ءوتتى. اقتوبە وبلىسىندا پوليسيا دەپارتامەنتىنىڭ باستىعى قايىركەن الييەۆ تە بەيىندىك سىنىپ تۇلەكتەرىنە سەرتيفيكاتتار تابىستاپ، جاستاردى ازاماتتىق جاۋاپكەرشىلىك جانە قوعامعا قىزمەت ەتۋ رۋحىندا تاربيەلەۋدىڭ ماڭىزدىلىعىنا توقتالدى. "جاس ساقشى" پوليسيا سىنىپتارىن دامىتۋ ىشكى ىستەر مينيسترلىگىنىڭ جاستاردى پاتريوتيزم، زاڭ جانە قۇقىقتىق ءتارتىپتى قۇرمەتتەۋ رۋحىندا تاربيەلەۋگە باعىتتالعان ماڭىزدى جۇمىستارىنىڭ ءبىرى بولىپ قالا بەرەدى.