«الماتى ساق قورعاندارى» ارحەولوگيالىق پاركىندە الماتى قالاسىنىڭ تۇرعىندارى مەن قوناقتارىنىڭ ساق وركەنيەتىنە قىزىعۋشىلىعىن ارتتىرۋ ماقساتىندا مادەني-تانىمدىق شارا ۇيىمداستىرىلدى دەپ حابارلايدى قامشى اقپاراتتىق اگەنتتىگى. 

قاتىسۋشىلاردى شارانىڭ اشىلۋىمەن قۇتتىقتاعان الماتى قالاسى تۋريزم جانە سىرتقى بايلانىستار باسقارماسىنىڭ باسشىسى ەرلان جايلاۋباي اتالمىش پاركتى قالانىڭ تاريحي كوركى رەتىندە تانىستىردى. «بۇگىن ۇيىمداستىرىلىپ وتىرعان شارانى ءتۋريزمدى جانە قاسيەتتى جەرىمىزدى دارىپتەۋ جولىنداعى پاركىمىزدىڭ جاڭا ءبىر جاڭعىرۋى بەپ بىلەمىز. الداعى ۋاقىتتا قورعاندار كەشەنىن مۇراجايلاندىرۋدى جوسپارلاپ وتىرمىز.  باستاپقى جۇمىستار 2018 جىلى اياقتالادى دەپ كۇتىلۋدە»، – دەدى ەرلان جايلاۋباي.

باعدارلاما اياسىندا شاراعا قاتىسۋشىلار اتاقتى قازاقستاندىق ارحەولوگ رۋسلان شەربايەۆتىڭ جەتەكشىلىگىمەن پارك الاڭىندا ۇيىمداستىرىلعان ارنايى ەكسكۋرسياعا قاتىستى. سونىمەن بىرگە ساداق اتۋ دارىستەرىن الىپ، الاڭدى اباتتاندىرۋعا ارنالعان جاپپاي سەنبىلىككە قاتىسقان قوناقتار ءداستۇرلى پالاۋ مەن كوجەدەن دە ءدام تاتتى.  ودان كەيىن قولونەرشىلەر جارمەڭكەسىنە قاتىسقان قوناقتار «سارمات ابىزى» اتتى تانىمال ارحەولوگيالىق ولجانىڭ رەكانسترۋكسياسىن تاماشالادى.

اتالمىش شارا «الماتى ساق قورعاندارى» ارحەولوگيالىق پاركىن  جەتىلدىرۋ مەن دامىتۋ جانە «تۋعان جەر» باعدارلاماسىن جۇزەگە اسىرۋ ماقساتىندا تۋريستىك اقپارات ورتالىعى تاراپىنان ازىرلەنىپ  جاتقان  شارالار كەشەنىنىڭ العاشقىسى بولدى. «قازاقستاندا نازاردان تىس قالعان كوپتەگەن تاريحي ەسكەرتكىشتەر بار. الماتى ساق قورعاندارى ۇلكەن تۋريستىك الەۋەتكە يە. ونى دامىتۋ كەرەك. وسى سەبەپتى ءبىز بۇقارالىق سەنبىلىكتەن باستادىق. الداعى ۋاقىتتا ينفراقۇرىلىمدىق دامۋ مەن پارككە كوبىرەك كوڭىل تارتۋ ماقساتىندا بۇدان دا اۋقىمدى جوبالاردى جوسپارلاپ وتىرمىز»، – دەپ اتاپ ءوتتى تۋريستىك اقپارات ورتالىعىنىڭ ديرەكتورى اسەل نۇركەبايەۆا.

ءىس-شارا الماتى قالاسى تۋريزم جانە سىرتقى بايلانىستار باسقارماسىنىڭ جانە الماتى قالاسى اكىمدىگى مادەنيەت جانە مۇراعات باسقارماسىنىڭ، الاتاۋ اۋدانى اكىمدىگىنىڭ جانە «كوشپەلى وركەنيەت مۇراسى» حالىقارالىق قوعامدىق قورىنىڭ قولداۋىمەن ءوتتى.

«الماتى ساق قورعاندارى» ارحەولوگيالىق پاركى  (بۇرىنعى «بورالداي ساق قورعاندارى») تۋرالى اقپارات

پارك ەرتە كوشپەلىلەر (ب.ز.ب. VIII-III عع.) ءداۋىرىنىڭ قورىمدارىنان تۇرادى. ۇزىندىعى 3 كم سوزىلعان پارك الاڭىندا 47 ساق قورعانى بار. ولاردىڭ ەڭ ۇلكەنىنىڭ بيىكتىگى 14 مەترگە، ال ديامەترى 100 مەترگە جەتەدى. قورىم تيگراحاۋدا ساقتارىنىڭ پاتشالارى مەن اقسۇيەكتەرىن جەرلەۋ جەرى رەتىندە سالىنعان دەگەن بولجام بار.  2007 جىلدان باستاپ پارك الاڭىندا اشىق اسپان استىنداعى  مۇراجاي سالۋ جۇمىستارى جۇرگىزىلۋدە.

تۋريستىك اقپارات ورتالىعى (تيس) تۋرالى اقپارات

الماتى قالاسىنىڭ تۋريستىك قابىلەتىن ارتتىرۋ جانە قازاقستان مەن شەتەل نارىعىندا قالانى تارتىمدى تۋرىستىك باعىتقا اينالدىرۋ ماقساتىندا 2017 جىلى قۇرىلعان.