53 جاستاعى ەددي حەكمان وسىدان 6 جىل بۇرىن ءوز قىزىنان ايىرىلعان. الايدا ءوز قىزىن ولتىرگەن اداممەن نە ءۇشىن ارالاسىپ جۇرگەنىن ءوزى جازعان كىتاپ ارقىلى 6 جىلدان كەيىن وزگەلەرگە تۇسىندىرگىسى كەلدى.  بولارى بولدى، بوياۋى ءسىڭدى، ەددي ءوز قىزىنىڭ قايتىپ كەلمەيتىنىن جاقسى بىلەدى. قىزىنىڭ ءولىمى قاي اتا-اناعا دا بولسىن اۋىر تيەتنى انىق. ەگەر قىزىن ولتىرگەن ادام بولاتىن بولسا، وندا ءتىپتى كەشىرمەيتىن دە شىعار. ءبىراق بۇل وقيعا ەرەكشە.

وسى كەزدە ەدديدەن ادامدى تۇسىنە بىلەتىن وزگەشە قاسيەت  بايقايسىڭ. ول ءوز قىزىن ولتىرگەن جانمەن ارالاسۋى ارقىلى  جۇرەگىندەگى اۋىر دەرتتى ەمدەۋگە بولادى  دەپ ەسەپتەيدى. ول بولعان وقيعانىڭ بارلىعىن بىلاي بايانداپ بەردى:

مەنىڭ قىزىم رەنسكە ءوزىنىڭ جىگىتى ساماريمەن پوەزدا كەزدەسكەن. ولار نيدەرلانديادان شۆەيسارياعا بارا جاتقان ەدى. ولار تانىسىپ، تەلەفون نومىرىمەن الماسقان.  بارلىعى وسىلاي باستالدى. ولاردىڭ بىر-بىرىنە دەگەن قارىم-قاتىناسى جاقسى بولاتىن. بىر-بىرىنە قامقور بولاتىن، سىيلاي بىلەتىن ەدى.

ءبىراق 2011 جىلدىڭ 13 ساۋىرىندە رەنسكە تۇراتىن بافلودا ءبىر قىزدىڭ قايتىس بولعانىن جاڭالىقتار ارقىلى ءبىلدىم. ءبىراز مينۋتتاردان كەيىن تەلەديداردان ونىڭ پاتەرىنىڭ سۋرەتىن كورىپ، بىردەن پوليسيا قىزمەتكەرىنە حابارلاستىم. تاڭعى ساعات 5-كە امان مەن بولعان جايتتىڭ بارلىعىن بىلگەن ەدىم.

ساماري مەنىڭ قىزىمدى وت سوندىرگىش قۇرال ارقىلى ولگەنشە سوققىعا جىعىپتى. ونى توقتاتپاق بولعان وفيسەردى دە تاپانشامەن اتىپ ولتىرگەن.  پوليسيا قىزمەتكەرلەرى ساماريگە 5 رە وق اتقان. سودان كەيىن ونى اۋىرۋحاناعا جەتكىزىپتى. ءبىز ءساماريدى 2 جىلدان بەرى تانيتىنبىز، ءبىراق بۇنداي قىلىعىن بايقاماپپىز.  سوندىقتان مەن ساماريگە كومەك كەرەك شىعار دەپ ويلادىم. سەبەبى مەن ءساماريدى جاقسى تانيتىن ەدىم، بۇل ارەكەتكە بارعان ساماري ەكەنىنە سەنگىم كەلمەدى.

كەيىن ءبىز ونىڭ قورعاۋشىسىمەن سويلەسىپ، ساماريمەن حات الماسىپ تۇردىق. ول حاتىندا وكىنەتىنىن جەتكىزگەن. قىركۇيەك ايىندا ونىمەن كەزدەسىپ، بولعان جايت تۋرالى سويلەستىك. ونىڭ قاتتى وكىنەتىنىن سول كەزدە انىق بايقادىم.

ولاردىڭ اراسىندا ۇرىس بولىپتى. مەنىڭ قىزىم ءساماريدىڭ كەتۋىنە جول بەرمەي تۇرعان كەزدە ول ونى ۇرىپ جىبەرگەن. ساماري بولعان وقيعاعا دەيىن ءتۇرلى دارىلەر قولدانىپ ءجۇرىپتى. سول دارىلەر ونىڭ جۇيكە جۇيەسىنە اسەر ەتكەن سەكىلدى. ءقازىر ءساماريدىڭ جاعدايى جاقسى. اپپەلياسيا ارقىلى ونىڭ جازا مەرزىمىن 5 جىلعا قىسقارتتىق. ءبىز وعان قولداۋ بىلدىرۋگە ءتيىسپىز.

ەددي حەكمەننىڭ بۇل ارەكەتى تۋرالى كوپشىلىكتىڭ پىكىرى ەكىگە جارىلدى. ءبىراق ەددي ءوز قىزىن قايتارا المايدى. ەدديدىڭ بۇل ارەكەتى ونىڭ جۇرەگىندەگى جارانى ەمدەۋمەن قاتار، ساماريگە دە كومەكتەسە الادى. ءوز قىزىن ولتىرگەن جاندى كەشىرۋ كەز-كەلگەننىڭ قولىنان كەلمەيتىنى دە بەلگىلى. 

اۋدارعان: اسەل وتەشوۆا