ءىس-شاراعا ساياسي قۋعىن-سۇرگىن جانە توتاليتاريزم قۇرباندارىنىڭ تۋىستارى مەن جاقىندارى دا قاتىسىپ، ەلباسىمەن اڭگىمەلەستى دەپ حابارلايدى قامشى اقپاراتتىق اگەنتتىگى اقورداعا سىلتەمە جاساپ.
مەملەكەت باسشىسى ءراسىم اياقتالعان سوڭ ب ا ق وكىلدەرى الدىندا سويلەگەن سوزىندە بۇگىنگى كۇننىڭ قازاقستان تاريحىندا ايرىقشا كۇن ەكەنىن اتاپ ءوتتى.
– 31 مامىردى ءبىز ساياسي قۋعىن-سۇرگىن قۇرباندارىن جالپىۇلتتىق ەسكە الۋ كۇنى رەتىندە اتاپ وتەمىز. ءبىر عانا قازاقستاننىڭ وزىندە سول جىلدارى 103 مىڭنان استام ادام تۇتقىندالىپ، ونىڭ 25 مىڭنان استامى اتۋ جازاسىنا كەسىلدى. قازاق زيالىلارىنىڭ بەتكە ۇستار وكىلدەرىنىڭ، رەسپۋبليكا باسشىلىعىنىڭ تۇگەلگە جۋىعى جويىلدى، – دەدى نۇرسۇلتان نازاربايەۆ.
قازاقستان پرەزيدەنتى ەل ىشىندە سول كەزدە قۋعىن-سۇرگىنگە ۇشىراعان ادامدارعا ارنالعان لاگەرلەر سالىنعانىن ەسكە سالىپ، ونداعى ادام توزگىسىز جاعدايلار تۋرالى اڭگىمەلەدى.
– قازاقستاننىڭ ءار تۇكپىرىندەگى 11 لاگەردىڭ قابىرعاسىندا ادامدار قيناۋ مەن ازاپتاۋ سالدارىنان قازا بولدى. سول لاگەرلەردە ميلليوننان استام ادام جازاسىن وتەدى. ساياسي قايراتكەرلەرمەن قاتار ولاردىڭ جۇبايلارى مەن بالالارى دا قۋعىن-سۇرگىنگە ۇشىرادى. كەيبىر نارەستەلەر سول لاگەرلەردە دۇنيەگە كەلدى، – دەدى مەملەكەت باسشىسى.
نۇرسۇلتان نازاربايەۆ وسى اۋىر كەزەڭدە قازاقستان ونداعان ەتنوس ءۇشىن تۋعان مەكەنىندەي بولعانىن، كوپتەگەن قيىندىقتى باستان وتكەرگەن ولار بۇگىندە ءبىرتۇتاس حالىققا اينالعانىن اتاپ ءوتتى.
– حالقىمىز وسى قايعىلى وقيعالاردى ەستە ساقتاۋعا ءتيىس. مۇنداي قاسىرەت قايتالانباس ءۇشىن ونى بولاشاق ۇرپاق ءبىلۋى كەرەك. بۇگىندە ءبىز قۇقىقتىق جاڭا مەملەكەت قۇردىق. قازاقستاندا ازاماتتاردىڭ قۇقىقتارى مەن بوستاندىقتارى قورعالعان. ءبىزدىڭ ەلدە ساياسي قۋدالاۋعا ورىن جوق. ءبىز ەۆوليۋسيالىق دامۋ جولىن تاڭدادىق، – دەدى قازاقستان پرەزيدەنتى.
مەملەكەت باسشىسى باستان وتكەرگەن كەزەڭدەردى قازاقستان حالقى ءاردايىم ەستە ساقتاپ، بۇگىنگى كۇننىڭ قادىرىنە جەتە ءبىلۋى قاجەتتىگىن ايتتى.
