(قازاق ورتالىق اتقارۋ كوميتەتىنىڭ 1921 جىلعى 10 جەلتوقسان كۇنگى اشارشىلىق تۋرالى كەڭەستەگى ءسوزى)

قىرداعى اۋدانداردىڭ اشتىققا ۇشىراعان تۇرعىندارىنا ناقتى كومەك كورسەتۋدى ۇيىمداستىرۋ تۋرالى م. اۋەزوۆتىڭ بايانداماسى تىڭدالدى. اۋەزوۆ جولداس اشتارعا كومەك كورسەتۋ ۇيىمدارىنىڭ اياعى ءالى قىر ەلىنە جەتكەن جوق. ولاردىڭ تاياۋ ارادا جەتۋى دە نەعايبىل ەكەنىن ايتتى. اۋەزوۆ ونىڭ سەبەبى مىنادا دەپ كورسەتتى:

1. اۋىلداردىڭ تىكەلەي وزىمەن ارالاسا وتىرىپ، ولاردىڭ مۇقتاجدىقتارىن انىقتايتىن بۇل سالاداعى مىندەتتى اتقاراتىن قىزمەتكەرلەر جوق. 2. اشتىققا ۇشىراعان قازاقتار ناقتى ءبىر جەتەكشى ادام بولماسا، ولار اشتارعا ارنالىپ مەملەكەت تا- راپىنان بولىنگەن سىباعانىڭ وزىنە دە قول جەتكىزە الماي- دى، ويتكەنى قازاقتار ءبىر ءۇزىم نان ءۇشىن جات جەردە قول جايىپ قاڭعىپ جۇرگەننەن گورى ۇيىندە ولگەندى ارتىق سانايدى، ءتىپتى كومەك سۇراپ ەل كەزە قالعان كۇننىڭ وزىندە دە قاراڭعى، اڭقاۋ قازاق ولاردى ءوز بەتىمەن ىزدەپ تابا المايدى، كومەككە قولى جەتپەيدى. 3. جەرگىلىكتى جەردەگى اشتارعا كومەك كورسەتۋ ۇيىمى قولتىعىنىڭ استىنداعى، ياعني جاقىن جەردەگى قالالار مەن قالا ماڭىنداعى سەلولارداعى كۇيزەلگەندەرگە ەرەكشە قامقورلىق جاساۋعا تىرىسادى، سوندىقتان دا قالادان شالعاي ورنالاسقان قازاق اۋىلدارى ۇنەمى كەيىنگە ىسىرىلىپ قالادى. شىندىعىنا كوشسەك، اشارشىلىق جايلاعان قىرداعى ەلدىڭ قىرىلعانىنىڭ جانىندا، قالاداعى اشتىقتىڭ ۇرەيلى كورىنىستەرى ويىن سياقتى اسەر ەتەدى. ەگەر دە بۇل اۋدانداردى اشتىقتان قۇتقارۋ ءۇشىن ءدال ءقازىر شۇعىل تۇردە شەشۋشى شارا قولدانىلماسا، وندا قازاق رەسپۋبليكاسى قازاقسىز قالادى. كوپتەگەن اۋداندارداعى قازاقتار كوپتەن بەرى تەك قانا كورتىشقانمەن، تىشقانمەن، سۋىرمەن، تاعى سول سياقتى ۇساق جاندىكتەرمەن وزەگىن جالعاۋدا، سونىڭ كەسىرىنەن ءارتۇرلى جۇقپالى اۋرۋلار مەن ىندەتتەر ەستىپ-بىلمەگەن دەڭگەيدە تارالىپ بارادى.

مۇنىڭ بارلىعى اشتارعا كومەك كورسەتۋ ۇيىمدارىنىڭ قىر ەلىنە جانى اشىمايتىندىعىن، ولارعا نەمكەتتى قارايتىندىعىن كورسەتەدى، سونداي-اق وسىنداي قاسىرەتتى ءورتتى وشىرۋگە قازاق قىزمەتكەرلەرىنىڭ دە بەيعامدىعى بايقالادى. وكىمەت باسىندا وتىرعان قازاق قىزمەتكەرلەرى، بۇل ءىستى ءدال وسى كۇيىندە قالدىرىپ قويۋعا بولمايتىنى ءوز الدىنا، بۇل – سىزدەر ءۇشىن قىلمىس، ءبىز بۇل ءۇشىن قازاق ەلىنىڭ الدىندا، ءوزىمىزدىڭ ارىمىزدىڭ الدىندا جاۋاپتىمىز.

بايانداماسىنىڭ سوڭىندا اۋەزوۆ جولداس قىرداعى اۋداندارعا، اشتارعا كومەك كورسەتۋ شارالارىنىڭ جوسپارىن ۇسىندى، جارىس ءسوز بەن تالقىلاۋدان كەيىن ءىشىنارا وزگەرىستەر مەن تولىقتىرۋلار ەنگىزىلگەن سوڭ بۇل ۇسىنىس قاۋلىنىڭ نەگىزى ەتىپ الىندى.

مۇحتار اۋەزوۆ شىعارمالارىنىڭ ەلۋ تومدىق تولىق جيناعىنىڭ 3-تومىنان الىندى