بۇگىن بىرنەشە ونداعان قازاقستان ازاماتى جۇڭگو ەلشىلىگىنە دات ايتا باردى دەپ حابارلايدى Qamshy.kz ءتىلشىسى.
بەلگىلى بولعانداي قىتايدىڭ الماتىداعى ەلشىلىگىنە جۇڭگو بيلىگى وكىلدەرىنىڭ دەلەگاسياسى كەلىپ، قازاقستان ازاماتتارىنىڭ، قازاقستانداعى جۇڭگو ازاماتتارىنىڭ قۇجاتتىق قيىندىقتارى مەن ماسەلەلەرى تۋرالى بازىنالارىن تىڭدايتىن بولعان. وسىنداي حابارلاما سوڭعى اپتادا الەۋمەتتىك جەلىنى كەزىپ كەتكەن. وسىعان وراي اراسىندا ب ا ق وكىلدەرى بار قاراسى كوپ قاۋىم بۇگىن جۇڭگو ەلشىلىگى الدىنا جينالدى.
ال، راۋشانگۇل ەسىمدى حانىم قازاقستانعا كوشىپ كەلگەنىنە 12 جىل بولعانىن ايتادى. ونىڭ كۇيەۋى قازاقستان ازاماتتىعىن العان قازاق. 23 ناۋرىزدا ۇرىمجىگە تۋريزم كومپانياسىنا جينالىسقا كەتكەن كۇيەۋى سول كۇيى ورالماعان. «كۇيەۋىم جينالىستان سوڭ ءوزىمىزدىڭ اۋىل تۇرپانعا بارعان. سول جەردەن قىتايدىڭ ادامدارى كەلىپ الىپ كەتتى. ودان بەرى 2 اي بولدى. ەستۋىمىزشە قارامايلى تۇرمەسىندە جاتىر ەكەن. مەنىڭ ايتپاعىم ءۇش بالمەن قالدىم. كۇيەۋىمنىڭ قانداي كىناسى بار ەكەنىن ايتپاستان، ەشقانداي ايىپسىز قاماۋدا ۇستاپ وتىر. كۇيەۋىمدى قايتارسا، وتىنەيىن، مەن قينالىپ كەتتىم»، - دەيدى ءۇش بالانىڭ اناسى.
الاۋىراياق كەلىنشەك جازيرا مۇقاش قىزى ەنەسىنىڭ قۇجاتتار شارۋاسىمەن قىتايعا كەتكەنىن، بارعان سوڭ بارلىق قۇجاتتارىن جەرگىلىكتى بيلىكتىڭ الىپ العانىن ايتادى. «ول كىسىنىڭ بارار جەرى، باسار تاۋى جوق دالادا قالدى. ءۇش ايدان بەرى كىمگە جۇگىنەرىمىزدى بىلمەيمىن. ءوزىمنىڭ ازاماتتىعىم قازاقستان ازاماتتىعى. ەنەم جۇڭگو ازاماتى. 98 جىلى قازاقستانعا كوشىپ كەلگەن. بالا-شاعامىز دا تولىقتاي قازاقستان ازاماتى. ەنەم بالا-شاعاسىن اسىرايمىن دەپ قىتايدا 35 جىل پەداگوگ بولىپ زاڭدى تۇردە زەينەتكە شىققان. قۇجاتتارىنىڭ ءبارى دۇرىس بولسا دا بالا-شاعاسىنىڭ ورتاسىنا ەندى كەلىپ-كەتىپ جۇرگەندە ونى جىبەرمەي وتىر. وسىنىڭ سەبەبىن تۇسىندىرسە ەكەن»، - دەيدى كەلىنى.
بۇل جينالعان قاۋىمنىڭ تەك ەكەۋىنىڭ بازىناسى. وسىنداي تالاپ-تىلەگى بار ەلدىڭ قاراسى كوپ. ءتۇرلى وبلىستار مەن اۋىلداردان دا ءجيى حابارلاسادى.
60-قا جاقىن ادام تالاپ-ارىز جازىپ قول قويعان حات جۇڭگو ەلشىلىگىنە تابىستالعان. حالىق الدىنا شىققان دەلەگاسيا وكىلى تەك حاتتى الىپ كىرىپ كەتكەن. ەشقانداي دا تۇسىنىكتەمە جاساماعان. ەلشىلىك عيماراتىنا دەلەگاسيا وكىلدەرىمەن كەزدەسۋ ءۇشىن «جەبەۋ» رەسپۋبليكالىق قوعامدىق بىرلەستىگى وكىلدەرى مەن بىرنەشە ازامات كىرگەن.
ەرلان تولەۋباي
قحر دەلەگاسيا وكىلدەرىنە
قازاقستان رەسپۋبليكاسىنىڭ
ازاماتتارى اتىنان
قۇرمەتتى دەلەگاسيا وكىلدەرى!!! قازاقستان رەسپۋبليكاسى مەن جۇڭگو حالىق رەسپۋبليكاسى ەجەلدەن تاتۋ كورشى، ءارى دوس ەل. ءبىز وسىعان دەيىن جۇڭگو حالىق رەسپۋبليكاسىندا تۋىپ ءوسىپ، قحر ءادىل ساياساتى استىندا ەمىن-ەركىن، باياشاتتى ءومىر ءسۇرىپ كەلدىك، وسى ۋاقىتقا دەيىن تومەندەگىدەي زاڭنان تىس، ادامداردىڭ قۇقىعىن شەكتەگەن جاعدايلاردى كورمەگەن ەدىك.
تومەندە قحر شۇار-عا قاراستى اۋدان- ايماق جەرگىلىكتى وكىمەتى تاراپىنان جاسالىپ وتىرعان زاڭسىز ساياساتتارى تۋرالى سىزدەرگە مالىمدەيمىز؛
- قازاقستان رەسپۋبليكاسىندا ءتۇرلى كاسىپپەن اينالىسىپ جاتقان، قولدارىندا زاڭدى ءتولقۇجاتتارى بار قازاق ازاماتتارىنىڭ ءتولقۇجاتتارىن بەلگىسىز سەبەپپەن جيىپ الىپ، ءتۇرلى سىلتاۋلارمەن ۋاقىتىندا ءتولقۇجاتتارىن قايتارىپ بەرمەي وتىر، بۇل قحر ازاماتتاردىڭ شەتەلگە ەمىن-ەركىن كىرىپ-شىعۋى زاڭناماسىنا قايشى كەلىپ وتىر؛
- ءبىر وتباسىنىڭ بارلىق ءتولقۇجاتتارىن جيناپ الىپ، ىشىندەگى ءبىر مۇشەسىنە بەرمەي، ولاردىڭ قازاقستانعا وتباسىمەن تولىق شىعۋىنا تيىم سالىپ وتىر؛
- ءتولقۇجاتتاردى تولىق جانە ۋاقىتىندا بەرمەۋ سەبەپتى الىپ قويعان ۆيزا كەزەگىنە ۋاقىتىندا بارا الماي، ۆيزا اشتىرۋىنا كەدەرگى بولىپ وتىر؛
- قحر دا زەينەتكە شىعىپ، زاڭدى تۇردە قازاقستان رەسپۋبليكاسىنا كوشىپ كەلگەن زەينەتكەرلەردى بەلگىسىز سەبەپپەن قايتادان شاقىرىپ الىپ، ولاردى قازاقستاندا تۇراقتى تۇرۋىنا رۇقسات بەرمەي، وتباسىنان ايىرىپ تەك قحر-دا تۇرۋعا ماجبۇرلەپ وتىر، ەگەردە ولار قحر-عا بارماسا جانە قحر ازاماتتىعىنان شىعىپ ق ر ازاماتتىعىن قابىلداسا ولاردىڭ زەينەت اقىسىن توقتاتىپ وتىر، بۇل تۋرالى قحر زاڭىندا شەت ەل ازاماتتىعىن العان ازاماتتاردىڭ زەينەت اقىسى توقتاتىلمايتىنى انىق جازىلعان؛
- قحر-نىڭ قازاقستانداعى ەلشىلىگى تەك قازاقستاننىڭ جەرگىلىكتى تۇرعىندارىنا عانا توپتىق ۆيزا بەرىپ، قحر-نان كەلىپ قازاقستان ازاماتتىعىن العاندارعا بەلگىسىز سەبەپتەرمەن ۆيزا بەرمەي وتىر؛
- قحر-نان كەلىپ قازاقستان ازاماتتىعىن العاندارعا ۆيزا بەرۋ ءۇشىن قحر دان تۋىستىق بايلانىسى تۋرالى انىقتاما تالاپ ەتىپ وتىر، ءبىراق بۇل انىقتامانى قحر جەرگىلىكتى وكىمەتى بەرمەي وتىر؛
- قازاقستان رەسپۋبليكاسىنىڭ ازاماتتىعىن العان ادامداردىڭ قحر جەرگىلىكتى وكىمەتى شاقىرتىپ الىپ، ولارعا ءوزى تۇرعان ورىننان تىركەۋىن (ناپوسىن) ءوشىرۋىن تالاپ ەتىپ وتىر، بۇل قحر زاڭى بويىنشا ازاماتتاردى تىركەۋدەن ءوشىرۋ جەرگىلىكتى وكىمەتتىڭ قۇزىرىنداعى جۇمىس.
- قحر داعى قازاق قانداستارىمىزعا ءتۇرلى ۇرەي تۋدىراتىن، اۋىزشا بۇيرىقتار جاساپ ولارعا قازاقستانداعى تۋىس-تۋعاندارىمەن بايلانىس ورناتپاۋعا، Wechat، WhatsApp سياقتى بايلانىس قۇرالدارىنداعى توپتاردان شىعۋعا ماجبۇرلەپ، ۇلتتىق مەرەكەلەرمەن قۇتتىقتاۋعا تىيىم سالىپ، حالىقتى ۇرەيلەندىرىپ قازاقستان مەملەكەتىن جەرگىلىكتى قالىققا قورقىنىشتى ەتىپ كورسەتۋدە؛
- قحر-داعى قازاق ازاماتتار بالالارىن قازاقستاننىڭ بالا-باقشالارىندا، مەكتەپتەرىندە، جوعارى وقۋ ورىندارىندا وقىتۋىنا تىيىم سالىپ وتىر، ءارى قازاقستاندا وقىپ جاتقان وقۋشىلاردى قايتا شاقىرىپ جاتىر؛
جوعارىداعى قولدان جاسالىپ وتىرعان زاڭسىزدىقتار قحر –نىڭ حالىقارالىق بەدەلىنە نۇقسان كەلتىرىپ، قحر-دى شەتەلگە قورقىنىشتى، ديكتاتۋرالىق قاتىگەز مەملەكەت رەتىندە كورسەتىپ وتىر ءارى ەكى ەل ازاماتتارىنىڭ ساۋدا-ساتتىق، ىسكەرلىك ارىپتەستىگىنە قيىندىق تۋدىرىپ وتىر.
قۇرمەتتى دەلەگاسيا وكىلدەرى سىزدەردەن وسى زاڭسىزدىقتاردىڭ قاتاڭ تەكسەرىپ، جاۋاپتى ادامداردى جازالاپ، ەكى ەل دوستىعىن ودان ارى نىعايتۋ، حالىقارالىق بايلانىستى قالپىنا كەلتىرۋ جولىندا ءوز ىقپالدارىڭىزدى كورسەتۋلەرىڭىزدى سۇرايمىز!!!
