بۇگىن «نۇر وتان» پارتياسىنىڭ ورتالىق اپپاراتىندا پارتيا ءتوراعاسى ءبىرىنشى ورىنباسارىنىڭ جەتەكشىلىگىمەن «2016-2019 جىلدارعا ارنالعان «دەنساۋلىق» مەملەكەتتىك باعدارلاماسىنىڭ ىسكە اسىرىلۋى تۋرالى» پارتيالىق تىڭداۋلار ءوتتى.

اتالعان باعدارلامانى جۇزەگە اسىرۋ ارقىلى 2021 جىلعا قاراي قازاقستاندىقتاردىڭ ءومىر ءسۇرۋ ۇزاقتىعىن 73 جاسقا دەيىن كوتەرۋ، ال ءولىم دەڭگەيىن 10 پايىزعا تومەندەتۋ كوزدەلگەن. بۇل مىندەتتەردىڭ بارلىعى 2016 جىلدان باستاپ جۇزەگە اسىرىلا باستاعان «دەنساۋلىق» مەملەكەتتىك باعدارلاماسىنا ەنگىزىلگەنىن دە اتاپ وتكەن ءجون. وسىعان وراي اتقارىلعان جۇمىستار جايىندا دەنساۋلىق ساقتاۋ ءمينيسترى ەلجان ءبىرتانوۆ بايانداما جاسادى.

«مەملەكەتتىك باعدارلامانى جۇزەگە اسىرۋدىڭ 2016 جىلعى الدىن الا قورىتىندىسى بويىنشا نەگىزگى كورسەتكىشتەر كوڭىل قۋانتادى. ماسەلەن ءومىر ءسۇرۋ ۇزاقتىعى، حالىق دەنساۋلىعىنىڭ يندەكسى، تۇرعىنداردىڭ مەليسينالىق كومەك ساپاسىنا قاناعات دەڭگەيى بويىنشا وڭ وزگەرىستەر بايقالادى»، – دەدى ە.ءبىرتانوۆ.

قازىرگى تاڭدا باعدارلامانى جۇزەگە اسىرۋ بارىسىندا 34 كورسەتكىشتىڭ 30-دان استامى ورىندالعان. ءىس-شارا بارىسىندا پارلامەنت ءماجىلىسىنىڭ دەپۋتاتى، «نۇر وتان» پارتياسى سايلاۋالدى باعدارلاماسىنىڭ «دەنساۋلىق ساقتاۋ» باعىتى بويىنشا كۋراتورى زاۋرەش امانجولوۆا مەن الەۋمەتتىك مەديسينالىق ساقتاندىرۋ قورىنىڭ ءتورايىمى ەلەنا باحمۋتوۆا بايانداما جاساپ، اتقارىلعان جۇمىستار جايىندا ناقتى دەرەكتەر كەلتىردى.

وتىرىسقا قاتىسقان ءماجىلىس دەپۋتاتتارى، «نۇر وتان» پارتياسى فراكسياسىنىڭ مۇشەلەرى اتالعان سالاعا قاتىستى مينيسترگە ساۋالدارىن جولدادى.

«ءبىرىنشى بايلىق – دەنساۋلىق» دەگەن حالقىمىز ونىڭ ادام ءومىرى ءۇشىن ەڭ ماڭىزدى ەكەنىن جاقسى بىلگەن. سول سەبەپتى ەلىمىزدە دەنساۋلىق ساقتاۋ ءىسىنىڭ ماڭىزى ەشقاشان تومەندەگەن جوق. ونىڭ ۇستىنە قازاقستاننىڭ ەڭ دامىعان 30 ەلدىڭ قاتارىنا قوسىلۋدى ماقسات تۇتىپ وتىرعانىن ەسكەرسەك، اتالعان سالانىڭ قىزمەت ساپاسىن ارتتىرۋ، ادام ءومىرىن ساقتاۋ سياقتى وزەكتى ماسەلەلەر كۇن تارتىبىندە وزدىگىنەن الدىڭعى ورىنعا شىعادى. سوندىقتان «نۇر وتان» پارتياسىنىڭ وسى سالاعا ايرىقشا دەن قويىپ، مەملەكەت باسشىسى تاپسىرعان باستامالاردىڭ جۇزەگە اسىرىلۋىن قاتاڭ قاداعالاۋى كوڭىل قۋانتادى.