كەيدە كۇتپەگەن كەزدەسۋلەر ادامنىڭ ءومىرىن 360 گرادۋسقا وزگەرتۋى مۇمكىن. دەن ەسىمدى قارتايعان ەر ادامنىڭ وقيعاسى سوعان دالەل.

تارا ۆۋد ەسىمدى فەيسبۋك قولدانۋشىسى باسىنان وتكەن اسەرلى وقيعا جايىندا وقىرمانىمەن ءبولىستى. 40 جاستاعى جازۋشى ايەل كۇيەۋىمەن 7 بالانى ءوسىرىپ وتىر. بىرنەشە كۇن بۇرىن ونىڭ نورا ەسىمدى قىزى 4 جاسقا تولدى.

تۋعان كۇنىنە ءبىر كۇن قالعاندا اناسى مەن قىزى ەگدە جاستاعى ەر اداممەن تانىسىپ، وعان قامقور بولۋدى شەشەدى. جانە بۇل شەشىمدى نەبارى 4-تەگى قىز قابىلداعان. اناسى قىزىنىڭ اقىل-ويىنىڭ دامىپ ۇلگەرگەنىنە ىشتەي ماقتانادى.

بۇل جايىندا تارا «اتا-انانىڭ ءبىر كۇنى» توبىنا جازدى: «قىزىمنىڭ تۋعان كۇنىنە ءبىر كۇن قالعاندا ءبىزدىڭ ارامىزدا كەرەمەت اڭگىمە بولدى. قىزىم قارت ادامداردى جاقسى كورەتىنىن ايتتى، سەبەبى ولاردىڭ تەرىسى جۇمساق، اقىرىن قوزعالادى، ولىمگە ءبىر تابان جاقىن بولادى، سول ءۇشىن ولاردى بارىنشا جاقسى كورىپ، قامقورلىق تانىتۋ كەرەكتىگىن قىزىم جاقسى بىلەدى».

تۋعان كۇنىنە وراي نورا اناسىمەن دۇكەن ارالاۋعا شىعادى. اناسى ءبىراز ۋاقىتقا عانا باسقا جاققا بۇرىلىپ قالعان. كەيىن قىزىنا قاراسا، نورانىڭ بەلگىسىز قارت ادامعا قولىن بۇلعاپ تۇرعانىن كورەدى.

«سالەم، قاريا! بۇگىن مەنىڭ تۋعان كۇنىم»، دەپ ايقاي سالدى. تارا قىزىنىڭ قىلىعىنا ۇيالىپ كەتەدى.

الگى قارت ادامنىڭ جانىنا بارىپ كەشىرىم سۇراي بەرگەندە ەر ادامنىڭ ىستەگەن ءىسى ايەلدى قايران قالدىردى.

«سالەم، كىشكەنتاي حانشايىم! ءيا، نەشەگە تولدىڭ؟» دەدى قاريا قىزدىڭ جانىنا بارىپ. ەكەۋىنىڭ اڭگىمەسى ءتىپتى جاراسىپ-اق كەتتى. اتا قىزدى تۋعان كۇنىمەن قۇتتىقتاپ، قوشتاسىپ كەتە باردى.

قىز بۇنىمەن توقتاعان جوق. جاڭادان تانىسقان اتاسىمەن سۋرەتكە تۇسكىسى كەلدى. بۇعان قاريا قۋانا كەلىستى. قوشتاساردا نورا قاريانىڭ ءاجىم باسقان قولدارىن يىسكەپ، ءسۇيىپ الدى. ايەل ادام ونىڭ اتىن سۇراعاندا، دەن دەپ جاۋاپ بەردى.

كەتەرىندە قاريا ءوزىن ءبىر ساتكە باقىتقا بولەگەن نوراعا العىسىن جاۋدىردى.

بۇل وقيعانى تارا بىردەن فەيسبۋككە جازادى. بۇل جازباسىنا جاۋاپ رەتىندە ءبىر ايەلدەن حات كەلەدى. حاتتا دەننىڭ ايەلى بىرنەشە اي بۇرىن قايتىس بولعانى، بۇگىندە قاريانىڭ قاتتى جالعىزسىراپ جۇرگەنى جازىلعان. حاتتى وقىعان تارا قاريانىڭ ءنومىرىن سۇراستىرىپ، وعان حابارلاسۋدى ءجون كوردى.

«ءبىز دەن مىرزانىڭ قاراپايىم عانا ۇيىنە كەلدىك. ءۇيدىڭ ءار بۇرىشى ونىڭ قايتىس بولعان ايەلىن ەسكە سالادى. قاريا ءبارىن دايىنداپ قويعان. ءتىپتى نوراعا ارناپ كىشكەنتاي ۇستەل مەن سۋرەت سالۋعا ارنالعان قارانداش-پاراقتارى دا دايىن. كەيىن نورانىڭ سالعان سۋرەتىن ءوزىنىڭ توڭازىتقىشىنا ءىلىپ قويدى»، دەپ جازدى تارا.

دەن مىرزا كوپ سويلەگىش نورانىڭ ءار ءسوزىن جالىقپاستان مۇقيات تىڭدادى. اناسى مەن قىزى قارت ادامنىڭ ۇيىندە 3 ساعاتتاي بولدى.

بۇگىندە نورا دەن مىرزانىڭ جاعدايىن ءجيى سۇراپ تۇرادى. ول دا جاڭا تانىسقان دوسىن ەشقاشان ۇمىتقان ەمەس. ەر ادام ايەلى ولگەن سوڭ ومىرىندە ءبىرىنشى رەت جانى جاي تاپقانىن ايتادى.

«بۇل ەكى ادامنىڭ جاس ايىرماشىلىعى – 70 جىل. الايدا ءبىر-بىرىن مۇلدەم تانىماعان ەكى ادام ايىرىلماستاي دوستارعا اينالدى»، دەيدى تارا.

شولۋشى: گۇلىم جاقان