ماسكەۋ قور بيرجاسى تاريحىندا ەۋرونىڭ رۋبلگە شاققانداعى باعامى العاش رەت قىمباتتاپ، بۇگىن ساۋدا بارىسىندا 54 رۋبلگە دەيىن جەتتى. رەسەي ءرۋبلى ەۋرو مەن اقش دوللارىن قوسا العانداعى بيۆاليۋتالىق باعام بويىنشا دا ارزانداي ءتۇستى. بۇلاي دەپ Baq.kz حابارلاپ وتىر.

رەسەي ورتالىق بانكى بۇگىن ەرتەڭگىلىك ساۋدا-ساتتىقتىڭ العاشقى مينۋتتارىندا ءرۋبلدىڭ قۇنسىزدانۋىن تەجەۋ ءۇشىن ينتەرۆەنسيا كولەمىن ءبىر جارىم ميلليارد اقش دوللارىنا كوبەيتكەن. بۇل سوما ۆاليۋتا سەكسياسىنداعى ساۋدا كولەمىنىڭ تەڭ جارىمىن قۇرايدى. بۇگىن رەسەي ورتالىق بانكى ۆاليۋتا جۇبى باعامىنىڭ شەگىن 35 تيىنعا دەيىنگى شاماعا ەركىن جىبەرگەن. ۆاليۋتا جۇبى باعامىنىڭ شەگى قازان ايىنىڭ باسىنان بەرى وسىمەن ون بەسىنشى رەت وزگەرتىلىپ وتىر. ال وسى مەرزىم ىشىندە ۆاليۋتا جۇبىنىڭ باعامى 3 رۋبلگە دەيىن وسكەن.

ساراپشىلار رەسەي ءرۋبلىنىڭ قۇنسىزدانۋ ءۇردىسىن الەمدە مۇناي باعاسىنىڭ ارزانداۋىمەن، سىرتقى ساياسي جاعدايلار، ونىڭ ىشىندە ۋكرايناداعى داعدارىسقا قاتىستى رەسەيگە قارسى سالىنعان سانكسيالارمەن بايلانىستىرادى.

ال، قازاقستان ۆاليۋتاسىنا ورىس سومى باعامىمەن اقش دوللارىنىڭ نارىقتاعى قۇنى تىكەلەي ىقپال ەتەدى. ەگەر رەسەي رۋبل جالعاستى قۇنسىزدانۋعا ۇشىراسا بۇل قازاق تەڭگەسىنە جاقسى اسەر ەتپەۋى مۇمكىن. الايدا، وتكەن اپتادا ۇلتتىق بانك تەڭگەنىڭ جاقىن ۋاقىتتاردا قۇنسىزدانبايتىنى تۋرالى اقپارات تاراتقان بولاتىن.

قامشى-اقپارات