كورەسىنى كورشىنىڭ كينوسىنان كوردىك. كورمەيتىندى دە... قازاقتى تىلىمەن بەزەگەندەر ەندىگى كەزەكتە كينوسىن كەزەپ تۇر. بوراتپەن باستالعان بۇلىكتىڭ نامىسىمىزدى سۇلىكتەي سورعانى ازداي ارنامىزعا تاعى ءبىر جاڭالىق كەلىپ ءتۇستى. وت الا كەلگەن ورىستار. تابان استى تاڭعاجايىپ تۋدىرۋدان جالىقپايتىن رەسەيلىكتەر جاقىندا باس بالۋاندارى يۆان پوددۋبنىي جايلى ءفيلمدى جارىققا شىعاردى. بالۋاننىڭ باعاسىن بوياماسىز بەرۋگە تىرىسقاندىقتارى سونشالىق ءتىپتى اسىرا سىلتەپ جىبەرىپتى. تىرىسىندە وزىنەن اسىرا سىلتەي الماعان بالۋانىن جەردە جاتقاندا جىققان رەجيسسەرگە نە جورىق. ورىس بالۋانىنىڭ تۇلعالىق بولمىسىن اشۋدا «اشۋعا» بۋلىققان گلەب ورلوۆ قاجىمۇقان رولىنە قاجىعان بىرەۋدى ويناتىپ مۇقىم ەلگە ماسقاراسىن شىعارادى. ءتىپتى تۇرىك بالۋانى دەپ تانىستىرىپ،كۇرەستەن ۇلەسى جوق كەيىپتە كورسەتەدى. ءتۇر ءتۇسى قازاققا قوسىلمايتىن اكتەرعا الىبىمىزدىڭ ءرولىن بەرىپ، ابىرويعا قارىق قىلدى. ول كينونى كورگەن كۇرەستەن حابارى از ادامدار قاجىمۇقان جايلى سولار سالعان كوزقاراستا قالۋى ابدەن مۇمكىن. ارەنادا پوددۋبنىيدىڭ قاجىمۇقاندى اينالدىرا الىپ جىققاندا اقىل ەسىنەن اجىراپ قالاتىن ءساتى ناعىز وتقا ماي قۇيعان ەپيزود بولدى.
تاريحقا كوز جۇگىرتەتىن بولساق جاعىمسىز جاڭالىقتىڭ جالعاندىعىنا كوز جەتكىزەمىز. يۆان مەن قاجىمۇقان اراسىنداعى شىنايى سەرىلەرگە ءتان سىيلاستىقتىڭ بولعاندىعىنا كۋا بولامىز. ءتىپتى،ورىس اعايىندار قاجىمۇقاندى «قارا يۆان» دەپ اتاعان. بولعان بەلدەسۋلەردىڭ وزىندە باس بالۋاندار بىر-بىرىنە بوي بەرمەگەن. ءوز ومىرىندە وزىنەن وزگەنىڭ ۇستەمدىگىن كورمەگەن بالۋانعا گلەب ورلوۆتىڭ ات ۇستىنەن قارارلىق ءجونى جوق ەدى عوي؟! تاريحي وقيعالارعا بايلانىستى كينولارعا ايدان انىق نارسەلەردى تۇمشالاپ بۇركەۋدىڭ نە قاجەتى بار؟ سالماقتى تاريحي تاقىرىپقا جەڭىل كوزقاراسپەن قارايتىن نە قىلعان رەجيسسەر؟ شەت ەلدىك رەجيسسەرمەن بىرىگىپ تۇسىرسە ءبىر ءسىرا...
ايتپاقشى سول فيلمنەن ءوزىمىزدىڭ قازاق ءارتىسىن دە كورىپ قالدىق. «بالالىق شاعىمنىڭ اسپانى» ت.ب تاڭداۋلى كينولارعا تۇسكەن داۋلەت ءابدىعاپپاروۆتى. ول تۇرىك بالۋانى كارا احمەت پاشانىڭ ءرولىن سومدايدى. سول فيلمگە تۇسكەن بالۋان دەنەلى داۋلەتتىڭ دە بالۋانىمىزدان حابارى بولماعاندىعى ما،دەگەن وي كەتەدى... ۋ دى ۋ قايتارادى. قازاقفيلم قاجىمۇقان جايلى فيلم ءتۇسىرۋ جۇمىستارىنا كىرىسىپ، اكتەرلەرگە كاستينگ جاريالاعانىن حابارلايدى الماتى تەلەارناسى. تەك اياعى «بوراتقا جاۋاپ» جۇمىسىن جاۋاپسىز قالدىرعان راقىشيەۆ رەجيسسەرداي بولماسا.
ورحان باقىتبەكوۆ.
