الماتى-تالعار تاس جولىنداعى قۇرىلىس زاتتارى ساقتالعان قويما ورتەنىپ جاتىر. ءورت تۋرالى حابارلاما تاڭعى ساعات 6:37-دا تۇسكەن، - دەپ حابارلايدى قازاقپارات.
ءتىلسىز جاۋ بىرنەشە كونتەينەر مەن قويمالاردى، اكىمشىلىك عيماراتتى شارپىعان. وقيعا ورنىندا جۇمىس جاساپ جاتقان جەدەل قىزمەت وكىلدەرىنىڭ ايتۋىنشا، قويما ماڭىنداعى ۇيلەرگە دە وت تيگەن.
ءورت كولەمى 700 شارشى مەتر اۋماقتى شارپىعان. قۇرىلىس ماتەريالدارى ساقتالعان بىرنەشە كونتەينەر مەن 2 جۇك كولىگى مەن تراكتور، ەلەكتروكار تۇگى قالماي جانىپ كەتتى.
ەستەرىڭىزگە سالا كەتەيىك، وسىعان دەيىن دە الماتى قالاسىنداعى بازارلاردا بىرنەشە رەت ءورت شىعىپ، سالدارىنان جۇزدەگەن ميلليون تەڭگەنىڭ تاۋارلارى كۇيىپ كەتىپ ەدى.
پىكىر قالدىرۋ