مەملەكەت باسشىسى جازۋشىلار وداعىن 80 جىلدىق مەرەيتويىمەن قۇتتىقتادى. بۇل تۋرالى akorda.kz حابارلادى.

ەلباسى ءوز قۇتتىقتاۋىندا جازۋشىلار وداعىن 700-دەن استام قازاقستاندىق اقىن-جازۋشىنىڭ باسىن قوسقان ەلىمىزدەگى ەڭ العاشقى جانە ەڭ ءىرى شىعارماشىلىق بىرلەستىكتەردىڭ ءبىرى ەكەنىن اتاپ ءوتتى.

«بۇل – ەلىمىزدىڭ مادەني ءومىرىنىڭ دامۋىنا، مورالدىق جانە رۋحاني قۇندىلىقتاردىڭ نىعايا تۇسۋىنە، جاستار تاربيەسىنە زور ۇلەس قوسىپ وتىرعان ىرگەلى ۇجىم. جازۋشىلاردىڭ بۇگىنگى بۋىنى – قازاقستان ادەبيەتىنىڭ كەشەگى اباي قۇنانبايەۆ، جامبىل جابايەۆ، شاكارىم قۇدايبەردييەۆ، مۇحتار اۋەزوۆ، ساكەن سەيفۋللين، ءىلياس جانسۇگىروۆ، عابيت مۇسىرەپوۆ، موريس سيماشكو، يۆان ششەگوليحين سىندى كوپتەگەن كورنەكتى تۇلعالارىنىڭ باعا جەتپەس مۇرالارىن لايىقتى جالعاستىرۋشى ءىزباسارلارى»، – دەلىنگەن قۇتتىقتاۋدا.

قازاقستان پرەزيدەنتى سونداي-اق مەملەكەتىمىز تاۋەلسىزدىكتىڭ العاشقى كۇندەرىنەن جازۋشىلارعا قولداۋ ءبىلدىرىپ، قوعامداعى شىعارماشىلىق ورتا مەن جاسامپازدىق رۋحتى قالىپتاستىرۋعا ۇدايى قامقورلىق جاساپ كەلە جاتقاندىعىنا توقتالىپ ءوتتى.

«ادەبيەت سالاسىنداعى مەملەكەتتىك سىيلىق بار، جاس تالانتتارعا مەملەكەتتىك «دارىن» جاستار سىيلىعى بەرىلەدى. جىل سايىن قالامگەرلەرگە پرەزيدەنتتىك جانە مەملەكەتتىك ستيپەنديالار تاپسىرىلادى. مەملەكەتتىك تاپسىرىس اياسىندا قازاقستاندىق ۇزدىك اۆتورلاردىڭ جۇزدەگەن كىتاپتارىن شىعارۋ يگى ۇردىسكە اينالعان»، – دەدى نۇرسۇلتان نازاربايەۆ.

مەملەكەت باسشىسى رۋحاني كەمەلدەنۋ، جالپىۇلتتىق قۇندىلىقتاردى دامىتىپ، بەيبىتشىلىك پەن كەلىسىمنىڭ اسىل مۇراتتارىن ۇلىقتاۋ  – «قازاقستان-2050» ستراتەگياسىنىڭ باستى مىندەتتەرىنىڭ ءبىرى ەكەنىنە نازار اۋداردى. بۇل ورايدا، جاڭا قازاقستاندىق ءپاتريوتيزمدى قالىپتاستىرۋعا بەلسەنە ارالاساتىن زيالى قاۋىم وسى مىندەتتەردى ورىنداۋدا شەشۋشى رولگە يە بولۋى ءتيىس.

سوڭىندا قازاقستان پرەزيدەنتى جازۋشىلار وداعىنىڭ الداعى ۋاقىتتا دا زيالىلارىمىزدى ۇيىستىرا بەرەتىنىنە سەنىم ءبىلدىرىپ، ونىڭ مۇشەلەرىنە زور دەنساۋلىق، بەرەكە-بىرلىك، شىعارماشىلىق تابىستار جانە سۇبەلى تۋىندىلاردى ومىرگە اكەلۋلەرىن تىلەدى.

ايدار ورىسبايەۆ.

دەرەك: akorda.kz.

سۋرەت: livejournal.com.