ديداكتيكالىق ادەبيەت – عىلىمي، فيلوسوفيالىق، مورالدىق، ءدىني يدەيالاردى؛ ۋاعىز، عيبرات ويلاردى بىلدىرەتىن شىعارمالار. ديداكتيكالىق ادەبيەتتە كوركەم سۋرەتپەن بەينەلەۋدەن گورى بايلام، پىكىر، تۇجىرىمعا؛ وقىرمانعا ويدى، يدەيانى اسەرلى جەتكىزۋگە ەرەكشە ءمان بەرىلەدى. ديداكتيكالىق ادەبيەتتىڭ تاريحى دا باي، ۇلگىلەرى دە كوپ. فولكلور ماتەريالدارى، حالىقتىڭ اڭىز-اڭگىمەلەرى نەگىزىندە جازىلعان ديداكتيكالىق ادەبيەتتەر وتە كوپ. اسىرەسە، ديداكتيكالىق كوركەمسوزدە ماقال-ماتەلدەردىڭ، اقىل، ناقىل سوزدەردىڭ، ەرتەگى، ەپوستاردىڭ اسەرى كۇشتى. ءۇندى ادەبيەتىنىڭ «ماحابحاراتا»، «پانچا-تانترا» تۋىندىلارىندا بۋدديزم يدەيالارى ناسيحاتتالعان. كونە شىعىس ادەبيەتىندە ديداكتيكالىق ادەبيەت ەرەكشە ورىن الادى. بۇنى ومار ھاييام، ساعدي، ءجامي، رۋداكي، نيزامي، فيرداۋسي مۇرالارىنان كورۋگە بولادى. قازاق ادەبيەتىندە ابايدىڭ قارا سوزدەرى، پوەمالارى – شىعىستىڭ ديداكتيكالىق ادەبيەتىنىڭ جالعاسى. ەۋروپا ادەبيەتىندە لۋكرەسييدىڭ «زاتتار تابيعاتى تۋرالى»، گوراسييدىڭ «پوەزيا عىلىمى»، بۋالونىڭ «پوەتيكالىق ونەر» اتتى شىعارمالارى سەكىلدى ديداكتيكالىق ادەبيەت ۇلگىلەرى بار. ەزوپ، لافونتەن، كرىلوۆ سىندى مىسالشىلار، ە. روتتەردامسكيي، م. ليۋتەر، ت.ب. جازۋشىلار ديداكتيكالىق شىعارمالار جازعان. ادەب.: اۋەزوۆ م.و. اباي قۇنانبايەۆ. – ا.، 1967؛ تيموفەيەۆ ل.ي. وسنوۆى تەوريي ليتەراتۋرى. – م.، 1970.