جاپون كولونيزاتورلارى قۋىلعاننان كەيىنگى العاشقىجىلدارى (1945-1948) كوپتەگەن جازۋشىلار ءوز شىعارمالارىندا ەلىنىڭ تاۋەلسىزدىگىنەن ءۇمىت ەتتى (لي حا يۋن (1902 جىلى تۋعان)، كيم سوپ (1906 جىلى تۋعان)، يۋچي حۆانداردىڭ (1897-1967) ولەڭ جيناقتارى). 1948 جىلدان باستاپ ادەبيەتتە انتيكوممۋنيستىك تەندەنسيا كۇشەيدى. پروزايكتەردىڭ اعا بۋىن وكىلدەرى (ەم سان سوپ، چۋ ە سوپ، لي مۋ ەن) ناتۋراليستىك جانە دەكادەنتىك ادەبيەت داستۇرلەرىن جالعاستىرۋدا. 1954 جىلدان بەرى فرانسۋزدىڭ ەكزيستەنسياليزمى مەن «جاڭا سىن» كونسەپسياسى، ت.ب. اعىمداردىڭ اسەرىندەگى جاس جازۋشىلار بوي كورسەتە باستادى. سوعىس، تورىعۋ، زارىعۋ جانە ابسۋردتىق تاقىرىبى كيم سون حان (1919 جىلى تۋعان)، سونۋ حۆيلەردىڭ (1922 جىلى تۋعان) پروبلەمالىق پروزالارىندا بەلەڭ الدى. لي دون دجي مەن لي حەن گيدىڭ پروزالارىندا ميستيسيزم جانە ارنايى «شىعىسشا ويلاۋ» باعىتىنداعى ىزدەنىستەر كەزدەسەدى. 1960 جىلى اپرەلدەگى كوتەرىلىستەن كەيىن ادەبيەتتە پروگرەسشىل تەندەنسيالاردىڭ قايتادان جاندانۋى بايقالدى. وڭتۇستىك كورەيا شىندىعىن سىنايتىن، بىلايشا ايتقاندا قاتىسۋ ادەبيەتى دامي باستادى.