سەمەي قالاسىنىڭ ۆوستوچنىي كەنتىندە 3-5 جاس ارالىعىنداعى بالالارعا ارنالعان 100 ورىندىق شاعىن ورتالىق اشىلدى. «اسىل جىبەك» مەكتەپكە دەيىنگى ءبىلىم بەرۋ مەكەمەسىنىڭ اشىلۋ سالتاناتىنا شقو اكىمى بەردىبەك ساپاربايەۆ قاتىستى، دەپ حابارلايدى Qamshy.kz پورتالى شقو اقپاراتتىق ورتالىعىنا سىلتەمە جاساي وتىرىپ.

ەلىمىزدە 2015 جىلعا قاراي بالالاردى مەكتەپكە دەيىنگى بىلىممەن قامتۋ 74 %-دى قۇرايدى. بۇل جونىندە ەلباسىنىڭ «قازاقستان-2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» جولداۋىندا ايتىلعان. بۇگىندە شىعىس قازاقستاندا جولداۋدا مىندەتتەلگشەن تاپسىرمانى ورىنداۋ بويىنشا ىلكىمدى ىستەر اتقارىلۋدا. مىسالى تەك سەمەي قالاسىندا جىل باسىنان بەرى 50 ورىندى «نيمات» پەن «ءالتايىر» جانە 100 ورىندى «اسىل جىبەك» ورتالىقتارى اشىلىپ، 200 بالا مەكتەپكە دەيىنگى ءبىلىم بەرۋ مەكەمەسىمەن قامتاماسىز ەتىلدى.

جىل سوڭىنا دەيىن 305 ورىندى 3 مەكتەپكە دەيىنگى مەكەمە اشۋ كوزدەلىپ وتىر. ازىرگە شاھارداعى مەكتەپ جاسىنا دەيىنگى 6778 بالا 31 بالاباقشادا تاربيەلەنۋدە. 1925 بالا 16 جەكەمەنشىك بالاباقشاعا بارادى.

جالپى سەمەي قالاسىندا 82 مەكتەپكە دەيىنگى ءبىلىم بەرۋ مەكەمەسى بار. بۇگىنگى كۇنگە دەيىنگى كورسەتكىش بويىنشا 3-6 جاس ارالىعىنداعى بالالاردى مەكتەپكە دەيىنگى مەكەمەلەرمەن قامتۋ 86،7 % ورىندالعان.