سولتۇستىك قازاقستاندا شوشقا فەرماسىندا 120-دان استام شوشقا ورتەنىپ كەتتى دەپ حابارلايدى Qamshy.kz اقپارات اگەنتتىگى  وبلىستىق توتەنشە جاعدايلار جونىندەگى دەپارتامەنتى مالىمەتىنە سۇيەنىپ.

باسپا ءسوز قىزمەتىنىڭ مالىمەتىنشە، 20 شىلدە كۇنى ساعات 18:39-دا تايىنشا اۋدانى تايىنشا قالاسىنىڭ №17 ءورت ءسوندىرۋ بولىمشەسىنە "مەريان" ج ش س ديرەكتورى حابارلاسىپ، اۋدان ورتالىعىنان 14 شاقىرىم قاشىقتىقتاعى نوۆويۆانوۆكا اۋىلىندا شوشقا كەشەنى ورتەنىپ جاتقانىن جەتكىزگەن.

"قوڭىراۋ بويىنشا ءورت سوندىرۋشىلەر بىردەن اتتانىپ، توتەنشە وقيعا ورنىندا اۋماعى 3 مىڭ 600 شارشى مەتر عيمارات لاۋلاپ جانىپ، كوك تۇتىنگە ورانعانىن كورگەن. ءورت تۋرالى حابار كەشىكتىرىلىپ جەتكىزىلگەندىكتەن، جالىن ۇلكەن اۋماقتى الىپ كەتىپتى. ءورت سالدارىنان باستاپقى مالىمەت بويىنشا 28 شوشقا مەن 95 توراي قىرىلدى"، — دەپ مالىمەت بەردى توتەنشە جاعدايلار جونىندەگى دەپارتامەنت.

"ءورت سوندىرۋشىلەردىڭ بىلىكتىلىگى مەن شاپشاڭدىعىنىڭ ارقاسىندا، شوشقا كەشەنىنىڭ باسقا عيماراتتارىن امان الىپ قالدىق، كەشەن جۇمىسشىلارى زارداپ شەككەن جوق"، — دەدى ۆەدومستۆونىڭ ءورت ءسوندىرۋدى ۇيىمداستىرۋ جانە اپاتتىق قۇتقارۋ ءبولىمىنىڭ باسشىسى، ازاماتتىق قورعانىس پودپولكوۆنيگى دميتريي ريابەنكو.

باستاپقى بولجام بويىنشا، ورتكە قىسقاشا تۇيىقتالۋ سەبەپ بولعان ەكەن.