دجوردج كلۋني مەن ونىڭ جارى اماليا دۇيسەنبى كۇنى ليۆاندا ءومىر ءسۇرىپ جاتقان 3 مىڭعا جۋىق سيريالىق بوسقىنداردىڭ بالالارىنا ارنالعان 7 مەكتەپتىڭ دامۋىنا $2،25 ملن. اۋداراتىنىن مالىمدەدى، دەپ جازادى Qamshy.kz اقپارات اگەنتتىگى. بۇل تۋرالى كلۋني اۋلەتى قورىنىڭ رەسمي سايتىندا حابارلاندى.

«ءبىز تۇتاس ۇرپاقتان ايرىلىپ قالا المايمىز. ءدال سول جەردە دۇنيەگە كەلگەندەرى ءۇشىن بالالاردىڭ كىناسى جوق. 1000-عا جۋىق سيريالىق جاستار قوعامنان شەتتەتىلىپ قالۋى مۇمكىن. ال لايىقتى تۇردە ءبىلىم السا، ومىرلەرى وزگەرەتىنىنە سەنىمدىمىن» - دەلىنگەن كلۋنيدىڭ حابارلاماسىندا. ايتا كەتەيىك، اكتەردىڭ جاقىندا عانا ەگىز بالالارى دۇنيەگە كەلگەن.

كلۋني اۋلەتىنىڭ قورىنان وزگە ومىردە ادىلەتتىلىك ورناتۋ ءۇشىن Google مەن HP كومپانيالارى دا جوباعا اتسالىسۋعا كىرىستى. ولار وقۋ ورىندارىنىڭ تەحنولوگيالىق جابدىقتارىن قامتاماسىز ەتۋدى كوزدەيدى. جينالعان جالپى قاراجات $3 ملن.

جوباعا جەتەكشىلىك ەتىپ وتىرعان بالالار قورىنىڭ مالىمەتىنە سۇيەنسەك، ليۆاندىقتار گولليۆۋد جۇلدىزىنىڭ نيەتىنە جوعارى باعا بەردى. مەملەكەتتىك ءبىلىم ءمينيسترى مارۆان حامادە كلۋني اۋلەتىنە ەرەكشە العىسىن ءبىلدىردى.

دجوردج كلۋني – امەريكالىق اكتەر، رەجيسسەر، پروديۋcەر. «قايداسىڭ، باۋىرىم؟»، «سيريانا»، «ۇرپاقتار» فيلمدەرىندە ويناعان ءرولى ءۇشىن بىرنەشە ماراپاتقا يە بولدى.