جۋرناليست ءارى وزبەكستاننىڭ ءبىرىنشى پرەزيدەنتى يسلام كارىموۆتىڭ تۋعان جيەنى دجامشيد كارىموۆتىڭ پسيحياتريالىق ەمحانادان شىققانىنا جارتى جىلدان استى. جىندىحانادا 11 جىلىن وتكىزگەن پرەزيدەنتتىڭ تۋىسى ءالى كۇنگە دەيىن ءتول قۇجاتىن الا الماي ءجۇر، دەپ جازادى Qamshy.kz اقپارات اگەنتتىگى جەرگىلىكتى ورتالىق ازيا پورتالىنا سىلتەمە جاساپ.

«2006 جىلدىڭ جازىندا شۆەسياعا كەتۋ ءۇشىن قۇجاتتار دايىنداپ جۇرگەنىمدە ءتولقۇجاتىمدى تارتىپ الدى. ءسويتىپ كۇشپەن جىندىحاناعا جاتقىزدى. سودان بەرى ءتولقۇجاتسىز ءجۇرمىن. قىزىم پرەزيدەنت شاۆكات ميرزيەيەۆتىڭ ۆيرتۋالدى قابىلداۋىنا جۇگىنگەن، الايدا جاۋاپ جوق. ادەيى ىستەپ وتىر ما، الدە ادەتتەگى وزبەك بيۋروكراتياسى ما – بىلمەدىم. ءتولقۇجاتسىز زەينەتاقى دا الا المايمىن، جۇمىسقا دا ورنالاسا المايمىن. ءقازىر قولىمدا قىزىم بەرگەن سوڭعى 6 مىڭ سوم بار»، – دەيدى دجامشيد كارىموۆ.  

وزبەكستاننىڭ العاشقى پرەزيدەنتىنىڭ ۇلكەن اعاسى ارسلان كارىموۆتىڭ ۇلى دجامشيد كارىموۆ دجيزاكە قالاسىنىڭ تۇرعىنى. 11 جىل بۇرىن بيلىكتى اشىق سىناعان ءجۋرناليستى كۇشتەپ جىندىحاناعا جاتقىزعان.

«10 جىل 5 ايىمدى جالعىز بولمەدە وتكىزدىم. شيزوفرەنيا دەگەن جالعان دياگنوز قويدى. شىنىمدى ايتسام، اعامنىڭ ءولىمى مەن ءۇشىن ۇلكەن توسىن سىي بولدى. سەبەبى، ونىڭ ءولىمى مەنى زىنداننان قۇتقاردى»، – دەدى كارىموۆتىڭ جيەنى.

سونداي-اق، دجامشيد كارىموۆ ەشقانداي بوگەتكە قاراماستان جۋرناليست رەتىندە ءوز جۇمىسىن جالعاستىراتىنىن ايتتى.