بۇگىن اسا كورنەكتى سازگەر، ءان جانرىنىڭ ايگىلى مايتالمانى، قازاقستان مادەنيەتىنە ەڭبەگى سىڭگەن قايراتكەرى، قازاقستاننىڭ حالىق ءارتىسى ءشامشى قالداياقوۆتىڭ تۋعان كۇنى. سازگەر وڭتۇستىك قازاقستان وبلىسى وتىرار اۋدانىندا 1930 جىلى 15 تامىزدا دۇنيەگە كەلگەن.

بالا كەزىنەن بويىنداعى بار تالانتىن القالى جيىن، الامان بايگەلەردە كورسەتە بىلگەن ءشامشى 1950 جىلدان باستاپ شىعارماشىلىقپەن تۇبەگەيلى تۇردە شۇعىلداندى. 1956-1962 جج. قۇرمانعازى اتىنداعى مەملەكەتتىك كونسەرۆاتورياسىندا ۆ.ۆ.ۆەليكانوۆ كلاسىندا وقىدى. ءشامشى اندەرى عاجايىپ سازدىلىعىمەن، سىلدىراپ اققان بۇلاق سۋىنداي تاپ-تازا سىڭعىرىمەن، ليريكالىق نازدىلىعىمەن ەرەكشەلەنەدى. ونىڭ شىعارماشىلىق جاعىنان سىڭىرگەن ەڭبەگى قازاق ەسترادالىق اندەرىنىڭ اۋەنىن ۇلتتىق ناقىشپەن قۇنارلاندىرۋىندا، ياعني حالىقتىق قاينارمەن قابىستىرۋىندا جاتىر. ال بۇل – ونىڭ قازاق جۇرتىنىڭ مۋزىكالىق ءداستۇرى ءسۇتىن ەمىپ وسكەندىگىنە دالەل.

قالداياقوۆ ۇلتتىق مۋزىكا ونەرىنىڭ ءان جانرىنا اسا ايقىن، سوڭعى لەپ الا كەلگەن سازگەر رەتىندە كورىندى. ونىڭ اندەرى قۇلاققا جاعىمدى، جۇرەككە جىلى قابىلدانىپ، جۇرتشىلىقتىڭ سۇيىسپەنشىلىگىنە بولەندى. كومپوزيتور شىعارمالارىنىڭ تاقىرىپتىق، مازمۇندىق اۋقىمى اسا كەڭ. ەلگە، جەرگە، وتانعا، اتا-اناعا، جارعا، دوس-جارانعا دەگەن سۇيىسپەنشىلىك – ءشامشى شىعارمالارىنىڭ باستى تاقىرىبى.

«مۋزىكا ءتىلى – ءتىلسىز ءتىل. ول ادام جانىنداعى كەرەمەتتەردىڭ، قۇدىرەت كۇشتىڭ عاشىق سيقىرشىسى. ءۇنسىز كۇرەسكە شاقىرادى، كوزسىز ەرلىككە باستايدى، مۇلگىپ كەتكەن جۇرەك پەرنەلەرىن وياتادى. الەۋەتتى جىگەر بەرەدى، ومىردەن ءوز ۇلەس سىباعاڭدى الۋعا جەتەكتەيدى، قۋانىش-قايعىڭدى بولىسەدى. اسىپ بارا جاتساڭ، تاسىپ بارا جاتساڭ ساباڭا ءتۇسىرىپ، ازاماتتىق پارىز تۋىن كوتەرەدى. وسىنداي قيىن دا كۇردەلى، ادام بالاسىنىڭ ءوز قۇدىرەت كۇشىندەي مۋزىكا مىقتىلىعى ش.قالداياقوۆ اندەرىنە دە ساباقتاس»، – دەيدى ەركىنباي اكىمقۇلوۆ.

1992 جىلى 29 اقپاندا جاسى 62-گە قاراعان شاعىندا ۇزاققا سوزىلعان اۋىر ناۋقاستان، كورنەكتى حالىق ءارتىسى ش.قالداياقوۆ كوز جۇمدى. كوزى تىرىسىندە-اق «ءشامشى اعا» دەگەن ءسوز «ءان اعا» دەگەن سوزبەن تۇتاسىپ، سينونيم بولىپ كەتتى.