الماتىدا قوقىس وڭدەۋ كەشەنىنىڭ قۇرىلىسى باستالدى. قالا اكىمىنىڭ ورىنباسارى سۇلتانبەك ماكەجانوۆ  قازاقستانداعى ەڭ ءىرى كەشەننىڭ ىرگەتاسىنا سالتاناتتى تۇردە كاپسۋلا سالدى، دەپ حابارلايدى Qamshy.kz اقپارات اگەنتتىگى.

نىسان الاتاۋ اۋدانىنداعى جەو-2 ماڭىندا بوي كوتەرمەك.

«بيزنەستىڭ جول كارتاسى -2020» وڭىرلىك يندۋستريالاندىرۋ كارتاسىنا ەنەتىن جوبا 5،3 ملرد تەڭگە جەكە ينۆەستيسيا ەسەبىنەن سالىنادى.

مامانداردىڭ ايتۋىنشا، قوقىس وڭدەۋ زاۋىتى 2025 جىلعا تامان سالىنعان اقشانى اقتايدى.

جىل سايىن بيۋدجەتكە 500 ملن تەڭگە قۇيىلىپ وتىرادى. كەشەننىڭ قۇرىلىسى مەن ودان ارعى جۇمىس جاساۋى بارىسىندا 600 ادام جۇمىسپەن قامتىلماق.

جىلىنا 550 مىڭ توننا قوقىس وڭدەيتىن زاۋىت 2018 جىلدىڭ ماۋسىمىندا پايدالانۋعا بەرىلەدى. وندىرىستىك قۋاتى الماتى حالقىنىڭ قاجەتتىلىگىن تولىعىمەن وتەي الادى.

«Green Recycle» ج ش س ديرەكتورى دميتريي دانيلچەنكونىڭ ايتۋىنشا، قوقىس سورتتاۋ كەزىندە جارامدى دۇنيەلەر ەكىنشى رەت وڭدەۋگە جىبەرىلەدى، ال بيولوگيالىق تۇرعىدان ءشىريتىن زاتتار پوليگوندا كومىلەدى.

«الماتىنىڭ وزىندە 1،5 مىڭ ونەركاسىپتىك كاسىپورىن بارىن ەسكەرسەك، بۇل جوبانىڭ ماڭىزى اسا زور ەكەنىن تۇسىنەمىز. سەبەبى، ەندى كوممۋنالدى جانە وندىرىستىك  قوقىستى يگەرۋ مۇمكىندىگى تۋىپ وتىر»، - دەدى الماتى كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى الماس مادييەۆ.

قوقىس پوليگوندارىنىڭ پروبلەماسى تەك قازاقستاندا عانا وزەكتى بولىپ وتىرعان جوق. الەمدەگى دامىعان جانە دامۋشى ەلدەردىڭ بارىندە بۇل پروبلەما بار. مەملەكەتتىڭ ەكونوميكاسى، ونەركاسىبى قانشالىقتى دامىعان سايىن قالدىقتاردىڭ دا كولەمى ارتا تۇسەدى. ال، تىعىرىقتان شىعۋ ءۇشىن قازاقستانعا سول دامىعان ەلدەردىڭ تاجىريبەسىن قولدانعاننان ارتىق شارا جوق. بۇل تۇرعىدا قازاقستان ءۇشىن «ازيا جولبارىسى» اتانىپ كەتكەن سينگاپۋردىڭ تاجىريبەسىنەن ارتىعى جوق دەپ سەنىممەن ايتۋعا بولادى. ويتكەنى، اتالعان شاعىن مەملەكەت قوقىستى وڭدەۋمەن قاتار، ودان ەنەرگيا قۋاتىن ءوندىرىپ تە شىعارادى. بالامالى ەنەرگيا كوزدەرىن ىزدەپ جۇرگەن قازاقستان ءۇشىن بۇل «ءبىر وقپەن ەكى قوياندى اتىپ الۋدىڭ» تاپتىرماس ۇلگىسى.

كۇنى كەشە استانادا الەمدەگى تانىمال كاسىپكەرلەرمەن، ەكونوميست-ساراپشىلارمەن كەزدەسكەن مەملەكەت باسشىسى نۇرسۇلتان نازاربايەۆ قازاقستانداعى پايدالى قازبالاردىڭ قورى 34 ملرد توننانى قۇرايدى دەپ، شەتەلدىك ينۆەستورلاردى ەلگە شاقىردى. ال، قازاقستاندا جينالعان قوقىستىڭ كولەمى سول پايدالى قازبانىڭ كولەمىنەن دە اسىپ كەتىپ وتىر. ءبىزدىڭ ەلگە ءقازىر تەك پايدالى قازبانى وڭدەيتىن عانا ەمەس، قوقىس وڭدەيدىن تە الىپ زاۋىتتار قاجەت. ولاردى سالۋعا ءوز كۇشىمىز جەتپەسە شەتەلدەن دە ينۆەستورلاردى تارتۋعا بولادى. تەگىن قوقىستان اقشا جاساۋ ۇسىنىسىنان باس تارتاتىندار كوپ بولمايدى دەپ ويلايمىز. جالپى، بۇل پروبلەمانى ەكسپو-2017 كورمەسى اياسىندا دا شەشۋگە بولاتىن ەدى. الايدا، وتاندىق عالىمداردىڭ ەشبىرى قوقىستان ەنەرگيا قۋاتىن الاتىن جوبانى ۇسىنعان جوق.

دەگەنمەن، قازاقستان «جاسىل ەكونوميكا» يدەياسىن ەندى عانا قولعا الا باستاعانىن ەسكەرسەك، ەلىمىزدە قوقىستان ەنەرگيا وندىرەتىن ءالى تالاي مەگا-زاۋىتتىڭ قۇرىلىسى باستالاتىنىنا سەنىمدىمىز.