بۇل تاقىرىپ جايلى قۇددى تيەگى سالۋلى، ىشەك-پەرنەسى تاعۋلى، قۇلاعى كەلتىرىلىپ قويىلعان دومبىراداي تەك شەرتسەڭ بولعانى – سايراي جونەلگىڭ كەلەدى. وسى ۋاقىتقا دەيىن قانشاما اقىن جىرىنا جاماۋ قىلىپ، قانشاما جازۋشى اڭگىمەسىنە ارقاۋ قىلسا دا، وقىرماندى جالىقتىرعان ەمەس.
نەگە؟ سەبەبى وسىناۋ تاقىرىپ، ءار ادامنىڭ قىسقا عانا عۇمىرىندا ساناعا ساقتالىپ، ەستەن كەتپەس ەستەلىكتەرىمەن ەسكەرىلەتىن كەرەمەت كەزەڭدەردىڭ ءبىرى...
ستۋدەنتتىك ءومىر. اركىمنىڭ تولعانىسى ءارتۇرلى. ال مەن بەلگىلى اقىن قادىر مىرزا ءالىنىڭ ولەڭىن نەگىزگە الا وتىرىپ، ءوز تولعانىسىمدى تارقاتقىم كەلەدى.
«الماتىمىز جاستىقتىڭ باعى ىسپەتتەس،
قانشاما گۇل سول باققا قونىس تەپتى» – دەگەن ولەڭ جولدارىنىڭ ماعىناسىنا بۇگىندە تەرەڭ بويلاعاندايمىز. اتا-انامىزدىڭ جانىنان العاش رەت ۇزاپ، اياداي عانا اۋىلدىڭ ءۇمىتىن ارقالاپ ارمان قالا الماتىعا ءبىز دە كەلدىك.
«باستالماعان قالانىڭ داستانى ءالى
ءبىرىنشى جىل دالا دەپ جاس تامادى» – دەپ اقىن اعامىز ستۋدەنتتىك ءومىردىڭ قىزىققا تولى العاشقى كۇندەرىن ادەمى ۇيلەسىممەن جىرعا قوسقان. وقۋ جىلىنىڭ باسىنداعى ءبىر-بىرىمىزدى تانىماي، اركىم «وزىنشە» ءبىر «الەم» بولىپ جۇرگەن كەزدەرمەن، ەندى ءبىرى كابينەت تابا الماي اداسقان كۇندەر دە وتە شىقتى. ۋنيۆەرسيتەتكە كەلىسىمەن «پەرۆاش» دەگەن اتاۋدى ارقالاپ الدىق.
جوعارىداعى جىر جولدارىندا ايتىلعانداي، ءار كۇنىمىز جىلاۋمەن ءوتتى. «وسى قالاعا بەكەر كەلدىك»، «ءوز قالامىزداعى وقۋعا تاپسىرۋىمىز كەرەك ەدى» دەگەن «ارام» ويلارىمىزدىڭ دا بولعانى جاسىرىن ەمەس. ارينە، ونداي ويلار كوڭىل-كۇيىمىز قۇلازىپ، اسقازانىمىز «اڭگىمە» ايتقان كەزدە ساپ ەتە قالاتىن. كەيىننەن «...بيگە بارسا باراتىن ءبىر توپ بولىپ،
جالعىز ءجۇرۋ دەگەندى بىلمەيتۇعىن» – دەگەننىڭ كەيپىن كيدىك. ارامىزداعى جانداردىڭ ءبىرى «قالاعا شىعىپ، قىدىرىپ كەلمەدىك پە؟» – دەسە، ورە تۇرگەلەمىز. قانشا جەردەن كەشىگىپ بارا جاتىرعانىمىزبەن، تاكسي دەگەنگە مىنبەيتىن ەدىك.. ويتكەنى تاكسي باعاسى اجەپتاۋىر قالتامىزدى قاعاتىن. ال تاكسيدەن جىرىپ الىپ قالعان 100 تەڭگەمىز ءبىر روللتون الاتىن اقشامىز.
ال وقۋدىڭ كەزىندەگى ەمتيحاننىڭ ورنى ءبىر بولەك.
«ون اي بويى ماسايراپ ويناعاندار
ەمتيحاندا وتىز كۇن كوز ىلمەگەن» – دەگەن جىر جولدارى بەكەر ايتىلماسا كەرەك-تى. ەرتەڭ ەمتيحان دەگەن كۇنى، ال كەلىپ دايىندال، كۇنىمەن كۇلكى جوق، ودان قالسا، ۇيقى جوق. ونداي كەزدە تاڭ دا ەرتە اتاتىنداي بولىپ كورىنەتىن. بار دايىندالعانىمىزبەن بارىپ، پارتاعا جابىسىپ وتىرامىز. ءبىرى ءۇشىن وقىعانى كەلەدى، ەندى ءبىرى ءۇشىن «وقىماعانى» كەلەدى. مۇعالىمدەر دە ال كەلىپ «99»، «74»، «84» سەكىلدى ءىش كۇيدىرەر باللدى قويادى. سودان سوڭ جۇرگەنىڭ: «ءبىر بالل قوسىپ بەرىڭىزشى»، «ستيپەنديامدى ساقتاپ قالۋىم كەرەك»، «پوۆىشكاعا ىلىگەيىن دەگەن ەدىم»، «4-كە ءبىر بالل جەتپەي تۇر». ال وسى كەزدە ەرىكسىز مەكتەپتەگى مۇعالىمدەرىڭدى ساعىناسىڭ.
«ءبىر جىگىتتىڭ ويىندا ون ارماننان،
ون جىگىتكە جالعىز-اق كونسپەكتى». مەكتەپ قابىرعاسىندا ءمۇعالىمدى قاقساتىپ، ءجۇز ايتپاسا ۇلگەرمەيتىن ءبىز – ستۋدەنت اتانعالى قولىمىزدىڭ قالاي ءجۇرىپ كەتكەنىن اڭعارماي دا قالدىق.
مەكتەپ كەزىندەگى «قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى»، كونسپەكت كەزىندە «ق ر پرەز ن.نازاربايەۆ» بولدى دا قالدى.
شىنىمدى ايتسام، بيىل عانا ستۋدەنتتىك ءومىر – ەڭ قىزىقتى ساتتەر دەگەنگە تولىعىمەن كوزىم جەتتى. اسىرەسە 1ء-شى كۋرستىڭ ورنى ەرەكشە.
ستۋدەنت ءسوزىنىڭ ماعىناسى «ىزدەنۋشى» ەكەنىن بىلەتىن شىعارمىز. كوزدى اشىپ-جۇمعانشا وتە شىعاتىن ءتورت جىلدا ىزدەنۋشى ەكەنىمىزدى ەسىمىزدە ساقتاپ، التىن ۋاقىتتىڭ باعاسىن بىلەيىك.
- كۋراتور – «مەن سەندەرگە جامان بولسىن دەمەيمىن...»
- جاتاقحانا – اشتىقپەن وتكەن تالاي كۇندەردىڭ كۋاسى.
- شاكىرت اقى – «بىلاي تارتسام اربا سىنادى، بىلاي تارتسام وگىز ولەدى»
- لەكسيا – «سەن تيمەسەڭ، مەن تيمە».
- ستاروستا – دەكانات پەن ۇستازدار اراسىنداعى «بايلانىس سىمى».
- سەسسيا – «مىڭ ءولىپ، مىڭ ءتىرىلۋ»
- رۋبەجكا – سەسسيانىڭ ءىنىسى.
- دەكانات – «ايشىلىق الىس جەرلەردەن، جىلدام حابار العىزدى».
- بۋحگالتەريا – كۆيتانسيانىڭ جاۋى.
- كىتاپحانا – «ادام بولاتىن بالا الىسقا قارايدى».
- ستۋدەنتتىك بيلەت – جەڭىلدىكتەر جانىڭدا.
- سەمينار – «عاسىردان دا ۇزاق كۇن...»
- Retake – «جازعا قالىپ اسىقپاي وقيمىز».
- «ىشكى گرانت» - 3.0-دەن تۇسپەيتىن GPA.
- مەملەكەتتىك گرانت - ستيپەنديا ساقتالسا بولدى...
- بانكومات – بىتپەيتىن كەزەك.
- پروپۋسك – «تەكسەرىس بەكەتى».
- رولتون – اش قارىننىڭ «اۋىز باستىرىعى».
- وقىرمان بيلەتى – «بيلەت جوق بولسا، كىتاپ جوق».
نارگيزا ەرەس
پىكىر قالدىرۋ