نەگىزى قۇقىق قورعاۋ ورگاندارىن ماقتاپ جازعان ەمەسپىن، تەك سىنايمىن، سەبەبى، جۇمىسىمنىڭ رەتى سولاي. ولار مەن بىزدەر، ياعني ادۆوكاتتار، ەكى بارريكادانىڭ ەكى جاعىندامىز. ال، مىنا جولى ورالدىق قۇقىق قورعاۋ ورگانىن (ناقتى اتاۋىن ايتپاي-اق قويايىن، جاعىمپازدانىپ وتىر دەپ ويلاپ قالار) ماقتاعالى وتىرمىن. بىلتىر ءبىر جاس بالانى قورعاعان ەدىم، تاپ-تازا ءسالاف ەدى، "ءدىني ەكسترەميزمدى قارجىلاندىرۋ" دەگەن ايىپپەن 3 جىل جالپى رەجيمگە سوتتالدى. اتا-اناسىنىڭ جالعىز ۇلى، ودان باسقا قىزدارى بار، ءبىراق، قازاق ءۇشىن ۇلدىڭ ورنى ەرەكشە ەكەنى بەلگىلى عوي. شەشەسى بايعۇس "جالعىزىم، جالعىزىم"-دەپ ءالى كۇنگە جانىن شۇبەرەككە ءتۇيىپ شاپقىلاپ ءجۇر. بالا كوپ ۇزاماي، مەرزىمىنەن بۇرىن بوساپ شىعۋى ءتيىس، سەبەبى، ول كولونيادا بوسقا جاتپاي سونداعى كاسىپتىك مەكتەپتە وقىپ، ءبىلىم الدى، قاۋعاداي ساقالىن قىرقىپ، جونگە كەلتىردى، مەن دە ءوز تاراپىمنان ابايدىڭ، شاكارىمنىڭ كىتاپتارىن اپارىپ بارىمشا بەتىنىڭ بەرى قاراۋىنا اتسالىستىم. ول ماعان كولونيادان بوساپ شىققان سوڭ، ءوزىنىڭ ايەلىمەن اجىراساتىنىن اشىق ايتتى، سەبەبى، كەلىن بالا ۇستىندەگى قاپ-قارا حيدجابىن قانشا جەردەن جالىنساق تا شەشپەي قويدى، ءوزىنىڭ تۋعان اپا-جەزدەسى سيرياعا بالا-شاعالارىمەن اتتانىپ كەتكەن، جانۇيالارىمەن تۇگەل سول جولدا، ەنەسىن سىيلاۋ دەگەن اتىمەن جوق، ويتكەنى ول كىسى ناماز وقىمايدى، ت.ب. ايتا بەرسەڭ اڭگىمە كوپ. نەگىزگى ايتايىن دەگەنىم، جاقىندا بالانىڭ اناسىمەن كەزەكتى اڭگىمە ۇستىندە (ءجيى كەزدەسۋدىڭ ءساتى تۇسە بەرمەيدى) "اپا، ءسىز قۇقىق قورعاۋ ورگاندارىنىڭ قىزمەتكەرلەرىنە ءومىر بويىنا راحمەت ايتىپ وتەتىن بولاسىز"- دەدىم، ول كىسى تۇسىنبەي بەتىمە سۇراۋلى جۇزبەن قارادى. "قاراڭىز، بالاڭىزدىڭ بەتى بەرى قارادى ما، قارادى، دۇرىس جولعا ءتۇستى مە، ءتۇستى. مىنە ەندى مەملەكەت سونىڭ ءبارىن ەسكەرىپ، ەرتەرەك كولونيادان شىعارۋعا اتسالىسىپ جاتىر، ال ەگەر ول الدىڭعى قىلمىسپەن ۇستالماسا نە بولار ەدى؟ كەلىنىڭىزدىڭ تۋىستارىمەن نەمەرەلەرىڭىزدى الىپ سيرياعا اتتانىپ كەتپەسىنە كىم كەپىل؟-دەدىم". شەشەسى بايعۇس "دۇرىس ايتاسىڭ، دۇرىس ايتاسىڭ ابزال"-دەپ جىلاپ جىبەردى.

(ابزال قۇسپاننىڭ فەيسبۋكتەگى پاراقشاسىنان الىندى)