بۇگىنگى كۇنى سىرتتا ءجۇرىپ تە، الەۋمەتتىك جەلىلەردە دە مەملەكەتتىك قىزمەتكەرلەردىڭ جۇمىسباستىلىقتان، ۇدايى قوسىمشا ساعاتتاردان جەكە ومىرگە ۋاقىتى جەتىسپەي جاتقاندىعىن ەستىپ ءجۇرمىز.

كوپتەگەن قازاقستاندىقتار جۇمىستا بايلانىپ قالۋدىڭ سالدارىن  شەنەۋنىكتەردىڭ دۇرىس جۇمىس اتقارماۋىنان دەپ بىلەدى. ويتكەنى قىزمەتكەرلەر شىنىندا دا ەڭبەك شارتىندا كورسەتىلگەن ساعاتتاردان تىس ۋاقىتتا دا،  ءلام-ميم دەمەي جۇمىستا قالا بەرەدى. ماسەلەن، بۇرىندارى  مەملەكەتتىك قىزمەتتە ىستەگەن، مينيسترلىكتە جوعارى لاۋازىمعا يە بولعان قىزمەتكەر جۇمىستىڭ جەكە ءومىر مەن اتا-اناسىنىڭ ورنىن قالاي  باسقانىن ايتتى. ول ءوز ەسىمىنىڭ قۇپيا ساقتالعانىن قالايدى.

«مەنىڭ تاجىريبەمدە مەملەكەتتىك قىزمەتتە ىستەۋ جەكە ومىرىمە كەرى اسەرىن تيگىزدى. مينيسترلىككە جۇمىسقا ورنالاسقان كۇننەن باستاپ، وندا  باسىممەن كىرىگىپ كەتتىم. ويتكەنى سەنى ەشكىم ەلەمەيدى نەمەسە جۇمىستان شىعارىپ جىبەرەدى. العاشقى كەزدەرى قىزمەتىمە بارلىق ۋاقىتىمدى جۇمساعانىما ماقتان تۇتىپ ءجۇردىم، الايدا ۋاقىت وتە كەلە ءومىرىمنىڭ 100 پايىزى تەك جۇمىستان تۇراتىندىعىن اڭعاردىم. سۇيگەن قىزىممەن دە ايىرىلىسىپ كەتتىك، دوستارىم دا سيرەپ، ارالاساتىن ورتام دا تۇبەگەيلى وزگەردى. ەڭ سوراقىسى، انامدى تۋعان كۇنىمەن قۇتتىقتاۋدى ۇمىتىپ كەتكەن كەزدەرىم دە بولدى. ءبىراق ول ماعان رەنجىگەن ەمەس، ويتكەنى انام مەنىڭ بولاشاعىم ءۇشىن بار قاراجاتىن جۇمساپ، سۋپەرمەملەكەت قىزمەتكەرى بولۋ ءۇشىن وقىتتى ەمەس پە؟ »،- دەدى ول اششى مىسقىلمەن.

جىگىت نەلىكتەن جۇمىستا قاراڭعى تۇسكەنشە قالاتىندىعىن ايتىپ بەردى

مەنىڭ جۇمىس كۇنىم رەسمي تۇردە تاڭعى 09:00 دەن 18:00-گە دەيىن بولاتىن. ءبىراق ەسىمدە قالعانى تەك ءبىر عانا رەت ۋاقتىلى قايتتىم، ول مەنىڭ تۋعان كۇنىم بولاتىن. ءتىپتى، «مىنە جۇمىس ۋاقىتى اياقتالى، ەندى قايتا بەرۋگە بولادى» دەپ وتىرعان ساتتە جوعارىدان حابارلاسىپ، جاڭا تاپسىرما بەرەدى. ءبىر كۇن ىشىندە قانشاما اۋقىمدا جۇمىس ىستەسەڭ دە، ايتەۋىر، قوسىمشا ءىس تابىلىپ تۇرادى. ارينە، كوبىنە ءوز شەشىممەن قالاتىنمىن، ءبىراق ولاي ىستەۋىمە نە سەبەپ ەكەندىگى بەلگىلى ەمەس پە؟ قوسىمشا تولەماقى جايىندا ايتا كەتەر بولساق، جاقسى كورسەتكىشكە جەتكەن قىزمەتكەرلەرگە سىياقى بەرىلەدى. ءبىراق، جۇمىس ساعاتتارىنان تىس ۋاقىت ءۇشىن ەشقاشان قوسىمشا  تولەماقى بەرىلگەنىن كورگەن ەمەسپىن».

ەستەرىڭىزگە سالا كەتەيىك، 9 قازان كۇنى ق ر ماجىلىستەگى ۇكىمەت ساعاتتارىندا ەڭبەك جانە الەۋمەتتىك قورعاۋ ءمينيسترى  تامارا دۇيسەنوۆاعا مەملەكەتتىك قىزمەتكەرلەردىڭ بەكىتىلگەن ۋاقىتتان ارتىق جۇمىس ىستەۋى جونىندە سۇراق قويىلعان بولاتىن.

بۇل سۇراققا مينيستر: «ق ر ەڭبەك شارتىنا ساكەس، اپتاسىنا 40 ساعاتتىق جۇمىس ۋاقىتى بەكىتىلگەن. ەگەر ارتىق ساعاتتار جونىندە ايتساق، ءبىر تاۋلىكتە 2 ساعاتتان ارتىق جۇمىس بەرىلمەۋى كەرەك. ءبىراق بۇل كورسەتكىش ايىنا 12 ساعاتتان اسپاۋى ءتيىس. وسىعان سايكەس، قىزمەتكەر ارتىق جۇمىس ىستەۋگە جازباشا ءتۇردى كەلىسىم بەرۋى كەرەك»،- دەپ جاۋاپ بەرگەن بولاتىن.